ހެލިކޮޕްޓަރުގެ ޚިދުމަތް ދިނުމަށް ބައިނަލްއަޤްވާމީ 36 ފަރާތަކުން ޝަޢުޤުވެރިކަންފާޅުކޮށްފި

ރާއްޖޭގައި ހެލިކޮޓަރުގެ ޚިދުމަތް ދިނުމަށް ބައިނަލްއަޤްވާމީ 36 ފަރާތަކުން ޝައުގުވެރިކަން ފާޅުކޮށް އެ ފުރުޞަތަށް އެދިފައިވާކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. ވަޒީރު މިހެން ވިދާޅުވީ، ދަތުރުފަތުރުގެ ސިޔާސަތުތަކައި ގުޅޭގޮތުން ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.

ރާއްޖޭގައި ހެލިކޮޕްޓަރުގެ ޚިދުމަތްދޭނެ ބަޔަކު ހޯދަން ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން އިޢުލާންކުރީ މިމަހުގެ 6ވަނަ ދުވަހުއެވެ. އަދި އެ މުއްދަތު ހަމަވީ މިމަހުގެ 19 ވަނަ ދުވަހުއެވެ.

ހެލިކޮޕްޓަރުގެ ޚިދުމަތް ފެށުމާ ގުޅޭގޮތުން ޕީއެސްއެމް ނިއުސްގެގެ ރާއްޖެމިއަދު ޕްރޮގްރާމްގައި ވާހަކަފުޅު ދައްކަވަމުން ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވީ ހެލިކޮޕްޓަރުގެ ޚިދުމަތް ދިނުމަށް ނިންމާފައިވަނީ، އިނގިރޭސިވިލާތުގެ ވަރުގަދަ ރެގިއުލޭޓަރީ ބޮޑީއެއްކަމަށްވާ، ޔޫކޭ ސިވިލް އޭވިއޭޝަންގެ އެހީގައި ހަދާފައިވާ ޓެކްނިކަލް އެސެސްމަންޓްތަކަކަށް ފަހުގައިކަމަށެވެ.

ވަޒީރު ވިދާޅުވީ މި ޚިދުމަތް ދިނުމަށް ހަދާފައިވާ އުސޫލުގައި ކޮންމެ ހެލިކޮޕްޓަރެއްވެސް ޚިދުމަތް ދިނުމަށް ހުއްދަ ދޭނީ، ސަރުކާރުގެ ބޭނުންތަކަށް ސިއްޙީ ކުއްލި ޙާލަތްތަކަށް އަދި ހާދިސާތަކުގެ ޙާލަތުގައި ސަރޗް އެންޑް ރެސްކިއުގައި އެހީތެރިކަން ފޯރުކޮށްދޭން ޖެހޭނެގޮތަށްކަމަށެވެ. އެއްބަސްވުން ޤާއިމުކުރުމުގައިވެސް މިކަންކަން ހިމަނާނެކަމަށް ވަޒީރު ވިދާޅުވިއެވެ.

"މީހުން ހޯދަން ގެޒެޓްކުރީމަ 36 ފަރާތުން ކުރިމަތިލި. ދުނިޔޭގެ އެންމެ ވަރުގަދަ ކުންފުނިތަކުން ކުރިމަތިލި. މިހާރު ކުރިއަށްދަނީ ޚިދުމަތްދޭނެ ފަރާތްތައް ހޮވުމަށް ކުރަންޖެހޭ މަސައްކަތްތައް. ޝެޑިއުލާ އެއްގޮތަށް ކުރިއަށްދާނެ." ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ވަޒީރު ވިދާޅުވީ ޚިދުމަތް ދޭން ފަށާނީ ރާއްޖޭގައި ވައިގެ ޚިދުމަތް ދިނުމުގެ ލައިސަންސާ ސެޓްފިކެޓް އެ ކުންފުނިތަކަށް ލިބުމުންކަމަށެވެ. މި މަސައްކަތް ކުރިއަށްދާނީ 3 މަރުހަލާއަކަށް ބަހާލައިގެންކަން ފާހަގަކުރައްވާ ވަޒީރު ވިދާޅުވީ ޚިދުމަތް ދޭނެ ފަރާތްތައް ކަނޑައެޅުމުގެ މަރުހަލާއަށް ދެމަސް ދުވަސް ހޭދަވާނެކަމަށެވެ. އޭގެފަހުގައި އެ ވުޒާރާއާއެކު ޚާއްސަ އެއްބަސްވުމެއް އެކުލަވާލާނެކަމަށްވެސް ދަތުރުފަތުރާބެހޭ ވަޒީރު ވިދާޅުވިއެވެ.

އަމީން ވިދާޅުވީ ކެބިނެޓްގައި މަޝްވަރާކުރުމަށްފަހު ނިންމާފައިވަނީ، ހެލިކޮޕްޓަރުގެ ޚިދުމަތް ދިނުމަށް 10 އަހަރު ދުވަހުގެ ހުއްދައެއް ދޫކުރަންކަމަށެވެ.

"10 އަހަރުގެ އެކްސްކްލޫސިވް ރައިޓްސް ދޭން ކެބިނެޓުން ނިންމީ، ކޮންމެ ސަރުކާރެއް އޮތަސް މެޑިކަލް އިވަކުއޭޝަން އަދި ސަރޗް އެންޑް ރެސްކިއުއަށް ޚިދުމަތް ދޭންޖެހޭގޮތަށް. އެމީހުންގެ ޚިދުމަތުން ވަކި ގަޑިއިރެއް ސަރުކާރުގެ މިފަދަ މަސައްކަތްތަކަށް ދޭންޖެހޭނެއޭ. އެ ފަރާތްތަކުގެ ބިޒްނަސް މޮޑެލް ކަނޑައަޅާނީ އެބަޔަކު އަމިއްލައަށް." ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ވަޒީރު ވިދާޅުވީ ހުއްދަ ދޭ ކުންފުނިތައް ކަނޑައެޅުމަށްފަހު، އެ ފަރާތްތަކަށް ރާއްޖޭގައި އުދުހުމުގެ ހުއްދަ ދޭނީ "އެއަރ އޮޕަރޭޓަރ ސެޓްފިކެޓް" ދީގެންކަމަށެވެ. މި މަސައްކަތަށް 6-8 މަސް ހޭދަވާނެކަމަށް ވަޒީރު ވަނީ ވިދާޅުވެފައެވެ. އަމީން ވިދާޅުވީ ސަރުކާރުގެ ޢަމާޒަކީ ކުރިއަށް އޮތް 10 މަސް ތެރޭގައި ރާއްޖޭގައި ހެލިކޮޕްޓަރުގެ ޚިދުމަތް ފެށުންކަމަށެވެ.

1990 އަހަރުތަކުގެ ކުރީކޮޅުން ފެށިގެން 1999 ވަނަ އަހަރާއި ހަމައަށް ރާއްޖޭގައި ދިޔައީ ހެލިކޮޕްޓަރުގެ ޚިދުމަތް ފޯރުކޮށްދެމުންނެވެ. ހަމިންބާޑުގެ ނަމުގައި އޭރު އޮޕަރޭޓްކުރަމުންދިޔަ ހެލިކޮޕްޓަރުގެ ޚިދުމަތް ހުއްޓާލީ އޭރު ދިމާވި ހިތާމަވެރި ހާދިސާތަކެއްގެ ސަބަބުންނެެވެ.