ދުވަހަކު ސަރުކާރަކުން ޤައުމެއް ހަލާކުނުކޮށްލާވަރަށް މިދިޔަ ސަރުކާރުން ޤައުމު ހަލާކުކޮށްލި: ރައީސް
ދުވަހަކު ސަރުކާރަކުން ޤައުމެއް ހަލާކުނުކޮށްލާވަރަށް މިދިޔަ ސަރުކާރުން ޤައުމު ހަލާކުކޮށްލި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ސަރުކާރު ހިއްސާވާ މައި ޕާޓީ، ޕީއެންސީން ބޭއްވި ހަރުގެ ޖަލްސާގައި ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ކުރީ ސަރުކާރުގެ ވާކަތައް މި ސަރުކާރުން ދައްކަނީ މި ސަރުކާރަށް ކަމެއް ނުކުރެވޭތީ ނޫންކަމަށެވެ. ނަމަވެސް ރާއްޖޭގައި ދުވަހަކު އިސްލާމް ދީނާއި މުޖުތަމައު އަދި އިގްތިސާދު ހަލާކުނުރާވަރަށް ކުރީ ސަރުކާރުން ހަލާކުކޮށްލާފައިވާ ކަމަށާއި އެވާހަކަތައް ތާއަބަދު ދެކެވޭނެ ކަމަށް ރައީސް ވިދާޅުވިއެވެ.
"އެވާހަކަ މުގައްރިރުގައިވެސް ލިޔާނ، އެވާހަކަ ލެކްޗަރ ހޯލްތަކުގައިވެސް ދައްކާނެ. ފޮތްތައްވެސް ލިޔާނެ. އެކި ތަންތަނުގައި މައުރަޒުތައްވެސް ހަދާފައި ބަހައްޓާނެ. އެކި ތަންތަނުގައި ތާ އަބަދަށް ދައްކާނެ ވާހަކައެއް، އެހެންވީމަ އެވާހަކައިން ސަލާމަތެއް ނުވެވޭނެ،" ރައީސް ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ އެމަނިކުފާނަށް މުހިންމީ އަމާނާތްތެރިކަމާއި ތެދުވެރިކަމާއެކު ރައްޔިތުންނަށް ޚިދުމަތް ކުރުމަށް ކަމަށެވެ. އެގޮތުން، މާތް ﷲ އާއި ރައްޔިތުން އެމަނިކުފާނާ ހަވާލުކޮށްފައިވާ ޒިންމާ އަދާކުރެވެނީ ތެދުވެރިކަމާއެކުގައިތޯ އަމިއްލަ ނަފްސުވެސް ޖަވާބުދާރީކުރައްވާ ކަމަށް ރައީސް ވިދާޅުވިއެވެ.
މިހާރު ކުރައްވަމުންގެންދަވާ މަސައްކަތްތަކުން ރައްޔިތުންނަށް ވެވަޑައިގެންފައިވާ ވަޢުދުތައް ފުއްދަވައިދެއްވާނެ ކަމުގެ ޔަގީންކަންދެއްވާކަންވެސް ރައީސުލްޖުމްހޫރިއްޔާ ވަނީ ތަކުރާރުކުރައްވާފައެވެ.