އިންގްލެންޑާއި މެންޗެސްޓާ ޔުނައިޓެޑުގެ ކުރީގެ ފޯވާޑް ވޭން ރޫނީގެ އިރުޝާދުގެ ދަށުން، ޕްލައިމައުތު އާގައިލްއިން ފުރަތަމަ މޮޅު ހާސިލުކޮށްފިއެވެ.
އީއެފްއެލް ކަޕްގެ ފުރަތަމަ ބުރުގައި އާގައިލްއިން ވަނީ 3-0 އިން ޗެލްޓެންހަމް ޓައުން ބަލިކޮށްފައެވެ.
މިއީ ރޫނީގެ ކޯޗުކަމުގައި އެ ޓީމު ކުޅުނު ދެވަނަ މެޗެވެ. އޭނާގެ އިރުޝާދުގެ ދަށުން އާގައިލް ކުޅުނު ފުރަތަމަ މެޗުގައި މިދިޔަ އާދީއްތަ ދުވަހު ވަނީ ޝެފީލްޑް ވެނިސްޑޭ އަތުން 0-4 އިން ބަލިވެފައެވެ.
އާގައިލްގެ އަމިއްލަ ދަނޑުކަމަށްވާ، ހޯމް ޕާކްގައި ރޭ ކުޅުނު މި މެޗުގެ ފުރަތަމަ ހާފުގައި އެ ޓީމުން ވަނީ ލަނޑުޖަހާނެ ރަނގަޅު ފުރުޞަތުތަކެއް ތަނަވަސްކޮށްފައެވެ. އެގޮތުން، އެ ޓީމުގެ ރަޔާން ހާޑީ އާއި ފްރެޑީ އިސާކާ ވަނީ ލީޑްނެގުމާ ގާތަށް ޖެހިލައިފައެވެ. މި ހާފު ނިމެންދަނިކޮށް، ޗެލްޓެންހަމްގެ އީތަން އާޗާ ފޮނުވާލި ބޯޅަ އަމާޒުވީ ގޯލްގެ ދަނޑިއަށެވެ.
އާގައިލް އިން ޖެހި ފުރަތަމަ ލަނޑު، 62 ވަނަ މިނެޓުގައި ކާމިޔާބުކޮށްދިނީ ބެން ވެއިން އެވެ. މިއީ އެ ޓީމުގެ އެޑަމް ރެންޑެލް ފޮނުވާލި ހިލޭޖެހުމެއް ގޯލްގެ ހުރަސްދަނޑީގައި ޖެހިފައި ނިކުތްވަގުތު ދެވަނަ ފަހަރަށް އެ ބޯޅަ ގޯލްގެތެރެއަށް ފޮނުވާލައިގެން ވެއިން ކާމިޔާބުކުރި ގޯލެކެވެ.
މި ގޯލަށްފަހު އާގައިލް ޑޮމިނޭޓްކުރިއިރު، ފަހު ހާފުގައި ކުޅެން ނިކުތް މުސްތަފާ ބުންޑޫ އާއި މޯގަން ވިޓޭކާ އަށް ލިބުނު ފުރުޞަތުތަކުގެ ބޭނުމެއްނުހިފުނެވެ. އެކަމަކު، މެޗު ނިމެން ނުވަ މިނެޓަށްވެފައިވަނިކޮށް އިބްރާހިމް ސިސޯކޯގެ ހުރަހަކުން ލިބުނު ބޯޅައަކުން ހާޑީ ވަނީ އާގައިލްގެ ދެވަނަ ލަނޑުޖަހައިދީފައެވެ. އޭގެ ތިން މިނެޓުފަހުން، މި މެޗުގައި އާގައިލް އިން ޖެހި ފަހު ލަނޑުޖަހައިދިނީ ބުންޑޫ އެވެ.