އައިސީސީ މެންސް ޓީ20 ވޯލްޑް ކަޕް އޭޝިއާ ކޮލިފައިން އޭގައި ވާދަކުރާ ރާއްޖޭގެ ގައުމީ ކްރިކެޓް ޓީމު މުބާރާތަށް ރަނގަޅަށް ތައްޔާރުވެފައިވާ ކަމަށާއި، އަމާޒަކީ ރަނގަޅު ނަތީޖާތަކެއް މުބާރާތުން ނެރުން ކަމަށް ޓީމުގެ ކެޕްޓަން ޔޫސުފް އަޒްޔާން ފަރުހަތު ބުނެފިއެވެ.
ރައުންޑް ރޮބިން އުސޫލުން އޭޝިއާގެ ހަ ގައުމަކާއެކު ކުރިއަށްދާ މި މުބާރާތް ފަށާނީ މި މަހުގެ 30 ވަނަ ދުވަހުގައެވެ. ޓީމު މެލޭޝިއާއަށް ގޮސްފައިވާއިރު މުބާރާތުގެ ކުރިން ތަމްރީނު މެޗުތަކެއް ގައުމީ ޓީމުން ކުޅުމަށް ވަނީ ހަމަޖެހިފައެވެ. މި މެޗުތަކަކީ މުބާރާތުގެ ކުރިން ޓީމަށް ތަޖުރިބާތަކެއް ހޯދައިދިނުމުގެ މަގުސަދުގައި ކުޅޭ މެޗުތަކެކެވެ.
ރާއްޖެއާއެކު މި މުބާރާތުގައި ވާދަކުރާ ގައުމުތަކަކީ ސިންގަޕޫރާއި ކުވޭތުގެ އިތުރުން ހޮންގް ކޮންގް، މިޔަންމާ، މޮންގޯލިއާ އަދި މުބާރާތް ބާއްވާ މެލޭޝިއާ އެވެ. ރާއްޖެ ކުޅޭ ފުރަތަމަ މެޗުގައި އޮގަސްޓު 30 ވަނަ ދުވަހު ބައްދަލުކުރާނީ މުބާރާތް ބާއްވާ މެލޭޝިއާ އާއެވެ. ދެވަނަ މެޗުގައި އޮގަސްޓު 31 ވަނަ ދުވަހު ސިންގަޕޫރާ ބައްދަލުކުރާއިރު، ތިންވަނަ މެޗުގައި ސެޕްޓެމްބަރު 2 ގައި ބައްދަލުކުރާނީ ކުވޭތާއެވެ.
ހަތަރުވަނަ މެޗުގައި ސެޕްޓެމްބަރު 3 ވަނަ ދުވަހު ހޮންގް ކޮންގް އާއި ބައްދަލުކުރާއިރު 5 ސެޕްޓެމްބަރުގައި ބައްދަލުކުރާނީ މިޔަންމާ އާއެވެ.
އަދި މި ބުރުގެ ފަހު މެޗުގައި މޮންގޯލިއާ އާއި ދެކޮޅަށް ކުޅޭނީ 6 ސެޕްޓެމްބަރުގައެވެ.
ފުރުމުގެ ކުރިން "ޕީއެސްއެމް ސްޕޯޓްސް" އާ ވާހަކަދައްކަމުން އަޒްޔާން ބުނީ ވިއްސާރައިގެ ސަބަބުން ސްކިލްއަށް ފޯކަސްކޮށްގެން ރަނގަޅަށް ފަރިތަނުކުރެވޭ ކަމަށާއި ނަމަވެސް އެހެން ފަހަރުތަކާ ބަލާއިރު މިފަހަރު މުބާރާތަށް ރަނގަޅަށް ތައްޔާރުވެވިފައިވާ ކަމަށެވެ.
ކޮލިފައިންގައި ވާދަކުރާ ގައުމީ ޓީމުގެ ކެޕްޓަނަކީ ޔޫސުފް އަޒްޔާނެވެ. ވައިސް ކެޕްޓަނަކީ އާދަމް ނާސިފް އުމަރެވެ. ޖުމްލަ 14 ކުޅުންތެރިންގެ ސްކޮޑެއް މި ކޮލިފައިންއަށް ފުރިއިރު، ޓީމުގެ ކޯޗަކީ ލަންކާގެ ޕަސިންދު ލިޔަނާރަޗި އެވެ. މެނޭޖަރަކީ އަލީ މުޙައްމަދު މަނިކެވެ.