މިހާރު ސްޕެއިނުގެ ޖިރޯނާއަށް ކުޅެމުން އަންނަ ނެދަލެންޑްސްގެ ޑިފެންޑަރު ޑޭލީ ބްލިންޑް، ގައުމީ ޓީމަށް ކުޅުން ހުއްޓާލައިފިއެވެ.
ކުރީން، އަޔެކްސް އެމްސްޓެޑަމް އާއި މެންޗެސްޓާ ޔުނައިޓެޑްގެ އިތުރުން ބަޔާން މިއުނިކަށް ކުޅެފައިވާ އުމުރުން 34 އަހަރުގެ ބްލިންޑް ވަނީ މިހާތަނަށް ނެދަލެންޑްސް ގައުމީ ޓީމަށް 108 މެޗު ކުޅެދީފައެވެ.
ބްލިންޑް، ގައުމީ ޓީމަށް ކުޅުން ހުއްޓާލިކަން ހާމަކުރުމަށް ސޯޝަލް މީޑިއާގައި ކުރި ޕޯސްޓްގައިވަނީ، ނެދަލެންޑްސްގެ ކޯޗާއެކު ރަނގަޅު މަޝްވަރާތަކެއް ކުރުމަށްފަހު، ކްލަބަށާއި އަމިއްލަ އާއިލާ އަށް ވަގުތުދިނުމުގެ ގޮތުން ގައުމީ ޓީމަށް ކުޅުން ހުއްޓާލުމަށް ނިންމާފައިވާ ކަމަށެވެ.
"އޮރެންޖް ޖާޒީގައި 108 މެޗު ކުޅެލުމަށް ލިބުމަކީ ޝަރަފެއް. އަހަރެން ގަބޫލުކުރާ ގޮތުގައި ގައުމު ތަމްޞީލުކުރުމަކީ ކުޅުންތެރިއެއްގެ ހައިސިއްޔަތުން ހާސިލްކުރެވޭނެ އެންމެ ބޮޑު ލަނޑުދަނޑި. މިދިޔަ 11 ވަރަކަށް އަހަރު ތެރޭގައި އޮރެންޖް ޖާޒީގައި ކުޅެން ކުރެވެން އޮތް ހުރިހާ ކަމެއް ކޮށްފައިވާނީ. އޭގެ ސަބަބުން އަހަރެންނަށް ވަރަށް ގިނަ އެއްޗެހި ލިބި، ގިނަ ކަންތައްތަކެއް ހާސިލްކުރެވިއްޖެ." ބްލިންޑް އިތުރަށް ބުންޏެވެ.
2013 ވަނަ އަހަރު އިޓަލީއާ ދެކޮޅަށް ކުޅުނު މެޗެއްގައި ނެދަލެންޑްސްގެ ޖާޒީގައި އެންމެ ފުރަތަމަ ފެނިގެންދިޔަ ބްލިންޑް ވަނީ، ނިމިދިޔަ ޔޫރޯ ފުޓްބޯޅަ މުބާރާތުގައި ވާދަކުރި ނެދަލެންޑްސް ޓީމުގައި ހިމެނިފައެވެ. އެ ޓީމުން އެ މުބާރާތުގެ ސެމީ ފައިނަލަށް ދަތުރުކުރިއިރު، އޭނާ ވަނީ ގަދަ 16 ގެ ބުރުގައި ރުމޭނިއާ އާ ދެކޮޅަށް ކުޅުނު މެޗުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުމެފައެވެ. ބާކީ ހުރިހާ މެޗެއްގައި އޭނާ އިނީ ބެންޗުގައެވެ.
އެ މުބާރާތުގެ ސެމީގައި ކުޅުނު ނެދަލެންޑްސް ޓީމުގެ ރިޒާވް ކުޅުންތެރިއެއްގެ ގޮތުގައި އިންނަންޖެހުމުން އެކަމާ ގުޅޭގޮތުން ބްލިންޑް ބުނީ، އެއީ ކުރަން ފަސޭހަކަމެއް ނޫން ކަމަށެވެ. އެކަމަކުވެސް، ނެދަލެންޑްސް ޓީމާއެކު ޔޫރަޕިއަން ޗެމްޕިއަންޝިޕްގައި ބައިވެރިވުމަކީ ލިބުނު ބޮޑު ޝަރަފެއް ކަމަށް ބްލިންޑް ވަނީ ބުނެފައެވެ.