ފްރާންސްގެ ވެރިރަށް ޕެރިހުގައި ކުރިއަށްދިޔަ އޮލިމްޕިކް ގޭމްސްގައި ވާދަކުރި ރާއްޖޭގެ ކޮންޓިންޖެންޓް އެނބުރި މާލެ އައުމުން ހޫނު މަރުހަބާއެއް ކިޔައިފިއެވެ.
މި ފަހަރުގެ އޮލިމްޕިކްސްގައި ރާއްޖޭގެ ފަސް އެތުލީޓަކު ވާދަކުރިއިރު، މިއީ ރާއްޖޭގެ ކުޅިވަރު ތާރީޚުގައިވެސް އޮލިމްޕިކްސްއަށް އެންމެ ގިނަ ކުޅިވަރުގެ ބައިވެރިވުމާއެކު، ބޮޑު ކޮންޓިންޖެންޓެއް ދިޔަ ފަހަރެވެ. އެގޮތުން ފުރަތަމަ ފަހަރަށް މި ފަހަރުގެ އޮލިމްޕިކްސްގައި ރާއްޖެއިން ހަތަރު ކުޅިވަރެއްގައި ވާދަކުރިއިރު، އެއީ ބެޑްމިންޓަނާއި، އެތުލެޓިކްސް އާއި، ސްވިމިން އަދި ޓޭބަލް ޓެނިހެވެ.
އޮލިމްޕިކްސްގައި ވާދަކުރި ރާއްޖޭގެ ކޮންޓިންޖެންޓް އަންގާރަ ދުވަހު އެނބުރި މާލެ އައުމުން، ވެލާނާ އިންޓަރނޭޝަނަލް އެއާޕޯޓުން މަރުހަބާ ދެންނެވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ކޮމިޝަނަރ އޮފް ސްޕޯޓްސް މުޙައްމަދު ޠަލާލުގެ އިތުރުން ކުޅިވަރާ ބެހޭ ވުޒާރާ އާއި މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ އިސްވެރިން އަދި ގައުމީ ބައެއް ކުޅިވަރު އެސޯސިއޭޝަންތަކުގެ ރައީސުންނެވެ.
މި ފަހަރުގެ އޮލިމްޕިކްސް އަކީ ރާއްޖެއަށް ތާރީޚީ ފަަހަރެކެވެ. އެ ގޮތުން ދިވެހި އެތުލީޓަކު ވަނީ ފުރަތަމަ ފަހަރަށް ކޮލިފައިން ބުރެއް ފަހަނައަޅައި ގޮސް އޮލިމްޕިކްސްގައި ވާދަކޮށްފައެވެ. އެ ޝަރަފު ހޯދާފައިވަނީ ޓީޓީ ތަރި ފާތިމަތު ދީމާ އަލީއެވެ.
އޮލިމްޕިކްސްގައި މި ފަހަރު ބެޑްމިންޓަނުން ވާދަކުރީ ފާތިމަތު ނަބާހާއެވެ. ނަބާހާއަކީ ބެޑްމިންޓަނުން ޖެހިޖެހިގެން ދެ އޮލިމްޕިކްސްގައި ވާދަކުރި ފުރަތަމަ ދިވެހި އެތުލީޓެވެ.
އެތުލެޓިކްސްއިން މި ފަހަރުގެ އޮލިމްޕިކްސްގައި ވާދަކުރީ އިބާދުﷲ އާދަމެވެ. އޮލިމްޕިކްސްގެ 100 މީޓަރު ދުވުމުގެ ޕްރިލިމިނަރީ ހީޓު ހަތަރެއްގައި ދުވި އިބާދުﷲ ފަސް ވަނައިގައި ނިންމިއިރު، އޭނާ ވަނީ ޕާސަނަލް ބެސްޓް ޓައިމިން ހަދާފައެވެ. އެގޮތުން އިބާދުﷲ ގެ ޓައިމިން އަކީ 10.55 ސިކުންތެވެ.
މީގެ އިތުރުން ސްވިމިންއިން އޮލިމްޕިކްސްއަށް ދިޔަ އެތުލީޓުންނަކީ މުޙައްމަދު އާން ހުސައިން އާއި އާއިޝަތު އުލްޔާ ޝާއިގެވެ. މީގެ ތެރެއިން އާން ވަނީ ގައުމީ ރިކޯޑު ޓައިމިންއަކާއެކު ވާދަކުރި ހީޓުގެ ތިންވަނަ މަގާމު ހޯދާފައެވެ. އޮލިމްޕިކްސްގެ 50 މީޓަރު ފްރީ ސްޓައިލް އިވެންޓްގެ ހީޓު ހަތަރެއްގައި ވާދަކޮށް އާން ރޭސް ނިންމީ 24.22 ސިކުންތުންނެވެ. މި ރިކޯޑު މީގެ ކުރިންވެސް އޮތީ އާންގެ އަތުގައެވެ. އެއީ މި އަހަރުގެ މެއި މަހު މެލޭޝިއާގައި ކުރިއަށްދިޔަ މުބާރާތުގައި 24.28 ސިކުންތުން ރޭސް ނިންމައިގެންނެވެ.
މި ފަހަރުގެ އޮލިމްޕިކް ގޭމްސްގައި ރާއްޖޭގެ ޗެފް ޑި މިޝަނަރަކަށް މަސައްކަތްކުރީ ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) ގެ ރައީސް އަލީ ރަޝީދު (އައްޔަ) އެވެ.