20 އަހަރުން ދަށުގެ ސާފް ޗެމްޕިއަންޝިޕުގައި ވާދަކުރާ ގައުމީ ޓީމުގެ ކުޅުންތެރިންނަށް ވަޒީރު ހިތްވަރުދެއްވައިފި

ނޭޕާލުގައި ބާއްވާ 20 އަހަރުން ދަށުގެ ސާފް ޗެމްޕިއަންޝިޕުގައި ވާދަކުރާ ރާއްޖޭގެ ގައުމީ ފުޓުބޯޅަ ޓީމުގެ ކުޅުންތެރިންނާ ބައްދަލުކުރައްވާ، ކުޅިވަރާއި ހަށިހެޔޮކަމާ ބެހޭ ވަޒީރު ހިތްވަރުދެއްވައިފިއެވެ.

މިމަހުގެ 18 އިން 28 އަށް ކުރިއަށް ގެންދިޔުމަށް ނިންމާފައިވާ 20 އަހަރުން ދަށުގެ ސާފް ޗެމްޕިއަންޝިޕަށް ދާ ރާއްޖޭގެ ގައުމީ ޒުވާން ޓީމު ވާދަކުރާ މި މުބާރާތުގައި ރާއްޖޭގެ އިތުރުން ދެން ވާދަކުރަނީ ބަންގްލަދޭޝާއި، ނޭޕާލްގެ އިތުރުން ސްރީ ލަންކާ، ބޫޓާން އަދި އިންޑިއާއެވެ.

20 އަހަރުން ދަށުގެ ސާފް ޗެމްޕިއަންޝިޕުގައި ރާއްޖެ ވާދަކުރާނީ ގްރޫޕް ބީގައެވެ. އެ ގްރޫޕްގައި ދެން ހިމެނެނީ ބޫޓާނާއި އިންޑިއާއެވެ. މުބާރާތުގައި ޕާކިސްތާނުންވެސް ބައިވެރިވިއެވެ. ނަމަވެސް ފަހު ވަގުތު އެ ޓީމުން ވަނީ ނަން ނަގާފައެވެ.

ޓީމާ ބައްދަލުކުރައްވާ ވަޒީރު ވަނީ މުބާރާތުގައި ހިތްވަރާއެކު ކޮންމެ މެޗަކާވެސް ކުރިމަތިލާން ކުޅުންތެރިންގެ ކިބައިން އެދިފައެވެ. އަދި ގައުމަށް ރީތި ނަމެއް ހޯދުމަށް އަޒުމް ކަނޑައެޅުމަށް ވެސް ވަޒީރު ވަނީ އެދިވަޑައިގެންފައެވެ. ރޭގެ ބައްދަލުވުމުގައި ކޮމިޝަނަރ އޮފް ސްޕޯޓްސް މުޙައްމަދު ޠަލާލުވެސް ބައިވެރިވެވަޑައިގެންނެވިއެވެ.

މުބާރާތުގައި ވާދަކުރާ ރާއްޖޭގެ ޓީމުގެ ކޯޗަކީ އަޙްމަދު ޝާކިރު (ޝާކިއްޓެ) އެވެ. ޓީމުގެ އެސިސްޓެންޓް ކޯޗުންނަކީ މުޙައްމަދު އަރީފާއި އިސްމާޢީލް އާސިފެވެ. ގޯލްކީޕަރު ކޯޗަކަށް ސީނިއާ ގައުމީ ޓީމުގެ ތަޖުރިބާކާރު ކޯޗު އަސްލަމް އަބްދުލް ރަހީމް ޓީމާއެކު ބައިވެރިވާއިރު، މެނޭޖަރަކީ މުޙައްމަދު އަބީރެވެ.