ތިއާގޯ މޮޓާގެ އިރުޝާދުގެ ދަށުން ލީގުގައި ޔުވެންޓަސް ކުޅުނު ފުރަތަމަ މެޗުގައި އަލަށް ޕްރޮމޯޓުވި ކޯމޯ އަތުން 3-0 އިން މޮޅުވެއްޖެއެވެ.
މިފަހަރުގެ ސީޒަނަށް ކޯމޯ ޕްރޮމޯޓުވެފައިމިވަނީ 21 އަހަރުގެ މެދުކެނޑުމަކަށްފަހު އެވެ. އެ ޓީމުން ވަނީ ނިމިދިޔަ ސީޒަނުގެ އިޓަލީގެ ދެވަނަ ޑިވިޝަނުގެ ރަނަރަޕް މަގާމު ހާސިލްކޮށްފައެވެ.
ޔުވެންޓަސްގެ އެލިއާންޒް ސްޓޭޑިއަމްގައި ކުޅުނު މި މެޗު ފެށިގެން ޑޮމިނޭޓްކުރިއިރު، 20 ވަނަ މިނެޓުގައި އެ ޓީމުގެ ސާބިއާ ފޯވާޑް، ޑުސަން ވްލަހޮވިޗް ވަނީ ލީޑްނަގައިދިނުމާ ގާތަށް ޖެހިލައިފައެވެ. ޕެނަލްޓީއޭރިޔާ ތެރެއިން ވްލަހޮވިޗް ބޮލުން ފޮނުވާލި ބޯޅަ ދަނޑިކައިރިން ދިޔައީ ބޭރަށެވެ. އޭގެ ތިން މިނެޓުފަހުން، ޔުވެންޓަސް އިން ލީޑްނެގީ ޒުވާން ފޯވާޑް، ސެމުއެލް އެމްބަންގުލާ ކާމިޔާބުކުރި ގޯލުންނެވެ. މިއީ އޭނާގެ ފަރާތުން ފެނިގެންދިޔަ ސޯލޯ ގޯލެކެވެ. މި ގޯލާއެކު އޭނާ ވަނީ އިޓަލިއަން ލީގުގައި ލަނޑުޖެހި ބެލްޖިއަމްގެ އެންމެ ހަގު ކުޅުންތެރިޔާގެ އިތުރުން މިހާތަނަށް ލަނޑުޖެހި އެ ގައުމަށް ނިސްބަތްވާ ހަމައެކަނި ކުޅުންތެރިޔާގެ ޝަރަފު ހޯދާފައެވެ.
ފުރަތަމަ ހާފުގެ އިތުރުވަގުތުގެ ތެރޭގައި ޔުވެންޓަސްގެ ދެވަނަ ލަނޑުޖަހައިދިނީ ޓިމޮތީ ވެއާ އެވެ. އޭނާ މި ލަނޑުޖެހީ އެ ޓީމުގެ ތުރުކީ ފޯވާޑް، ކެނާން ޔިލްޑީޒް ނަގައިދިން ހުރަހަކުންނެވެ. މި ގޯލާއެކު ފުރަތަމަ ހާފު އެ ޓީމުން ނިންމާލީ 2-0 އިން ކުރީގަ އޮވެގެންނެވެ.
މެޗުގެ ދެވަނަ ހާފުގެ ކުރީކޮޅު، ޔުވެންޓަސްގެ ފޯވާޑް، ވްލަހޮވިޗް ގޯލެއް ކާމިޔާބުކޮށްދިންނަމަވެސް އޮފްސައިޑްކަމަށް ނިންމައި، ރެފްރީ އެ ލަނޑު ބަލައިނުގަތެވެ. އެކަމަކު، މެޗު ނިމެންދަނިކޮށް އަންދްރެއާ ކަމްބިއާސޯ ވަނީ ޔުވެންޓަސްގެ ތިންވަނަ ލަނޑުޖަހައިދީ، ފަސޭހަ މޮޅެއް ހޯދައިދީފައެވެ.
މިއީ ކުރީން، އާސެނަލް އާއި ބާސެލޯނާ އަދި ޗެލްސީ އަށް ކުޅެފައިވާ ސްޕެއިނުގެ ކުރީގެ މިޑްފީލްޑަރު، ސެސްކް ފަބްރެގާސްގެ ކޯޗުކަމުގައި ކޯމޯ ކުޅުނު ފުރަތަމަ މެޗެވެ. އެ ޓީމުން މުޅި މެޗުގައި ވެސް ބޯޅަ ހިފެހެއްޓުމުގައި ޔުވެންޓަސްއާ ކައިރިން ވާދަކުރިއިރު، ލަނޑުޖަހާނެ ފުރުޞަތުތައް ތަނަވަސްކުރުމުގައި ފެނިގެންދިޔައީ ވަރަށް ދަށްކޮށެވެ.
މި މުބާރާތުގައި ރޭ ކުޅުނު އަނެއް މެޗުގައި އެޓަލާންޓާ ވަނީ 4-0 ގެ ނަތީޖާއަކުން ލެއްޗޭ ބަލިކޮށްފައެވެ. މި މެޗުގައި އެ ޓީމުގެ މާކޯ ބްރެޝިއާނީނީ އާއި މަޓެއޯ ރެޓެގީ ކުރެން ކޮންމެ ކުޅުންތެރިއަކު ދެލަނޑުޖެހިއެވެ.