ސައުދީ ޕްރޯ ލީގުގެ އަލް-ނަސްރަކީ ކެރިއަރުގައި ކުޅޭނެ އެންމެ ފަހު ކުލަބަށް ވެދާނެ ކަމަށް ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ބުނެފިއެވެ.
ރޮނާލްޑޯ މިހެން ބުނީ، ދާދިފަހުން ޕޯޗުގަލްގެ ޓީވީ ޗެނަލަކަށް ދިން އިންޓަވިއުއެއްގައެވެ.
މިހާރު އުމުރުން 39 އަހަރުގެ ރޮނާލްޑޯ، އަލް-ނަސްރުއާ ގުޅުނީ މިދިޔަ އަހަރުގެ ޖަނަވަރީ މަހުގައި އިނގިރޭސި ކްލަބު، މެންޗެސްޓާ ޔުނައިޓެޑުންނެވެ. ޔުނައިޓެޑް ދޫކޮށްލުމަށްފަހު، އެފަހަރުގެ ސީޒަނުގައި ރޮނާލްޑޯ އެންމެ ބޮޑަށް ބަދަލުވާނެކަމަށް ބެލެވުނީ ކެރިއަރު ފެށި ސްޕޯޓިންގ ލިޒްބަން އަށެވެ.
"އަހަރެންނަށް ނޭނގޭ ވަރަށް އަވަހަށް ރިޓަޔާކުރާނީ ކަމެއް، އަދި ދެތިން އަހަރު ފަހުން ކަމެއް. އެކަމަކު، އަހަރެން ކުޅުން ހުއްޓާލާނެ ކަމަށް ބޮޑަށް ބެލެވެނީ މިހާރުގެ ކްލަބު (އަލް-ނަސްރު) ގައި ހުރެގެން." ޕޯޗުގީޒް ޓީވީ ޗެނަލް 'ނައު' އަށް ދިން އިންޓަވިއުގައި ރޮނާލްޑޯ ބުންޏެވެ.
ރޮނާލްޑޯ ބުނީ، އަލް-ނަސްރުގައި ހުރީ ވަރަށް އުފަލުން ކަމަށާއި، އެ ގައުމު ވެސް އޭނާ އަށް ވަރަށް ރަނގަޅު ކަމަށެވެ. އަދި، ސައުދީގައި ކުޅެން އުފާވާ ކަމަށާއި، އެތަނުގައި އިތުރަށް ކުޅުން ކުރިއަށްގެންދާން ބޭނުންވާ ކަމަށް ވެސް ރޮނާލްޑޯ ބުންޏެވެ.
ކުރީން، ސްޕެއިނުގެ ރެއާލް މެޑްރިޑާއި، އިޓަލީގެ ޔުވެންޓަސް އަށް ކުޅެފައިވާ ރޮނާލްޑޯ ވަނީ ކެރިއަރުގައި މިހާތަނަށް 898 ގޯލް ޖަހައިފައެވެ. އޭގެތެރެއިން، 130 ލަނޑުޖަހައިދީފައިވަނީ ޕޯޗުގަލް ގައުމީ ޓީމަށެވެ. ރޮނާލްޑޯ ވަނީ އަދިވެސް ގައުމީ ޓީމަށް ކުޅެމުން ގެންދިއުމަށް ބޭނުންވާކަން ކަށަވަރުކޮށްދީފައެވެ.
ރޮނާލްޑޯ އިތުރަށް ބުނީ، އޭނާ ގައުމީ ޓީމަށް ކުޅުން ހުއްޓާލާއިރު ކުރީބައިގައި ރިޓަޔާކުރަން އުޅޭ ކަމަށް އެއްވެސް މީހަކު ގާތުގައި ނުބުނާނެ ކަމަށާއި، އެ ނިންމުން ވެގެންދާނީ ކުއްލިއަކަށް ނިންމާ ނިންމުމެއް ކަމަށެވެ. އެކަމަކު، އެގޮތަށް ނިންމާނީ ވަރަށް ބޮޑަށް ވިސްނާފައި ކަމަށް ވެސް ރޮނާލްޑޯ ބުންޏެވެ.
