އޭޝިއަން ސާފިން ޗެމްޕިއަންޝިޕް ރާއްޖެއަށް ޚާއްސަވާ އެންމެ ބޮޑު ސަބަބަކީ އޭޝިއަން ގޭމްސްއަށް ކޮލިފައިވުމުގެ ފުރުސަތު ދިވެހި ރާޅާއެޅުންތެރިންނަށް އޮތުން ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
މުބާރާތް ފެށުމުގެ ރަސްމިއްޔާތު ޝަރަފްވެރިކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިއު އެވެ. މީގެ އިތުރުން ކޮމިޝަނަރ އޮފް ސްޕޯޓްސް މުޙައްމަދު ޠަލާލް އާއި މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ރައީސް މުހައްމަދު އަބްދުއްސައްތާރު (ޗަމްޕީ) ވެސް ބައިވެރިވެވަޑައިގެންނެވި އެވެ.
އޭޝިއާ ބައްރުގެ 20 ގައުމަކުން 140 އަށްވުރެ ގިނަ އެތުލީޓުންނާއި އޮފިޝަލުން މި އަހަރުގެ މުބާރާތުގައި ބައިވެރިވެއެވެ. މި މަހުގެ 24 ގެ ނިޔަލަށް ކ. ތުލުސްދޫގައި ބާއްވާ މި މުބާރާތް ފެށުމުގެ ރަސްމިއްޔާތުގައި ކޮންމެ ގައުމެއް ވަކިިވަކިން ތައާރަފްކޮށްފައިވެއެވެ.ތުލުސްދޫގައި މުބާރާތް ރަސްމީކޮށް ފެށުމަށް ބޭއްވި ރަސްމިއްޔާތުގައި ވަޒީރު ވަނީ މިފަދަ މުބާރާތްތަކުގެ ސަބަބުން މުޅި ރާއްޖެއާއި އެތުލީޓުންނަށް ލިބިގެންދާނެ ފައިދާތަކާ ގުޅޭގޮތުން ވާހަކަދައްކަވާފައެވެ.
އެގޮތުން ވަޒީރު ވަނީ މި މުބާރާތަކީ މުޅި ރާއްޖެއަށް މުހިއްމު މުބާރާތެއްގެ ގޮތުގައި ސިފަކޮށްފައެވެ. އަދި މި މުބާރާތަކީ ރާއްޖޭގެ ސާފަރުން އޭޝިއަން ޗެމްޕިއަންޝިޕަށް ކޮލިފައިވެވެން އޮތް ފުރުސަތެއް ކަމަށާއި މިއީ މި މުބާރާތް ރާއްޖެއަށް ހާއްސަވާ އެއް ސަބަބު ކަމަށެވެ. އަދި ހޯމް އެޑްވާންޓޭޖަކީ ވެސް މި މުބާރާތުގައި ރާއްޖެއަށް ހާއްސަވާ އެއް ކަން ކަމަށްވެސް ވަޒީރު ފާހަގަކުރެއްވި އެވެ.
ވަޒީރު ވިދާޅުވީ އޭޝިއަން ގޭމްސްއަކުން ޕޯޑިއަމް ފިނިޝްއަކާ ހަމައަށްދާ ފުރަތަމަ ކުޅިވަރަކަށް ސާފިން ވާނެކަމަށް އުއްމީދުކުރައްވާ ކަމަށެވެ. އަދި ދިވެހި އެތުލީޓުންގެ ހުނަރު ހުރިކަންވެސް ވަޒީރު ވަނީ ފާހަގަކުރައްވާފައެވެ.
ރާއްޖޭގައި ބާއްވާ މި މުބާރާތާއެކު މުޅި ދުނިޔެއަށްވެސް، މިފަދަ މުބާރާތްތައް ބޭއްވުމުގެ ކެޕޭސިޓީ ރާއްޖޭގައި ހުރިކަން ފާހަގަވާނެ ކަމަށާއި އުއްމީދަކީ ބޮޑު އޯޑިއެންސަކަށް މި މުބާރާތް ފެނުން ކަމަށްވެސް ވަޒީރު ވިދާޅުވިއެވެ.
މިއީ އޭޝިއަން ސާފިން ޗެމްޕިއަންޝިޕް ރާއްޖޭގައި ބާއްވާ ދެވަނަ ފަހަރެވެ. މިދިޔަ އަހަރުވެސް މި މުބާރާތް ރާއްޖޭގައި ވަނީ ބާއްވާފައެވެ. އެފަހަރުވެސް މި މުބާރާތް ބާއްވާފައިވަނީ ތުލުސްދޫގައެވެ. މިދިޔަ އަހަރު ބައިވެރިވި އެތުލީޓުންނަށްވުރެ މި އަހަރު ބައިވެރިވާ އެތުލީޓުންގެ އަދަދު ވަނީ އިތުރުވެފައެވެ. މީގެ ތެރޭގައި ދުނިޔޭގެ ފެންވަރުގެ އެތުލީޓުން ހިމެނެއެވެ.