ރިސޯޓް ލީގު 2024 ގެ ސައުތު މާލޭ ޒޯނުގެ ސެމީ ފައިނަލުގެ މެޗުތައް ކާމިޔާބުކޮށް ސަން ސިޔާމް އޮޅުވެއްޔާއި ވޮލްޑޯފް އެސްޓޯރިއާ އިތާފުށި ފައިނަލަށް ދަތުރުކޮށްފިއެވެ.
މުބާރާތުގެ ފައިނަލަށް ވޮލްޑޯފް އެސްޓޯރިއާ ދަތުރުކޮށްފައިވަނީ އެންމެ ފަހުގެ ޗެމްޕިއަން ކްރޮސްރޯޑްސް މޯލްޑިވްސް ކަޓުވާލުމަށްފަހު އެވެ. ސެމީ ފައިނަލުގެ މެޗުތައް މީގެކުރިން ތާވަލު ކުރެވިފައިވަނީ މި މަހުގެ 13 ވަނަ ދުވަހަ ށެވެ. ނަމަވެސް، ރާއްޖެއަށް މިހާރު ކުރަމުންދާ ބޯ ވިއްސާރައާ ގުޅިގެން، މެޗުތައް ވަނީ ފަސްކޮށްފަ އެވެ. މޫސުން ތަން ދިނުމާއެކު، ސެމީ ފައިނަލް މެޗުތައް ކުޅެފައިވަނީ އާދީއްތަ ދުވަހު އެވެ.
މުބާރާތުގެ ސެމީ އަށް ވޮލްޑޯފް ދަތުރުކުރީ، ކުއާޓާގައި ފަހަތުން އަރައި ސޯ މޯލްޑިވްސް ބަލިކުރުމަށްފަހު އެވެ. އަދި ކްރޮސްރޯޑްސް ސެމީ އަށް ދަތުރުކުރީ ކުއާޓާގައި އޯޒެން ލައިފް މާދޫ ބަލިކުރުމަށްފަހު އެވެ. ސެމީ ފައިނަލުގައި ވޮލްޑޯފުން ކްރޮސްރޯޑްސްގެ މައްޗަށް ކުރިހޯދީ 3-2 ގެ ނަތީޖާއަކުންނެވެ.
ވާދަވެރި ކުޅުމެއް ފެނިގެން ދިޔަ މި މެޗު ފެށިގެން ހަތަރުވަނަ މިނެޓުގައި ކްރޮސްރޯޑްސްގެ ކެޕްޓަން، ހަސަން ލައުހު އަތުން ވަނީ ބައިކޮޅަށް ލަނޑެއް ވަދެފަ އެވެ. ކްރޮސްރޯޑްސް އިން ވަނީ ކުޅުން ރަނގަޅުކޮށް، ނަތީޖާ ހަމަހަމަ ކޮށްފަ އެވެ. މެޗުގެ 10 ވަނަ މިނެޓުގައި އެ ޓީމަށް ލަނޑު ޖަހައިދިނީ ނޫހު އިބްރާހިމް އެވެ. ފުރަތަމަ ހާފު ނިމުނީ 1-1 ގެ ނަތީޖާއަކުން ދެ ޓީމު އެއްވަރު ވެގެނެވެ.
ދެވަނަ ހާފު ފެށިގެން، މެޗުގެ 31 ވަނަ މިނެޓުގައި އިބްރާހިމް ރަފާހު ވަނީ ލަނޑެއް ޖަހައި، އަނެއްކާވެސް ވޮލްޑޯފަށް ލީޑު ނަގައިދީފަ އެވެ. އަދި އޭގެ ހަ މިނެޓު ފަހުން ރަފާހު ވަނީ އިތުރު ލަނޑެއް ޖަހައި، ވޮލްޑޯފަށް ލީޑު ފުޅާކޮށްދީފަ އެވެ.
ކްރޮސްރޯޑްސް އިން ފަހުވަގުތާ ހަމަޔަށް މަސައްކަތް ކުރީ ނަތީޖާ އެއްވަރު ކުރުމަ ށެވެ. އެގޮތުން، މެޗުގެ ފަހު މިނެޓުގައި ލައުހު ވަނީ ލަނޑެއް ޖަހައި، ފަރަގު ކުޑަކޮށްފަ އެވެ. ނަމަވެސް، މެޗު ނިމުމުގެ ކުރިން އެ ޓީމަށް އިތުރު ލަނޑެއް ޖެހޭގޮތެއް ނުވިއެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ވޮލްޑޯފަށް ދެ ލަނޑު ޖަހައިދިން ރަފާހު އެވެ.
