ރައްކާތެރި ނޫންގޮތުގައި ކާބޯތަކެތި ތައްޔާރުކުރާކަމުގެ ތުހުމަތުގައި އަނެއްކާވެސް ބިދޭސީންތަކެއް އަތުލައިގަނެފި

ރައްކާތެރިނޫން ގޮތުގައި ކާބޯތަކެތި ތައްޔާރުކުރާކަމުގެ ތުހުމަތުގައި ބިދޭސީންގެ 26 މީހަކު މޯލްޑިވްސް އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.

މޯލްޑިވްސް އިމިގްރޭޝަނުން ވިދާޅުވީ މި 26 މީހުން އެ އިދާރާގެ ބެލުމުގެ ދަށަށް ގެނެސްފައިވަނީ ވިޔަފާރީގެ އުސޫލުން ފުޅާ ދާއިރާއެއްގައި އެކި ކަހަލަ ކާބޯތަކެތި ތައްޔާރުކުރަމުންދާކަމަށް "އިމިގްރޭޝަން ވޮޗް" އަށް ލިބުނު މައުލޫމާތަކާއި ގުޅިގެން މިމަހުގެ 19 ވަނަ ދުވަހު ފުލުހުންނާއެކު ކުރިއަށްގެންދިޔަ 2 އޮޕަރޭޝަންގައިކަމަށެވެ.

އިމިގްރޭޝަނުން ވިދާޅުވީ މީގެތެރެއިން ފުރަތަމަ އޮޕަރޭޝަންގައި މ.ތްރީ މޫން ބަލައި ފާސްކޮށް، އެތަނުގައި ގަވާއިދާ ހިލާފަށް މަސައްކަތްކުރަމުންދިޔަ 10 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށެވެ.

އިމިގްރޭޝަނުން އާއްމުކޮށްފައިވާ މައުލޫމާތުތަކަށް ބަލާއިރު ސާފުތާހިރުކަމެއް ނެތް ތަނެއްގައި އެ ބިދޭސީން ދިޔައީ "މޯލްޑިވްސް ސުޕަ ކުއަލިޓީ"ގެ ނަމުގައި ލުއިކާނާގެ ބައެއް ބާވަތްތައް ތައްޔާރުކޮށް ބަންދުކުރަމުންނެވެ. އޭގެތެރޭގައި ގުޅަ، ބަޖިޔާ، ހިކިމިރުސް، ރިހާކުރު ޗިޕްސް އަދި ތެލުލި ފަތްފަދަ ލުއިކާނާގެ ބާވަތްތައް ހިމެނެއެވެ.

ގަވާއިދާ ހިލާފަށް އުޅޭ ބިދޭސީން ފުޅާދާއިރާއެއްގައި ވިޔަފާރިއަށް އެކި ކަހަލަ ކާބޯތަކެތި ތައްޔާރުކުރަމުންދާ ކަމަށް "އިމިގްރޭޝަން ވޮޗް" އަށް ލިބުނު މައުލޫމާތާ ގުޅިގެން @PoliceMv އާއެކު މިދިއަ ހޯމަ ދުވަހު (19 އޮގަސްޓު 2024) ވަނީ ހާއްސަ ރެއިޑެއް ކުރިއަށް ގެންގޮސްފައި. މި ރެއިޑުގައި… pic.twitter.com/V1PRp5u9U4

— Maldives Immigration (@ImmigrationMV) August 22, 2024

އިމިގްރޭޝަނުން ކުރިއަށްގެންދިޔަ ދެވަނަ އޮޕަރޭޝަންގައި ބަލާ ފާސްކޮށްފައިވަނީ ގ. މޫން ލައިޓްގައެެވެ. އަދި އެތަނުގެ 1 ވަނަ ފަންގިފިލާގައި ވިޔަފާރިއަށް ކާބޯތަކެތި ތައްޔާރުކޮށް، ބިދޭސީންނަށް ހާއްސަކޮށްގެން ކެފޭގެ ޚިދުމަތްދެމުންދިޔަ ކަމަށާއި އެތަނުގެ ދެވަނަ ފަންގިފިލާގައި ބިދޭސީންގެ އެކަމަޑޭޝަން ބްލޮކް ތަކެއް ހަދައި، ކުއްޔަށް ދޫކޮށްފައިވާކަންވެސް އިމިގްރޭޝަނުން ފާހަގަކުރެއްވިއެވެ. މި އޮޕަރޭޝަންގައި ގަވާއިދާ ހިލާފަށް އުޅެމުންދިޔަ 16 ބިދޭސީއަކު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.

ގަވާއިދާ ހިލާފަށް ރާއްޖޭގައި މަސައްކަތް ކުރަމުންދާ ބިދޭސީންނާ ގުޅޭގޮތުން "އިމިގްރޭޝަން ވޮޗް" އަށް ލިބުނު މައުލޫމާތާ ގުޅިގެން @PoliceMv އާއެކު މިދިއަ ހޯމަ ދުވަހު (19 އޮގަސްޓު 2024) ހިންގުނު ރެއިޑުގައި، ގ. މޫން ލައިޓް ވަނީ ބަލައި ފާސްކޮށްފައި. މިތަނުގެ 1 ވަނަ ފަންގިފިލާގައި… pic.twitter.com/rwTA2Yeinr

— Maldives Immigration (@ImmigrationMV) August 22, 2024

ރާއްޖޭގައި ޤަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެރެއިން، ސާފުތާހިރުކަން ކުޑަކޮށް ކާބޯތަކެތި ތައްޔާރުކޮށް ވިއްކާކަމުގެ ތުހުމަތުގައި ގިނަ ޢަދަދެއްގެ ބިދޭސީން ދަނީ އަތުލައިގަންނަމުންނެވެ.