ރެއާލް ސޮސިއެޑާޑަށް ކުޅެމުން އައި ސްޕެއިނުގެ މިޑްފީލްޑަރު މިކޭލް މެރީނޯ، އިނގިރޭސި ކުލަބު އާސެނަލަށް ސޮއިކޮށްފިއެވެ.
އުމުރުން 28 އަހަރުގެ މެރީނޯ އާސެނަލަށް ބަދަލުވީ ގާތްގަނޑަކަށް 31.6 މިލިއަން ޕައުންޑްގެ ޓްރާންސްފާ ފީ އަކަށެވެ.
ފަހުގެ މީޑިއާ ޚަބަރުތައް ބުނާގޮތުން، މެރީނޯގެ ސޮއި ހޯދުމަށް ސޮސިއެޑާޑަށް، އާސެނަލުން އެންމެ ފުރަތަމަ 27.4 މިލިއަން ޕައުންޑް ދިނުމަށްފަހު، ބޯނަހުގެ ގޮތުގައި އިތުރު 4.2 މިލިއަން ޕައުންޑް ދޭން ވަނީ އެއްބަސްވެފައެވެ.
އެންމެ ފަހުގެ ޔޫރޯ ފުޓްބޯޅަ މުބާރާތުގައި މޮޅު ކުޅުމެއްދެއްކި މެރީނޯ، އާސެނަލަށް ބަދަލުވީ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އަދި މި އެއްބަސްވުމުގެ ދަށުން، އިތުރު އެއްއަހަރަށް ކޮންޓްރެކްޓް އައު ކުރުމުގެ އިހްތިޔާރު އެ ކްލަބަށް ލިބިގެންވެއެވެ.
އޮސަސޫނާ އިން ކެރިއަރު ފެށި މެރީނޯ ވަނީ ޖަރުމަނުގެ ބޮރޫޝިއާ ޑޯޓްމަންޑްގެ އިތުރުން ނިއުކާސަލް ޔުނައިޓެޑަށް ކުޅެފައެވެ. އޭނާ، ސޮސިއެޑާޑާ ގުޅުނީ 2018 ވަނަ އަހަރުގައެވެ. މިހާތަނަށްއައިއިރު އެ ކްލަބަށް ވަނީ 242 މެޗު ކުޅެދީ، 27 ލަނޑާއެކު އިތުރު 30 ގޯލްޖެހުމަށް އެހީތެރިވެދީފައެވެ.
މެރީނޯ ވަނީ ސްޕެއިނުގެ ގައުމީ ޓީމަށް މިހާތަނަށް 28 މެޗު ކުޅެ، ދެ ލަނޑުޖަހައިފައެވެ. އޭނާ ވަނީ އެންމެ ފަހުގެ ޔޫރޯ ކާމިޔާބުކުރިއިރު ސްޕެއިނުން ކުޅުނު ހުރިހާ މެޗެއްގައިވެސް ބައިވެރިވެފައެވެ. އޭގެތެރެއިން، ކުއާޓާ ފައިނަލްގައި ޖަރުމަނު ކޮޅަށް އިތުރުވަގުތުގައި އޭނާ ވަނީ ލަނޑުޖަހައިފައެވެ.
މެރީނޯ އަކީ މި ފަހަރުގެ ޓްރާންސްފާ ބާޒާރުގައި އާސެނަލުން ގެނައި ތިންވަނަ ކުޅުންތެރިޔާ އެވެ. މީގެކުރީން، އާސެނަލުން ވަނީ ނިމިދިޔަ ސީޒަނުގައި ބްރެންޓްފޯޑުން ލޯން އެއްބަސްވުމެއްގެ ދަށުން އެ ޓީމަށް ކުޅުނު ސްޕެއިނުގެ ގޯލްކީޕަރު، ޑޭވިޑް ރާޔާގެ އިތުރުން ޔޫރޯގައި ވިދާލި އިޓަލީގެ ޑިފެންޑަރު، ރިކާޑޯ ކަލަފިއޯރީ ގެނެސްފައެވެ.