ސަން ސިޔާމް އޮޅުވެލި ފައިނަލަށް ދަތުރުކޮށްފައިވަނީ ޕެނަލްޓީ ޖަހައިގެން ވެލައްސަރު މޯލްޑިވްސް ބަލިކޮށްގެންނެވެ. އޮޅުވެލި ސެމީ އަށް ދަތުރުކުރީ ކުއާޓާގައި ސައި ލެގޫން މޯލްޑިވްސް ބަލިކުރުމަށްފަހު އެވެ. އަދި ވެލައްސަރުން ވަނީ ކުއާޓާގައި ކަނޑޫމާގެ މައްޗަށް ކުރިހޯދާފަ އެވެ. ސެމީ ފައިނަލް މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 3-3 ގެ ނަތީޖާއަކުން އެއްވަރު ވެފައެވެ. ޕެނަލްޓީގައި އޮޅުވެލިން ކުރިހޯދީ 6-4 ގެ ނަތީޖާއަކުންނެވެ.
މެޗު ފެށިގެން ތިންވަނަ މިނެޓުގައި އާދަމް މަމްދޫން ވަނީ ލަނޑެއް ޖަހައި އޮޅުވެއްޔަށް ކުރިހޯދަދީފަ އެވެ. އަދި ހާފު ނިމެން ތިން މިނެޓަށް ވެފައިވަނިކޮށް، އޮޅުވެލިގެ ކެޕްޓަން، އަބްދުﷲ ސިނާން ވަނީ ލަނޑެއް ޖަހައި އެ ޓީމަށް ލީޑު ފުޅާކޮށްދީފަ އެވެ. އޮޅުވެލިން ފުރަތަމަ ހާފު ނިންމާލީ ދެ ލަނޑުގެ ފަރަގަކާއެކު އެވެ.
ދެވަނަ ހާފު ފެށިގެން ތިންވަނަ މިނެޓުގައި މަމްދޫން ވަނީ އޭނާގެ ދެވަނަ ލަނޑު ޖަހައި، އޮޅުވެއްޔަށް ތިން ލަނޑުގެ ލީޑެއް ނަގައިދީފަ އެވެ.
ތިން ލަނޑުގެ ފަރަގަކުން ބަލިކޮށް އޮތް ނަމަވެސް، ވެލައްސަރުން ވަނީ ހިތްވަރު ކޮށްފަ އެވެ. އެ ޓީމުން ނަތީޖާ ހަމަހަމަ ކުރީ ފަހަތުން އަރައި ތިން ލަނޑު ޖަހައިގެނެވެ. އެގޮތުން، އޮޅުވެލިން ތިންވަނަ ލަނޑު ޖެހިތާ މިނެޓެއް ނުވަނީސް އަހުމަދު ޝައިން ހާމިދު ވަނީ ލަނޑެއް ޖަހައި ވެލައްސަރަށް އުއްމީދެއް ހޯދަދީފަ އެވެ.
މެޗުގެ 32 ވަނަ މިނެޓުގައި ވެލައްސަރުގެ އަލީ އިމްރާން މުހައްމަދު ލަނޑެއް ޖަހާފައިވާއިރު، މެޗު ނިމެން ތިން މިނެޓަށް ވެފައިވަނިކޮށް މުހައްމަދު ތަހުސީން ވަނީ ލަނޑެއް ޖަހައި، އެ ޓީމަށް ނަތީޖާ ހަމަހަމަ ކޮށްދީފަ އެވެ. މިއާއެކު ނަތީޖާ ނެރެފައިވަނީ ޕެނަލްޓީ ޖަހައިގެނެވެ.
ޕެނަލްޓީގައި އޮޅުވެލިން ވަނީ ޖެހި ފަސް ޕެނަލްޓީގެ ތެރެއިން ތިން ޕެނަލްޓީ ކާމިޔާބުކޮށްފަ އެވެ. އެ ޓީމުގެ ޕެނަލްޓީތައް ކާމިޔާބުކުރީ ސިނާން އާއި މުހައްމަދު ހަފީޒުގެ އިތުރުން މުހައްމަދު ވިގާމް އެވެ. އަހުމަދު މުސާދު އާއި ހަސަން ސުހެއިލް ޖެހި ޕެނަލްޓީ، ވެލައްސަރުގެ ކީޕަރު އަހުމަދު ވިއާމް ވަނީ ދިފާއުކޮށްފަ އެވެ.
ވެލައްސަރުން ޖެހި ހަތަރު ޕެނަލްޓީގެ ތެރެއިން ކާމިޔާބުވީ ހަމައެކަނި ހުސައިން އަސްލަމް ޖެހި ޕެނަލްޓީއެވެ. އެ ޓީމުގެ އަހުމަދު ފައިޒާން އާއި އިމްރާންގެ އިތުރުން ތަހުސީން ޖެހި ޕެނަލްޓީ އޮޅުވެލިގެ ކީޕަރު އަހުމަދު ޝަރަފް ވަނީ ދިފާއުކޮށްފަ އެވެ. މިއާއެކު، މެޗުގެ މޮޅު ކުޅުންތެރިޔަކަށް ހޮވިފައިވަނީވެސް ޝަރަފް އެވެ.
މުބާރާތުގެ ފައިނަލް މެޗުގައި އޮޅުވެލި ބައްދަލުކުރާނީ ވޮލްޑޯފް އެސްޓޯރިއާ އާއެވެ. މި މެޗު ކުޅުމަށް ހަމަޖެހިފައިވަނީ އަންގާރަ ދުވަހު ހަވީރު އެވެ.