ފްރާންސްގައި ބާއްވާ އޮލިމްޕިކްސްގެ ޕެރަ ގޭމްސްގައި ރާއްޖެ ތަމްސީލުކުރާނެ ދެ ދުވުންތެރިން ކަމަށްވާ ފާތިމަތު އިބްރާހިމާއި (ފާތުން) އާއި އަބްދުއްރައްޒާގަށް ޖާރޒީ ހަވާލުކޮށްފިއެވެ.
ޕެރަލިމްޕިކް ގޭމްސްގައި ވާދަކުރުމުގެ ފުރުސަތު މި ދެ ދުވުންތެރިންނަށް ލިބުނީ ރާއްޖޭގެ ރޭންކިންގެ އެންމެ ކުރީގައި އޮތް ދެ ދުވުންތެރިންނަށް ވާތީއެވެ. މި ދެ ދުވުންތެރިން ވަނީ ދާދިފަހުން ބޭއްވި އިންޑިއަން އޯޝަން އައިލެންޑު ގޭމްސްގައި ރާއްޖެ ތަމްސީލުކޮށްފައެވެ. މި ދެ އެތުލީޓުންނަށް ޖާރޒީ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ.
އޮލިމްޕިކްސްގެ ޕެރަ ކަޓަގަރީ ނުވަތަ ޕެރަލިމްޕިކްސްއަކީ ނުކުޅެދޭ މީހުންނަށް ހާއްސަކޮށް، ދުނިޔޭގެ އޮލިމްޕިކް ކައުންސިލުން ބާއްވާ ގޭމްސްއެކެވެ. ކޮންމެ އަހަރަކު ވެސް އޮލިމްޕިކްސްއަށް ފަހު ޕެރަ ގޭމްސް އޮލިމްޕިކްސް ބޭއްވި ގައުމުގައި ބާއްވައެވެ. މިފަހަރު ޕެރަލިމްޕިކްސް ވެސް އޮންނާނީ ފްރާންސްގެ ޕެރިހުގައެވެ.
ޖަޕާނުގައި 2021 ގައި ބޭއްވި ޕެރަލިމްޕިކްސް ގައިވެސް ފާތުން ވަނީ ރާއްޖެ ތަމްސީލުކޮށްފައެވެ. މިއީ ރާއްޖޭގެ އެތުލީޓުން އެންމެ ފުރަތަމަ ވާދަކުރި ޕެރަލިމްޕިކްސް ގޭމްސް އެވެ. އެފަހަރު ދުވުމުގެ އިވެންޓްގައި ވާދަކޮށް ފާތުން ވަނީ ރޭސް ނިންމާފައެވެ. އެއާއެކު އޭނާ އަކީ ޕެރަލިމްޕިކް ގޭމްސްއެއްގައި ރޭހެއް ނިންމި ރާއްޖޭގެ ފުރަތަމަ އެތުލީޓަށް ވެފައެވެ. މީގެއިތުރުން މަޑަގަސްކަރާގައި އެންމެ ފަހުން ބޭއްވި އިންޑިއަން އޯޝަން އައިލެންޑް ގޭމްސްގައި ފާތުން ވަނީ ރާއްޖެއަށް ބްރޮންޒް މެޑަލް ހޯދައިދީފައެވެ.
ރައްޒާގު އެންމެ ފުރަތަމަ ބައިނަލްއަގްވާމީ މުބާރާތެއްގައި ވާދަކޮށްފައިވަނީ މިދިޔަ އަހަރުގެ އިންޑިއަން އޯޝަން އައިލެންޑް ގޭމްސްގައެވެ. އޭނާ ވަނީ މި މުބާރާތުން ބްރޮންޒް މެޑަލް ހޯދާފައެވެ.
ގޭމްސްއަށް ތައްޔާރުވުމުގެ ގޮތުން ރައްޒާގު އާއި އޭނާގެ ކޯޗިން ޓީމު ތިބީ ހުޅުމާލޭގައި ކޭމްޕްކޮށްގެންނެވެ. މި ދެ ދުވުންތެރިން ފްރާންސަށް ފުރުމަށް ހަމަޖެހިފައިވަނީ އަންނަ އަންގާރަ ދުވަހުއެވެ.