އޭޝިއަން ސާފިން ޗެމްޕިއަންޝިޕް: ހޫދަށް ހީޓުގެ އެއްވަނަ، ޖޫނިއަރ ހުރިހާ އެތުލީޓުން ތިންވަނަ ބުރަށް

ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގައި މިއަދު ކުރިއަށްދިޔަ އޯޕަން ބައިގެ ފުރަތަމަ ބުރުގެ ހީޓުގެ އެއްވަނަ ރާއްޖޭގެ ސީނިއާ ޓީމުގައި ހިމެނޭ ހޫދު އަޙްމަދު ހޯދިއިރު، ޖޫނިއަރ ބައިގައި ވާދަކުރި ރާއްޖޭގެ ހުރިހާ އެތުލީޓުން ތިންވަނަ ބުރުން ފުރުސަތު ހޯދައިފިއެވެ.

އޯޕަން ބައިގެ ފުރަތަމަ ބުރުގެ ހީޓު 12 ގައި ހޫދު ވާދަކުރިއިރު، އޭނާ މި ހީޓު ކާމިޔާބުކުރީ 9.16 ގެ ސްކޯ އަކާއެކުއެވެ. އެއާއެކު ހޫދު ވަނީ އޯޕަން ބައިގެ ތިންވަނަ ބުރުން ފުރުސަތު ހޯދާފައެވެ.

އޯޕަން ބައިގެ ހީޓު 13 ގައި ރާއްޖޭގެ ބީ ޓީމުގެ ހަސަން ނާސިހު ވާދަކުރިއިރު، އޭނާ ދިޔައީ މި ހީޓުގެ ތިންވަނައަށެވެ. އެގޮތުން ނާސިހަށް ސްކޯ ކުރެވުނީ 5.97 އެވެ. އަދި މި ނަތީޖާއާއެކު ނާސިހު ވަނީ ދެވަނަ ބުރުގެ ޖާގައެއް ހޯދާފައެވެ.

މި މުބާރާތުގެ ޖޫނިއާ ބައިގެ ފުރަތަމަ ބުރުގެ ހީޓުތައްވެސް މިއަދު ކުރިއަށްދިޔައިރު، ރާއްޖޭގެ ހުރިހާ އެތުލީޓުން ވަނީ ތިންވަނަ ބުރުން ފުރުސަތު ހޯދާފައެވެ.

އެގޮތުން ހީޓު ތިނެއްގައި ރާއްޖޭގެ ޖޫނިއާ ގައުމީ ޓީމުގައި ހިމެނޭ ސައްޔިދު ސަލާހުއްދީނާއި، ބީ ޓީމުގައި ހިމެނޭ ކަޔާން އަރީފް ވާދަކުރިއިރު، މި ހީޓުގެ އެއްވަނަ ހޯދީ ސައްޔިދެވެ. އެގޮތުން އޭނާ ވަނީ 6.43 ގެ ސްކޯއެއް ހޯދާފައެވެ. އަދި ދެވަނައަށް ދިޔަ ކަޔާން ވަނީ 6.23 ސްކޯ ކޮށްފައެވެ.

މި ބައިގެ ހީޓު ހަތަރެއްގައި ރާއްޖޭގެ ޖޫނިއާ ގައުމީ ޓީމުގައި ހިމެނޭ ކަޔާން ޒަކީ އާއި، ބީ ޓީމުގައި ހިމެނޭ މުޙައްމަދު އިނާން ވާދަކުރިއިރު، ކަޔާން ވަނީ މި ހީޓުގެ އެއްވަނަ ހޯދާފައެވެ. އެގޮތުން މި ހީޓުގައި ކަޔާން 9.20 ސްކޯ ކުރިއިރު، ދެވަނައަށް ދިޔަ އިނާން ވަނީ 9.10 ސްކޯ ކޮށްފައެވެ.

ޖޫނިއާ ބައިގެ ފުރަތަމަ ބުރުގެ ހީޓު ފަހެއްގައި ވާދަކުރި ރާއްޖޭގެ ޖޫނިއާ ގައުމީ ޓީމުގެ ޔާސިން އަޙްމަދު ނާޝިދު، މި ހީޓުގެ އެއްވަނަ ހޯދާފައިވަނީ 9.17 ގެ ސްކޯ އަކާއެކުއެވެ.

މި ފަހަރުގެ މުބާރާތުގައި 20 ގައުމަކުން 100 އަށްވުރެ ގިނަ އެތުލީޓުން ބައިވެރިވެފައިވާއިރު، އޭގެ ތެރޭގައި ރާއްޖޭގެ ދެ ޓީމުވެސް ހިމެނެއެވެ. ރާއްޖޭގެ ދެވަނަ ޓީމަަަށް ނަން ދެވިފައިވަނީ، ތުލުސްދޫ ޓީމުގެ ނަމުންނެވެ. ރާއްޖޭގެ ސާފިން މެންސް އޭ ޓީމާއި ޖޫނިއާ އޭ ޓީމު ވާދަކުރަނީ 2026 ވަނަ އަހަރުގެ އޭޝިއަން ގޭމްސް ކޮލިފައިން ބުރުގައެވެ.