"މިހާރު އަހަރެން ބޭނުންވަނީ ކުރިއަށް އޮތް މެޗުތަކުގައި ގައުމީ ޓީމަށް އެހީތެރިވެދޭން،"
"އަހަރެމެން ކުރިމަތީގައި ދެން އެންމެ އަވަހަށް މިއޮތީ ނޭޝަންސް ލީގު. އެ މުބާރާތުގައި ކުޅެން ވަރަށް ބޭނުން." ރޮނާލްޑޯ ބުންޏެވެ.
މިހާތަނަށް ފަސް ފަހަރު ޔުއެފާ ޗެމްޕިއަންސް ލީގުގެ ޓްރޮފީ ކާމިޔާބުކޮށްފައިވާ ރޮނާލްޑޯ އަށް އެ މުބާރާތުގައި އޭނާ ހޯދާފައިވާ ކާމިޔާބީތައް ފާހަގަކުރުމުގެ ގޮތުން ޔުއެފާގެ ރައީސް، އަލެކްސެންޑާ ސެފެރިންގެ ހާއްސަ އެވޯޑެއް ދޭން ވަނީ ހަމަޖެހިފައެވެ.
ރޮނާލްޑޯ އަކީ މިހާތަނަށް ޗެމްޕިއަންސް ލީގުގެ ތާރީޚުގައި އެންމެ ގިނަ ލަނޑުޖަހައިދީފައިވާ ކުޅުންތެރިޔާވެސް މެއެވެ. އޭނާ ވަނީ އެ މުބާރާތުގައި ކުޅުނު 183 މެޗުގައި 140 ލަނޑުޖަހައިފައެވެ. މިއީ އޭނާގެ އެންމެ ބޮޑު ވާދަވެރި، އާޖެންޓީނާގެ ކެޕްޓަން، ލިއޮނަލް މެސީ ގޯލްޖަހާފައިވާ އަދަދަށްވުރެ 11 ލަނޑުގެ އިތުރުވުމެކެވެ. އަދި، މި ދެ ކުޅުންތެރިންވެސް މިވަގުތު ޔޫރަޕުން ބޭރުގެ ލީގުތަކުގައި ކުޅެމުން އަންނައިރު މި ލިސްޓުގައި ތިންވަނައިގައި އުޅޭ މިހާރު ބާސެލޯނާ އަށް ކުޅެމުން އަންނަ ރޮބަޓް ލެވަންޑޯސްކީ ޖަހާފައިވަނީ 94 ލަނޑެވެ.
ކުޅުންތެރިއެއްގެ ގޮތުގައި ކްލަބު ފުޓްބޯޅައިގައި ގިނަ ކާމިޔާބީތަކެއް ހޯދާފައިވާ ރޮނާލްޑޯ ބުނަނީ، ކުޅުން ހުއްޓާލުމަށްފަހު މެނޭޖަރަކަށް ވުމުގެ ހިޔާލާއި ވިސްނުން އޭނާގެ ސިކުނޑިއަށް އައިސްފައިނުވާ ކަމަށެވެ.
ޕޯޗުގަލް އަށް ދެން އެންމެ އަވަހަށް އޮތީ އަންނަ މަހުގެ 5 ވަނަ ދުވަހު އަމިއްލަ ދަނޑުގައި ކްރޮއޭޝިއާ އާ ބައްދަލުކުރާ މެޗެވެ. އޭގެ ތިން ދުވަސް ފަހުން، ސްކޮޓްލެންޑާ ދެކޮޅަށް ކުޅުމަށްފަހު ޖެހިގެން އަންނަ އޮކްޓޫބަރު މަހުގެ 12 ވަނަ ދުވަހު ރަށުން ބޭރުގައި ނިކުންނާނީ ޕޮލެންޑާ ދެކޮޅަށެވެ. އަދި، އެއަށްފަހު އޮކްޓޫބަރު މަހުގެ 15 ވަނަ ދުވަހު އަނެއްކާވެސް ބައްދަލުކުރާނީ ސްކޮޓްލެންޑާ އެވެ.