އިޓާލިއަން ސެރިއޭގެ އައު ސީޒަނުގައި ރޭ ކުޅުނު ފުރަތަމަ މެޗުތަކުން އެންމެ ފަހުގެ ޗެމްޕިއަން، އިންޓަ މިލާނާއި، ވާދަވެރި އޭސީ މިލާނަށް ވެސް މޮޅެއްނުލިބި ނިންމާލަންޖެހިއްޖެއެވެ.
ރަށުން ބޭރުގައި ޖެނޯއާ އާ 2-2 އިން އިންޓަ އެއްވަރުވިއިރު، އަމިއްލަ ދަނޑުގައި މިލާނުން ވަނީ ހަމަ އެނަތީޖާ އިން ޓޮރީނޯއާ އެއްވަރުވެފައެވެ.
ޖެނޯއާގެ ދަނޑުގައި ރޭ ކުޅުނު މެޗުގައި ކުރީން ލީޑްނެގީ ވެސް އެ ޓީމުންނެވެ. މެޗު ފެށިގެން 20 ވަނަ މިނެޓުގައި މި ލަނޑު އެ ޓީމަށް ޖަހައިދިނީ އަލެސަންދްރޯ ވޮގްލިއާޗޯ އެވެ. އޭގެ ދިހަ މިނެޓުފަހުން، ނިކޮލޯ ބަރެއްލާ ދިން ބޯޅައަކުން އިންޓަގެ ފްރާންސް ފޯވާޑް، މާކަސް ތުރާމް ވަނީ އެ ޓީމަށް އެއްވަރުކޮށްދީފައެވެ. ފުރަތަމަ ހާފު ނިމުނީ މި ނަތީޖާގައި އޮވެގެންނެވެ.
މި މެޗުގައި ފުރަތަމަ ފަހަރަށް އިންޓަ އިން ލީޑްނެގީ، 82 ވަނަ މިނެޓުގައި ޑެވިޑޭ ފްރަޓޭސީ ދިން ބޯޅައަކުން ތުރާމް ވައްދާލި ލަނޑުންނެވެ. މި ނަތީޖާގައި އޮވެ، މެޗު ނިމެން ދަނިކޮށް އިތުރުވަގުތުގެ ތެރޭގައި ޖެނޯއާ އަށް މި މެޗުން ޕޮއިންޓެއް ހޯދައިދިނީ ޖޫނިއާ މެސިއާސް އެވެ. މިއީ ޕެނަލްޓީއޭރިޔާ ތެރެއިން އިންޓަގެ ޑިފެންޑަރު، ޔަން ބިސެކްގެ އަތުގައި ޖެހުމުން ލިބުނު ޕެނަލްޓީއެއް ޖެނޯއާގެ މެސިއާސް ފޮނުވާލުމުން އިންޓަގެ ކީޕަރު، ޔެން ސޮމާ މަތަކުރުމުން ދެވަނަ ފަހަރަށް އެ ބޯޅަ ގޯލްގެ ތެރެއަށް ފޮނުވާލައިގެން މެސިއާސް ކާމިޔާބުކުރި ގޯލެކެވެ.
ރޭ ކުޅުނު އަނެއް މެޗުގައި އައު ކޯޗު، ޕައުލޯ ފޮންސޭކާގެ މިލާނުން ބަލިނުވެ ސަލާމަތްވީ، ފަހުވަގުތު އަލްވާރޯ މޮރާޓާ އާއި ނޮއާ އޮކަފޯ ކާމިޔާބުކުރި ލަނޑުތަކުންނެވެ. މި މެޗުގެ ފުރަތަމަ ހާފުގައި މިލާންގެ ކީޕަރު، މައިކް މައިގްނޯން ވަނީ ޖެނޯއާގެ ގިނަ ހަމަލާތަކެއް ހުއްޓުވައިފައެވެ. މި ހާފުގެ 30 ވަނަ މިނެޓުގައި ޓޮރީނޯ އިން ލީޑްނެގީ މިލާންގެ ޑިފެންޑަރު، މަލިކް ތިއާއޯ އަތުން ބައިކޮޅަށް ވަތް ގޯލަކުންނެވެ. މި ގޯލާއެކު ޓޮރީނޯ އިން ފުރަތަމަ ހާފު ނިންމާލީ 1-0 އިން ކުރީގަ އޮވެގެންނެވެ.
މެޗުގެ 68 ވަނަ މިނެޓުގައި ޑުވަން ޒަޕާޓާގެ ގޯލުން ޓޮރީނޯގެ ލީޑް ފުޅާކޮށްދީފައިވަނިކޮށް، މިލާނުން ވަނީ މެޗު ނިމެން މިނެޓަކަށްވެފައިވަނިކޮށް މޮރާޓާގެ ލަނޑުން ފަރަގު ކުޑަކޮށްފައެވެ. އަދި އޭގެފަހުން، މެޗުގެ އިތުރުވަގުތުގެ ފަސްވަނަ މިނެޓުގައި ވޮލީއަކުން އޮކަފޯ ވަނީ މިލާނަށް މުހިއްމު ޕޮއިންޓެއް ހޯދައިދީފައެވެ.
މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، އެމްޕޯލީއާ މޮންޒާ ވަނީ ލަނޑެއްނުޖެހި އެއްވަރުވެފައެވެ. ޕާމާގެ ދަނޑުގައި 1-1 އިން ފިއޮރެންޓީނާއާ ވަނީ އެއްވަރުވެފައެވެ. މި މެޗުގެ ފުރަތަމަ ހާފުގައި ޕާމާ އަށް ލީޑްނަގައިދިނީ ޑެނިސް މަން އެވެ. ފަހު ހާފުގައި ފިއޮރެންޓީނާ އަށް އެއްވަރުކޮށްދިނީ ސީދާ ހިލޭޖެހުމަކުން ކްރިސްޓިއަން ބިރާގީ ކާމިޔާބުކުރި ގޯލުންނެވެ.