ރެއާލް މެޑްރިޑަށް ކުޅެމުންއަންނަ ފްރާންސްގެ މިޑްފީލްޑަރު، އެޑޮއާޑޯ ކަމަވިންގާ އަށް އަނިޔާވެ، އެޓަލާންޓާއާ ދެކޮޅަށް ކުޅެން ހަމަޖެހިފައިވާ ޔުއެފާ ސުޕަ ކަޕް މެޗުގައި ނުކުޅެވޭނެކަން ކަށަވަރުވެއްޖެއެވެ.
ކަމަވިންގާ، 21، ގެ ވާތުފައިގެ ކަކުލަށް އަނިޔާވީ އެ ކްލަބުން އިއްޔެ ބޭއްވި ފަރިތަކުރުންތަކުގެ ތެރެއިން އެ ޓީމުގެ ފްރާންސް މިޑްފީލްޑަރު، އައުރެލިއަން ޗުއަމެނީ ކައިރިން ޑްރިބްލްކޮށްފަ ދާން މަސައްކަތްކުރި ވަގުތު ވެއްޓުނު ދަނޑިވަޅުގައި ކުރި ޓެކުލެއްގެ ސަބަބުންނެވެ.
ސޯޝަލް މީޑިއާގައި ދައުރުވަމުންދާ ވީޑިއޯ އިން ފެންނަ ގޮތުގައި، ކަމަވިންގާ އަށް ލިބުނު މިއަނިޔާގެ ސަބަބުން ވޭނުގައި ރޮއެ، ހަޅޭކުގެ އަޑު އިވިގެންދިޔައެވެ. އެއަށްފަހު، އޭނާ އާއެކު ރެއާލަށް ކުޅެމުން އަންނަ ކުޅުންތެރިން ވަނީ ހިތްވަރުދީފައެވެ.
މި އަނިޔާއާ ގުޅިގެން ދަނޑުމަތީގައި އޭނާ އަށް ފަރުވާދިނުމުން އިތުރު އެހީތެރިކަމާ ނުލައި ދަނޑުން ފޭބިއެވެ. އަދި ޑްރެސިންގ ރޫމްގައި ބެލި ބެލުމުން ލިގަމެންޓަށް ސީރިއަސް އަނިޔާއެއް ލިބިފައިނުވާކަމަށް ދެނެގަނެވުނެވެ.
ކަމަވިންގާ ލިބިފައިވާ އަނިޔާ އިތުރަށް ދެނެގަތުމަށްޓަކައި އިތުރު ޓެސްޓްތަކެއް ހަދަންޖެހެއެވެ. އޭނާގެ ކަކުލުގެ ލިގަމެންޓަށް އިންޓާނަލް އިންޖަރީއެއް ކުރިމަތިވެފައިވާ ކަމަށް އެ ކްލަބުން ހާސްވެ، ކަންބޮޑުވެއެވެ.
މީގެ ތިން އަހަރެއްހާ ދުވަސް ކުރީން، 2021 ވަނަ އަހަރު ރެއާލުން ވަނީ އޭރު ރެނޭސް އަށް ކުޅެމުންއައި ކަމަވިންގާގެ ސޮއި ހޯދުމުގައި މެންޗެސްޓާ ޔުނައިޓެޑާއި ޕީއެސްޖީ ފަހަތަށް ޖައްސާލުމަށްފަހު ކުރިހޯދާފައެވެ.
އޭގެފަހުން، މިހާތަނަށްއައިއިރު ކަމަވިންގާ ވަނީ ރެއާލް އާއެކު ދެ ފަހަރު ޗެމްޕިއަންސް ލީގާއި ސްޕެނިޝް ލީގު ކާމިޔާބުކޮށް، އެއްފަހަރު ފީފާ ކްލަބް ވޯލްޑް ކަޕް އުފުލާލައިފައެވެ. އޭނާ ވަނީ މިހާތަނަށް އެ ޓީމަށް 145 މެޗު ކުޅެދީފައެވެ. މީގެތެރޭގައި، ނިމިދިޔަ ސީޒަނުގައި ރެކޯޑް 36 ވަނަ ފަހަރަށް ރެއާލުން ސްޕެނިޝް ލީގު ކާމިޔާބުކޮށްދިނުމަށް އޭނާ ވަނީ ލީގުގައި 31 މެޗު ކުޅެފައެވެ.