އިޚުލާސްތެރިކަމާއެކު މަސައްކަތް ކޮށްފި ކަމަށްވާނަމަ ކުޅިވަރުގައި އުޅެމުންވެސް ކިޔެވޭނެ ކަމަށް ރާއްޖޭގެ ޖޫނިއާ ގައުމީ ޓީމުގެ ކެޕްޓަން ޞައްޔިދު ޞަލާހުއްދީން ބުނެފިއެވެ.
އޯ ލެވެލްގެ ގަދަ 10 ގެ ހަވަނަ މަގާމު ހާސިލުކޮށް، ރާޅާއެޅުންތެރިންޔާ ޞައްޔިދު ވަނީ ނަމޫނާ ދައްކާފައެވެ. މީގެކުރިން ރާޅާއެޅުންތެރިން އެންމެ ބޮޑަށް ފާހަގަކުރެވިފައި އޮންނަކީ ކިޔެވުމާއި ދުރު ބަޔަކު ކުޅޭ ކުޅިވަރެއްގެ ގޮތުގައެވެ. ނަމަވެސް ރާއްޖޭގެ ރާޅާއެޅުންތެރިން އައު ޖީލެއް އުފެދެމުން އަންނައިރު، އޭގެ ތެރޭގައި ޞައްޔިދު ހިމެނުން ވެފައިވަނީ ގިނަ ބަޔަކު މި ކުޅިވަރާމެދު ދެކޭގޮތް ބަދަލުވި ކަމަކަށެވެ.
އޯ ލެވެލް ނަތީޖާތައް ދައްކާގޮތުން އިސްކަންދަރު ސްކޫލުގައި ކިޔެވި ޞައްޔިދު، އޯ ލެވެލްގެ ގަދަ 10 ގެ ހަވަނަ ހޯދާފައިވަނީ އޭ ފާސްތަކުންނެވެ. ޞައްޔިދު ވަނީ އޯ ލެވެލްއިން ހަތަރު އޭ ސްޓާ، ތިން އޭ އަދި ބީ ފާހެއް ހޯދާފައެވެ. މީގެ ތެރޭގައި އިސްލާމް މާއްދާއިން އޭނާ އޭ ހޯދާފައިވެއެވެ. އަދި ގިނަ މާއްދާތަކުގެ ނަތީޖާ ވަރަށް ރަނގަޅެވެ.
އޭޝިއަން ސާފިން ޗެމްޕިއަންޝިޕުގެ ޖޫނިއާ ބައިގައި ވާދަކުރަމުން އަންނަ ޞައްޔިދު ބުނީ ބުރަ މަސައްކަތާއެކު، އެ ނަތީޖާ ލިބުނީމަ ވަރަށް އުފާވި ކަމަށެވެ. އަދި ކުޅިވަރުގައި އުޅެމުންވެސް ކިޔެވޭނީ އިޚުލާސްތެރިކަމާއެކު މަސައްކަތް ކޮށްގެން ކަމަށްވެސް ވަނީ ބުނެފައެވެ.
"މިސާލަކަށް ޓޫ އަވާސް (ދެގަޑިއިރު) ހެނދުނު ގަޑީގައި، ދެން އެ ސްޕޯޓަަކަށް ޓްރައި ކޮށްފައި، އެއަށްފަހު ރޭގަނޑު އިންނާނެ ޓިއުޝަންއާ އެއްޗެހިވެސް، އެޑެޕްޓުކޮށްގެން މަސައްކަތްކޮށްގެން ވާނެ." ޞައްޔިދު ބުންޏެވެ.
ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕުގެ ޖޫނިއާ ބައިގައި ޞައްޔިދު ވާދަކުރަމުން އަންނައިރު، ހޯމަ ދުވަހު އޭނާ ވަނީ މި ބައިގެ ފުރަތަމަ ބުރުގެ ހީޓު ތިނެއް ކާމިޔާބުކޮށް، ތިންވަނަ ބުރުގެ ޖާގައެއް ހޯދާފައެވެ. މި ފަހަރުގެ މުބާރާތުގައި ޞައްޔިދުގެ ފެށުން ރަނގަޅުވެގެން ދިޔައިރު، ރަނގަޅު ކާމިޔާބީއެއް މުބާރާތުން ލިބޭނެ ކަމަށް ޞައްޔިދު އުއްމީދުކުރެއެވެ.