ފްރާންސްގައި ބާއްވާ އޮލިމްޕިކްސްގެ ޕެރަ ގޭމްސް ފެށުމުގެ ރަސްމިއްޔާތުގައި ރާއްޖޭގެ ދިދަ ވިހުރުވާލައިފިއެވެ.
މިފަހަރުގެ ގޭމްސްގައި ރާއްޖެ ތަމްސީލުކުރާ ދެ ދުވުންތެރިންނަކީ ފާތިމަތު އިބްރާހިމާއި (ފާތުން) އާއި އަބްދުއްރައްޒާގެވެ.
ޕެރަލިމްޕިކް ގޭމްސްގައި ވާދަކުރުމުގެ ފުރުސަތު މި ދެ ދުވުންތެރިންނަށް ލިބުނީ ރާއްޖޭގެ ރޭންކިންގެ އެންމެ ކުރީގައި އޮތް ދެ ދުވުންތެރިންނަށް ވާތީއެވެ. މި ދެ ދުވުންތެރިން ވަނީ ދާދިފަހުން ބޭއްވި އިންޑިއަން އޯޝަން އައިލެންޑު ގޭމްސްގައި ރާއްޖެ ތަމްސީލުކޮށްފައެވެ.
އޮލިމްޕިކްސްގެ ޕެރަ ކަޓަގަރީ ނުވަތަ ޕެރަލިމްޕިކްސްއަކީ ނުކުޅެދޭ މީހުންނަށް ހާއްސަކޮށް، ދުނިޔޭގެ އޮލިމްޕިކް ކައުންސިލުން ބާއްވާ ގޭމްސްއެކެވެ. ކޮންމެ އަހަރަކު ވެސް އޮލިމްޕިކްސްއަށް ފަހު ޕެރަ ގޭމްސް އޮލިމްޕިކްސް ބޭއްވި ގައުމުގައި ބާއްވައެވެ. މިފަހަރު ޕެރަލިމްޕިކްސް ވެސް އޮންނާނީ ފްރާންސްގެ ޕެރިހުގައެވެ.
ޖަޕާނުގައި 2021 ގައި ބޭއްވި ޕެރަލިމްޕިކްސް ގައިވެސް ފާތުން ވަނީ ރާއްޖެ ތަމްސީލުކޮށްފައެވެ. މިއީ ރާއްޖޭގެ އެތުލީޓުން އެންމެ ފުރަތަމަ ވާދަކުރި ޕެރަލިމްޕިކްސް ގޭމްސް އެވެ މީގެއިތުރުން މަޑަގަސްކަރާގައި އެންމެ ފަހުން ބޭއްވި އިންޑިއަން އޯޝަން އައިލެންޑް ގޭމްސްގައި ފާތުން ވަނީ ރާއްޖެއަށް ބްރޮންޒް މެޑަލް ހޯދައިދީފައެވެ.
ރައްޒާގު އެންމެ ފުރަތަމަ ބައިނަލްއަގްވާމީ މުބާރާތެއްގައި ވާދަކޮށްފައިވަނީ މިދިޔަ އަހަރުގެ އިންޑިއަން އޯޝަން އައިލެންޑް ގޭމްސްގައެވެ. އޭނާ ވަނީ މި މުބާރާތުން ބްރޮންޒް މެޑަލް ހޯދާފައެވެ.
މުބާރާތުގެ ރާއްޖެ ވާދަކުރާ ހީޓުތައް ފަށާނީ މާދަމާ އެވެ.