މެންޗެސްޓާ ޔުނައިޓެޑުގެ ކެޕްޓަން ބްރޫނޯ ފެނާންޑޭސް، އެ ޓީމާއެކު ހަދާފައިވާ އެއްބަސްވުން 2027 ވަނަ އަހަރުގެ ޖޫން މަހުގެ ނިޔަލަށް އައުކޮށްފިއެވެ.
އުމުރުން 29 އަހަރުގެ ފެނާންޑޭސް ޔުނައިޓެޑާއެކު ހަދާފައިވާ މި އެއްބަސްވުމުގެ ދަށުން އިތުރު އަހަރަކަށް މުއްދަތު އިތުރުކުރުމުގެ ފުރުޞަތު ލިބިގެންދާ ކަމަށް ވެސް އެ ކްލަބުން ވަނީ ހާމަކޮށްފައެވެ.
މީގެ ހަތަރު ވަރަކަށް އަހަރު ކުރީން، ޕޯޗުގަލްގެ ސްޕޯޓިންގ ލިޒްބަންއިން ޔުނައިޓެޑަށް ބަދަލުވެ ފެނާންޑޭސް ވަނީ މިހާތަނަށް އެ ޓީމަށް ކުޅެދިން 234 މެޗުގައި 79 ލަނޑުޖަހައި، އިތުރު 67 ގޯލްޖެހުމަށް އެހީތެރިވެދީފައެވެ.
ޔުނައިޓެޑްގެ އައު ކޮންޓްރެކްޓްގައި ސޮއިކުރުމަށްފަހު ނެރުނު ބަޔާނެއްގައި ފެނާންޑޭސް ވަނީ، ޔުނައިޓެޑާމެދު އޭނާގެ ހިތުގައި އޮތް ލޯބި އެންމެންނަށް އެނގޭނެ ކަމަށް ބުނެފައެވެ.
"މި ޖާޒީލުމުގެ ޒިންމާއާއި މުހިންމުކަން އަހަރެންނަށް އެނގޭ. އަދި މި ފާހަގަކޮށްލެވޭ މޮޅު ކުލަބު ތަމްސީލުކުރުމަށް ބޭނުންވާ ހިތްވަރާއި ފޯރިވެސް އެނގޭ." ފެނާންޑޭޒްގެ ބަޔާނުގައިވެއެވެ.
ފެނާންޑޭސް އިތުރަށް ބުނީ، ޔުނައިޓެޑްގެ ޖާޒީގައި އޭނާގެ އެންމެ މޮޅު ކުޅުމާއެކު އުފާވެރި ދުވަސްތަކެއް ކުރިއަށް އެބައޮތް ކަމަށް ގަބޫލުނުކުރާނަމަ ފަހުގެ އެއްބަސްވުމުގައި ސޮއިނުކުރާނެ ކަމަށެވެ.
އެންމެ ފަހުގެ އެމިރޭޓްސް އެފްއޭ ކަޕްގެ ޗެމްޕިއަން، ޔުނައިޓެޑުން އައު ސީޒަނުގެ ޕްރިމިއާ ލީގުގައި ކުޅޭ ފުރަތަމަ މެޗުގައި ހުކުރު ދުވަހުގެ ރޭ އަމިއްލަ ދަނޑުގައި ނިކުންނާނީ ފުލަމްއާ ދެކޮޅަށެވެ.