އިނގިރޭސި ޕްރިމިއަރ ލީގުގެ އައު ސީޒަނުގައި ކުޅުނު ފުރަތަމަ މެޗުތަކުން އާސެނަލް، ބްރައިޓަން، ނިއުކާސަލް އާއި އެސްޓަން ވިލާ މޮޅުވެއްޖެއެވެ.
އަމިއްލަ ދަނޑުގައި ވުލްވްސް އަތުން އާސެނަލް މޮޅުވީ 0-2 އިންނެވެ. ރަށުން ބޭރުގައި އެވަޓަން އަތުން 3-0 އިން ބްރައިޓަން މޮޅުވިއިރު، ނިއުކާސަލް ވަނީ އަމިއްލަ ދަނޑުގައި 1-0 އިން ސައުތެމްޓަން ބަލިކޮށްފައެވެ. ވިލާ އިން ވަނީ 2-1 އިން ވެސްޓް ހޭމް ޔުނައިޓެޑް އަތުން މޮޅުވެފައެވެ.
އާސެނަލްގެ އެމިރޭޓްސް ސްޓޭޑިއަމްގައި ރޭ ކުޅުނު މެޗުގައި އެ ޓީމުން ކާމިޔާބުކުރި ދެލަނޑުގެ ތެރެއިން ކޮންމެ ހާފެއްގައި ވަނީ ގޯލެއް ކާމިޔާބުކޮށްފައެވެ. މި މެޗުގެ 25 ވަނަ މިނެޓުގައި އާސެނަލުން ލީޑްނެގީ އެ ޓީމުގެ ޖަރުމަނު މިޑްފީލްޑަރު، ކައި ހަވާޓްޒް ކާމިޔާބުކުރި ގޯލުންނެވެ. ބުކާޔޯ ސަކާ ނަގައިދިން ހުރަހަކުން ހަވާޓްޒް މި ލަނޑުޖެހީ ބޮލުންނެވެ.
ފުރަތަމަ ހާފުގައި ވުލްވްސް އަށް އެއްވަރުކޮށްދޭން އެ ޓީމުގެ ފޯވާޑް، ޖޯގެން ސްޓްރާންޑް ލާސެން އަށް ލިބުނު ފުރުޞަތުގައި ޕެނަލްޓީއޭރިޔާ ތެރެއިން ބޮލުން ފޮނުވާލި ބޯޅަ އާސެނަލްގެ ގޯލްކީޕަރު، ޑޭވިޑް ރާޔާ ވަނީ ހުއްޓުވައިފައެވެ.
މެޗުގެ 74 ވަނަ މިނެޓުގައި އާސެނަލްގެ ދެވަނަ ލަނޑުޖަހައިދިނީ ސަކާ އެވެ. މި ލަނޑުޖެހުމަށް އެހީތެރިވެދިނީ ހަވާޓްޒް އެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު، އެވަޓަންގެ ދަނޑުގައި ބްރައިޓަން މޮޅުވި މެޗުގައި އެ ޓީމުން ކާމިޔާބުކުރި ލަނޑުތައް ޖަހައިދިނީ ކައޯރޫ މިޓޯމާ، ޑެނީ ވެލްބެކް އާއި ސިމޮން އަޑިންގްރާ އެވެ. މި މެޗުގެ ދެވަނަ ހާފުގެ ތެރޭގައި އެވަޓަންގެ އޭޝްލީ ޔަންގް އަށް ސީދާ ރަތެއް ދެއްކުމުން އެ ޓީމުން މެޗުގެ ބާކީބައި ކުޅުނީ އެއްކުޅުންތެރިއަކު މަދުކޮށެވެ.
ވެސްޓް ހޭމްއާ ދެކޮޅަށް ރަށުން ބޭރުގައި ރޭ ވިލާ ކުޅުނު މެޗުގައި ކުރީން ލީޑްނެގީވެސް އެ ޓީމުންނެވެ. މެޗުގެ ކުރީކޮޅު އެ ޓީމަށް މިލަނޑުޖަހައިދިނީ މި ފަހަރުގެ ސީޒަނަށް އަލަށް ގުޅުނު ބެލްޖިއަމްގެ މިޑްފީލްޑަރު، އަމަޑޫ އޮނާނާ އެވެ. އޭގެފަހުން، ފުރަތަމަ ހާފު ނިމެން އަށް މިނެޓަށްވެފައިވަނިކޮށް ލިބުނު ޕެނަލްޓީއަކުން ވެސްޓް ހޭމަށް އެއްވަރުކޮށްދިނީ ލޫކަސް ޕަކޭޓާ އެވެ.
މެޗު ނިމެން 11 މިނެޓަށްވެފައިވަނިކޮށް ވިލާ މޮޅުކޮށްދިން ލަނޑުޖަހައިދިނީ ޖޮން ޑުރާން އެވެ. އޭނާ މި ލަނޑުޖެހީ ޖޭކޮބް ރަމްސީ ދިން ބޯޅައަކުންނެވެ. މި ދެ ކުޅުންތެރިން ވެސް ކުޅެން ނިކުތީ ދެވަނަ ހާފުގެ ކުރީކޮޅު އެވެ.
މުޅި މެޗުގެ ބޮޑުބައި 10 ކުޅުންތެރިންނާއެކު ކުޅެމުންދިޔަ ނިއުކާސަލުން ސައުތުހެމްޓަނާ ދެކޮޅަށް ކާމިޔާބުކުރި ހަމައެކަނި ލަނޑު، ފުރަތަމަ ހާފުގެ އެންމެ ފަހު މިނެޓުގެ ތެރޭގައި ކާމިޔާބުކޮށްދިނީ އެ ޓީމުގެ ބްރެޒިލް މިޑްފީލްޑަރު، ޖޮއެލިންޓަން އެވެ. މި މެޗުގެ 28 ވަނަ މިނެޓުގައި ނިއުކާސަލްގެ ޑިފެންޑަރު، ފެބިއަން ޝާރ އަށް ސީދާ ރަތެއް ދެއްކީ ބޯޅަ ނެތީސް ސައުތެމްޓަންގެ ބެން ބްރެރެޓަން ޑިއާޒް އަށް ކުރި ފައުލަކާ ގުޅިގެންނެވެ.
ރޭ ކުޅުނު އަނެއް މެޗުގައި ނޮޓިންހަމް ފޮރެސްޓްގެ ދަނޑުގައި އެ ޓީމުން ވަނީ 1-1 އިން ބޯންމައުތުއާ އެއްވަރުވެފައެވެ. މި މެޗުގެ ފުރަތަމަ ހާފުގައި ފޮރެސްޓްގެ ފޯވާޑް، ކްރިސް ވުޑް ލީޑްނަގައިދީފައިވަނިކޮށް، ފަހު ހާފުގެ ކުޅުން ނިމެން ހަތަރުވަރަކަށް މިނެޓަށްވެފައިވަނިކޮށް ބޯންމައުތަށް އެއްވަރުކޮށްދިނީ އެންޓޮއިން ސެމެންޔޯ އެވެ.