އޭޝިއަން ވޮލީބޯލް ކޮންފަޑެރޭޝަން (އޭވީސީ) ގެ ބޯޑުގެ ދެވަނަ ދައުރަކަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް އަދި މިހާރު ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ގެ ރައީސް މުޙައްމަދު ލަތީފް އިންތިޚާބުވެވަޑައިގެންފި އެވެ.
އޭވީސީގެ ބޯޑަށް ލަތީފް އިންތިޚާބުވެވަޑައިގަތީ ތައިލެންޑުގެ ބެންކޮކުގައި މިއަދު ފެށި އޭވީސީގެ ޖެނެރަލް އެސެމްބްލީގެ ތެރެއިންނެވެ. މި މަގާމަށް ލަތީފް އައްޔަންކުރެއްވިއިރު، އޭނާ ދަނީ ކާވާގެ ރައީސްކަމުގެ ދެވަނަ ދައުރެއް ފުރިހަމަކުރައްވަމުންނެވެ. ލަތީފް ވަނީ 2017 ވަނަ އަހަރުވެސް އޭވީސީގެ ބޯޑަށް އިންތިޙާބުވެވަޑައިގެންފައެވެ.
ވޮލީގައި ރާއްޖެ ހިމެނޭ ސަރަހައްދުގެ އެންމެ އިސްފަރާތަކީ އޭވީސީއެވެ. އޭވީސީން ވަނީ އެ ޖަމުއިއްޔާގެ ކަންތައްތައް ކުރިއަށްގެންދިއުމަށް ފަސް ޒޯނަކަށް ބަހާލާފައެވެ. ސެންޓްރަލް އޭޝިއާގެ ޒޯނަލްއަކީ ދެކުނު އޭޝިއާގެ ހަރަކާތްތައް ކުރިއަށްގެންދާނެ އެންމެ އިސްފަރާތެވެ. 14 ގައުމު ހިމެނޭ މި ޒޯނަކީ އެއްމެ ގިނަ ވޮލީ ކުޅުންތެރިން ތަމްސީލްކުރާ ސަރަހައްދެވެ. މި ހުރިހާ ޒޯންތައް އޭވީސީގެ ބެލުމުގެ ދަށުން ހަރަކާތްތެރިވާއިރު، ވޮލީގެ މައި އިދާރާއަކީ އެފްއައިވީބީއެވެ.
ބޯޑަށް އިންތިޚާބުވުމުގެ އިތުރުން ލަތީފަށް ވަނީ އޭވީސީގެ އެގްޒެކުޓިވް ޒޯނަލްގެ ނައިބު ރައީސްގެ މަގާމުވެސް ލިބިވަޑައިގެންފައެވެ. އެއީ އޭވީސީގެ ބޯޑުގައި ސެންޓްރަލް ޒޯނު ތަމްސީލުކުރާ އެންމެ އިސް މަގާމެވެ. ސެންޓްރަލް ޒޯނުން އޭވީސީ ބޯޑުގައި ލަތީފް އާއެކު ހަތަރު މެމްބަރުން ވަނީ އިންތިޚާބުކޮށްފައެވެ. ރާއްޖޭގެ އިތުރުން ދެން ހިމެނެނީ އީރާނާއި ނޭޕާލުގެ ވޮލީބޯލް ފެޑެރޭޝަނުގެ ރައީސް ކިރްގިސްތާނުގެ ވޮލީބޯޅަ ފެޑެރޭޝަނުގެ ޖެނެރަލް ސެކްރެޓަރީ އެވެ.
ލަތީފުގެ ކުރިން އޭވީސީގެ ހިންގާ ކޮމިޓީއަށް އެންމެ ފުރަތަމަ ހޮވިވަޑައިގެންނެވި ދިވެހި ބޭފުޅަކީ ވޮލީބޯލް އެސޯސިއޭޝަނުގެ ކުރީގެ ރައީސް މުޙައްމަދު ރިޔާޒެވެ.
"ޕީއެސްއެމް ސްޕޯޓްސް" އާ ވާހަކަދައްކަމުން ލަތީފް ވިދާޅުވީ އޭވީސީގެ އެގްޒެކުޓިވް ޒޯނަލްގެ ނައިބު ރައީސްގެ މަގާމު ލިބުމަކީ ރާއްޖޭގެ ވޮލީއަށް ލިބިގެންދިޔަ ކާމިޔާބީއެއް ކަމަށެވެ. އަދި މިއާއެކު ރާއްޖޭގެ ވޮލީ ކުރިއަރުވަން އިތުރު މަސައްކަތްތަކެއް ކުރައްވާނެ ކަމަށްވެސް ވިދާޅުވިއެވެ.
ކާވާއަކީ ސެންޓްރަލް އޭޝިއާގެ ފަސް ގައުމާއި އަފްޣާނިސްތާނާއެކު ސައުތު އޭޝިއާގެ އަށް ގައުމު ހިމެނޭހެން 14 ގައުމެއްގެ މައްޗަށް އެކުލެވޭ ޖަމުއިއްޔާއެކެވެ. އެ އެސޯސިއޭޝަނަކީ ވޮލީބޯޅައިގެ ދުނިޔޭގެ ފެޑެރޭޝަން، އެފްއައިވީބީން އުފައްދާފައިވާ 22 ޒޯނަލް އެސޯސިއޭޝަންގެ ތެރެއިން އެއް އެސޯސިއޭޝަނެވެ. މި ޒޯނުގެ ރައީސްކަމުގެ ދެވަނަ ދައުރެއް ލަތީފް ދަނީ ފުރިހަމަކުރައްވަމުންނެވެ.