އިންޑިޔާގެ ބޮޑުވަޒީރު ނަރެންދުރަ މޯދީ އީރާނާށް ކުރެއްވި ދެދުވަހުގެ ދަތުރުފުޅެއް ނިންމަވާ ލެއްވުމަށްފަހު މިއަދު އެބުރި ޤައުމަށް ވަޑައިގެންފިއެވެ.
މިދަތުރުފުޅުގައި ނިމިގެންދިޔަ ކަންކަމުގެ ތެރޭގައި އަފްޣާނިސްތާން ހުރަސްކޮށް އިންޑިޔާއާއި ތެހެރާނާ ދެމެދު ޚާއްސަ ދަތުރުފަތުރުގެ ނިޒާމެއް ޤާއިމްކުރުން ހިމެނެއެވެ. މި ނިޒާމްގެ މައި ހަބްގެ ގޮތުގައި ކަޑައަޅާފައިވަނީ އީރާންގެ މައި ޕޯޓެއް ކަމަށްވާ ޗަބާހަރު ޕޯޓެވެ.
މޯދީ ގެ މިދަތުރު ފުޅުގައި ޗަބާހަރު ޕޯޓު ތަރައްގީ ކުރުމަށް އިންޑިޔާއިން ފައްސަތޭކަ މިލިއަން ޑޮލަރުގެ އެހީ ދިނުމަށް ކަޑައަޅުއްވާފައިވެއެވެ. ޓްރާންސްޕޯޓްގެ ޚާއްސަ ނިޒާމް ޤާއިމް ކުރުމުގެ ބޭނުމަކީ އީރާނާ އަފްޣާނިސްތާނާ ސެންޓްރަލް އޭޝިޔާގެ ޤައުމުތަކާއެކު ވިޔަފާރީގެ މުޢާމަލާތު ކުރުމުގެ ފުރުސަތު އިންޑިޔާއަށް ފަހިކޮށް ދިނުމެވެ.
ނަރެންދުރަމޯދީ އީރާނަށް ކުރެއްވި ދަތުރުފުޅަކީ 15 އަހަރުދުވަހުގެ ތެރޭ އިންޑިޔާގެ ލީޑަރަކު އީރާނަށް ކުރެއްވި ފުރަތަމަ ދަތުރުފުޅެވެ. މިދަތުރު ފުޅުގައި އަފްޣާނިސްތާންގެ ރައީސް އަޝްރަފް ޣަނީ ވެސް ބައިވެރިވެ ވަޑައިގެންފައިވެއެވެ. އީރާނަކީ ތެލުގެ ވިޔަފާރީގައިވެސް އިންޑިޔާގެ މުހިންމު ބައިވެރިއެކެވެ.