ރެއާލް ސޮސިއެޑާޑަށް ކުޅެމުންއައި ސްޕެއިނުގެ މިޑްފީލްޑަރު، މިކޭލް މެރީނޯ ގަތުމަށް އާސެނަލުން އެ ކްލަބާއެކު އެއްބަސްވުމަކަށް އަތުވެއްޖެއެވެ.
މީޑިއާ ހަބަރުތައް ބުނާގޮތުން، އާސެނަލުން ވަނީ މެރީނޯގެ ސޮއި ހޯދުމަށް ސޮސިއެޑާޑަށް އެންމެ ފުރަތަމަ ގާތްގަނޑަކަށް 33.5 މިލިއަން ޔޫރޯ (28.4 މިލިއަން ޕައުންޑް) އާއި ބޯނަހުގެ ގޮތުގައި އިތުރު 5 މިލިއަން ޔޫރޯ ދޭން އެއްބަސްވެފައެވެ.
މެރީނޯ، 28، ވަރަށް އަވަހަށް އާސެނަލްގެ މެޑިކަލް ފުރިހަމަކުރުމަށްފަހު، ހަތަރު އަހަރު ދުވަހުގެ ކޮންޓްރެކްޓެއްގައި ސޮއިކުރާނެ ކަމަށާއި، މި އެއްބަސްވުމުގެ ދަށުން އިތުރު އެއްއަހަރަށް ކޮންޓްރެކްޓް އާކުރުމުގެ ފުރުޞަތު އެ ކްލަބަށް ލިބިގެންވާ ކަމަށް ވެސް ހަބަރުތައް ބުނެއެވެ.
އެންމެ ފަހުގެ ޔޫރޯ ފުޓްބޯޅަ މުބާރާތުގެ ޗެމްޕިއަން، ސްޕެއިން ޓީމުން ވިދާލި މެރީނޯ އަކީ މިފަހަރުގެ ހޫނު މޫސުމުގެ ޓްރާންސްފާ ބާޒާރުގައި އާސެނަލުން ގެންނަން އެންމެ ބޭނުންވި މިޑްފީލްޑަރެވެ. މިހާތަނަށްއައިއިރު ސޮސިއެޑާޑްގެ ފަރިތަކުރުންތަކުގައި ބައިވެރިވަމުންއައި ނަމަވެސް އާސެނަލް އާއެކު މަޝްވަރާތައް ކުރިއަށްދާތީވެ، ސްޕެނިޝް ލީގުގައި އެ ޓީމު ކުޅުނު ފުރަތަމަ މެޗުގެ ސްކޮޑަށް މެރީނޯ ނުނަގައެވެ.
އޮސަސޫނާ އިން ކެރިއަރު ފެށި މެރީނޯ ވަނީ ޖަރުމަނުގެ ބޮރޫޝިއާ ޑޯޓްމަންޑްގެ އިތުރުން ނިއުކާސަލް ޔުނައިޓެޑަށް ކުޅެފައެވެ. އޭނާ، ސޮސިއެޑާޑާ ގުޅުނީ 2018 ވަނަ އަހަރުގައެވެ. މިހާތަނަށްއައިއިރު އެ ކްލަބަށް ވަނީ 242 މެޗު ކުޅެދީ، 27 ލަނޑާއެކު އިތުރު 30 ގޯލްޖެހުމަށް އެހީތެރިވެދީފައެވެ.
މެރީނޯ ވަނީ ސްޕެއިނުގެ ގައުމީ ޓީމަށް މިހާތަނަށް 28 މެޗު ކުޅެ، ދެ ލަނޑުޖަހައިފައެވެ. އޭނާ ވަނީ އެންމެ ފަހުގެ ޔޫރޯ ކާމިޔާބުކުރިއިރު ސްޕެއިނުން ކުޅުނު ހުރިހާ މެޗެއްގައިވެސް ބައިވެރިވެފައެވެ.
މި ޓްރާންސްފާގެ އެންމެހަ ކަންކަމެއް ފުރިހަމަވެއްޖެނަމަ، މެރީނޯ ވެގެންދާނީ އާސެނަލަށް މި ފަހަރުގެ ޓްރާންސްފާ ބާޒާރުގައި ސޮއިކުރާ ތިންވަނަ ކުޅުންތެރިޔާ އަށެވެ. މީގެކުރީން، އާސެނަލުން ވަނީ ނިމިދިޔަ ސީޒަނުގައި ބްރެންޓްފޯޑުން ލޯން އެއްބަސްވުމެއްގެ ދަށުން އެ ޓީމަށް ކުޅުނު ސްޕެއިނުގެ ގޯލްކީޕަރު، ޑޭވިޑް ރާޔާގެ އިތުރުން ޔޫރޯގައި ވިދާލި އިޓަލީގެ ޑިފެންޑަރު، ރިކާޑޯ ކަލަފިއޯރީ ގެނެސްފައެވެ.