ނިޝާން ޢިއްޒުއްދީން ޢިއްޒަތުގެވެރިޔާ ދިވެހިރާއްޖޭގެ ކުޅިވަރު ކުރިއެރުވުމަށް ގިނަ ދުވަސްތަކެއްވަންދެން ވަރަށްޝައުގުވެރިކަމާއިއެކު މަސައްކަތްކުރެއްވި، އަދި ނޫސްވެރިކަމުގެ ދާއިރާއިންވެސް ފާހަގަކުރެވޭ މަސައްކަތްޕުޅުތަކެއް ކުރެއްވި މ.ފެންފިޔާޒްގެ މުޙައްމަދު ޒާހިރު ނަޞީރު އަވަހާރަވެއްޖެއެވެ.
ޢުމުރުން 87 އަހަރުގެ ޒާހިރު ނަޞީރު އަވަހަރާވީ އާލާސްކަންފުޅާ އުޅުއްވާތާ ގިނަ ދުވަސްތަކެއް ފަހުން ރޭފަތުހުގެ ވަގުތެއްގައެވެ. މަރްޙޫމްގެ ޖަނާޒާ އޮންނާނީ މިއަދުގެ ޢަސުރުނަމާދަށްފަހު މަސްޖިދުއްސުލްޠާން މުޙައްމަދު ތަކުރުފާނުލް އަޢުޒަމްގައެވެ. ކަށުކަމާކެމީގެ ކަންކަން ކުރިއަށްދާނީ އާސަހަރާގައެވެ.
ދައުލަތަށް ގިނަދުވަސްވަންތަކެއް ވަންދެން ޚިދުމަތް ކުރެއްވި ޒާހިރު ނަޞީރަކީ ކުޅިވަރުގެދާއިރާއިން އަގުހުރި ޚިދުމަތްތަކެއް ކުރެއްވި ބޭފުޅެކެވެ. ކުޅިވަރުގެ ދާއިރާއިން ގައުމީ ޚިދުމަތުގެ ހިތްވަރު ދިނުމުގެ އިނާމާއި ކުޅިވަރުގެ ދާއިރާއިން ގައުމީ ޚިދުމަތުގެ ޝަރަފުވެރިކަމުގެ އިނާމު ލިބިވަޑައިގެންފައިވެއެވެ.
ޒާހިރު ނަޞީރުވަނީ އަމިއްލަ ފުޅަށް ރާއްޖޭ ކުޅިވަރު ކުރިއެރުއްވުމަށް ގިނަ މަސައްކަތްތަކެއްވެސް ކުރައްވާފައެވެ. މިގޮތުން ރާއްޖޭގެ ކުޅުންތެރިން ބައިނަލް އަޤްވާމީ މުބާރާތްތަކުގައި ބައިވެރިކުރައްވާ، ދިވެހި ކުޅުންތެރިން ކުރިއެރުވުމަށް ގިނަމަސައްކަތްތަކެއް ކުރައްވާފައިވެއެވެ. އެންސީއޭ ނަމުގައި ކުޅިވަރުގެ އަމިއްލަ ޖަމްޢިއްޔާއެއް އުފައްދަވާ ހިންގަވާފައިވެއެވެ. މޯލްޑިވްސް އޮލިމްޕިކް ކޮމެޓީ އުފެދުނީންސުރެ 2008 ވަނަ އަހަރާއިހަމައަށް އެ ކޮމެޓީގެ ރައީސްކަމުގެ މަގާމު ޒާހިރު ފުރުއްވާފައިވެއެވެ.
ނޫސްވެރިކަމުގެ ދާއިރާއިން ދިގު މުއްދަތެއްގައި މުހިއްމު ޚިދުމަތްތަކެއް ކުރެއްވި، މޮޅު ލިޔުންތެރިއެއްގެ ގޮތުގައި ފާހަގަކުރެވުނު ޒާހިރު ނަސީރުވަނީ ނޫސްވެރިކަމަުގެ ދާއިރާއިން ރަން ގަލަން ލިބިވަޑައިގެންފައެވެ. އަދި ކުޅިވަރުގެ ދާއިރާއިން ޙާއްސަ ނޫހެއް ނެރުއްވާފައިވެސް ވެއެވެ.
ނޫސްވެރިކަމުގެ ދާއިރާއިން މޯލްޑިވްސް މީޑިޔާ ކައުންސިލުން މިއަހަރު ދެއްވި ނޫސްވެރިކަމުގެ ޝަޚުޞިއްޔަތު އެވޯޑްވެސް ލިބިވަޑައިގެންފައިވަނީ ޒާހިރު ނަސީރަށެވެ.