ތައިލެންޑުގެ ބެންކޮކާއި ޗޮންބުރީގައި ބޭއްވުމަށް ހަމަޖެހިފައިވާ ހަ ވަނަ އޭޝިއަން އިންޑޯ އަދި މާޝަލް އާޓްސް ގޭމްސް ކެންސަލްކޮށްފިއެވެ.
ރާއްޖެއިން ވެސް ބައިވެރިވާ މި ގޭމްސް މިއަހަރު ބޭއްވުމަށް ހަމަޖެހިފައި ވަނީ މި އަހަރުގެ ނޮވެމްބަރު 21 އިން 30ގެ ނިޔަލަށް ތައިލެންޑްގައެވެ. ގޭމްސް ކެންސަލްކުރަން ނިންމި އެންމެ ބޮޑު ސަބަބަކީ ގޭމްސް ބާއްވަން ކަންކަން ފުރިހަމަކުރަން ދިން މުއްދަތުގައި އެކަން ކުރެވިފައި ނުވާތީއެވެ. އެގޮތަށް ނިންމާފައިވަނީ، އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ އެގްޒެކްޓިވް ކޮމިޓީން ބޭއްވި ކުއްލި ބައްދަލުވުމަކަށްފަހު އެެވެ.
މޯލްޑިވްސް އޮލިމްޕިކް ކޮމިޓީން ބުނީ ގޭމްސް ފެށެން މިހާ ކައިރިވެފައި އޮތް މުއްދަތެއްގައި އޯސީއޭގެ މި ނިންމުން އައުމާ އެކު، އެތުލީޓުންނާއި ސަޕޯޓަރުންނަށް މިކަމުގެ ސަބަބުން މާޔޫސްކަމެއް އަތުވެދާނެކަން ގަބޫލުކުރެވޭ ކަމަށެވެ. އެކަމަކު މި ލެވަލްގެ މުބާރާތެއްގެ ހައިބަތާއި ފެންވަރު ހިފެހެއްޓުމަށްޓަކައި އޯސީއޭއިން މިފަދަ ނިންމުމެއް ނިންމުމުން އޮލިމްޕިކް ކޮމިޓީން ވަނީ އެކަމަށް މަރުހަބާ ކިޔާފައެވެ.
މި ގޭމްސް ބޭއްވުމުގެ ފުރުސަތު ދެން ދީފައިވަނީ ސައުދީ އަރަބިއްޔާއަށެވެ. އެ ގޮތުން، ސައުދީގެ ރިޔާދުގައި ބާއްވަން ނިންމި އައިމެގް އޮންނާނެ ތާރީހެއް ކުރިއަށްއޮތް ދުވަސްތަކުގައި އިއުލާނުކުރެވިގެންދާނެ ކަމަށް އޮލިމްޕިކް ކޮމިޓީން ރޭ ނެރުނު ބަޔާނުގައި ބުނެފައިވެއެވެ. އަންނަ އަހަރު އިސްލާމިކް ސޮލިޑާރިޓީ ގޭމްސް (އައިއެސްޖީ) ވެސް ބާއްވަން ނިންމާފައި އޮތީ ރިޔާދުގަ އެވެ
އެންމެފަހުން 2017 ވަނަ އަހަރު ތުރުކުމެނިސްތާނުގައި ބޭއްވި މުބާރާތުގައި ރާއްޖެއިން ފަސް ކުޅިވަރަކުން 37 އެތްލީޓުން ވާދަކޮށްފައިވެއެވެ. ރާއްޖެއިން ވާދަކުރި ފަސް ކުޅިވަރަކީ ފުޓްސަލް، ބިލިއާޑް، ސްވިމިން، ޗެސް އަދި އިންޑޯ އެތުލެޓިކްސް އެވެ.