ފެން ބޮޑުވެ ލިބޭ ގެއްލުން ކުޑަކުރުމަށް ދުރާލާ 2،000 ވެލި ބަސްތާ ތައްޔާރުކޮށްފައިވޭ

މާލޭގެ ގިނަ ގެތަކަކަށް ފެން ވަދެ ގެއްލުންތައްވުމުގެ ފުރުސަތު ބޮޑުކަމަށް ޤަބޫލުކުރެވޭތީ ކަމާބެހޭ މުވައްސަސާތައް ގުޅިގެން ދުރާލާ 2،000 ބަސްތާގެ ވެލި ތައްޔާރުކޮށްފައިވާކަމަށް ސިޓީތަކާއި އިދާރީ ދާއިރާތަކާއި ޢާއްމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

މިހާރު މުޅި ރާއްޖެއަށް ކުރަމުންދާ ވިއްސާރައިގައި މާލެއަށް ވަނީ ބޯކޮށް ވާރޭވެހި ފެން ބޮޑުވެފައެވެ. މާލޭގެ ބޮޑު ބައެއްގައި ފެންބޮޑުވުމުގެ ސަބަބުން ފެން ހިންދުމުގެ މަސައްކަތް ކަމާބެހޭ ފަރާތްތަކުން ދަނީ ކުރަމުންނެވެ. މި މަސައްކަތުގައި ޙަރަކާތްތެރިވެވަޑައިގަންނަވަމުން ޕީއެސްއެމްގެ ލައިވް ކަވަރޭޖަށް ދެއްވި އިންޓަރވިއުއެއްގައި ސިޓީތަކާއި އިދާރީ ދާއިރާތަކާއި ޢާއްމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވަނީ މޫސުން ގޯސްވާނެކަމަށް މެޓު އޮފީހުން މަޢުލޫމާތު ހާމަކުރެއްވުމާއެކު ސަލާމަތީ ކަންކަން ވަރުގަދަކުރެއްވުމަށް މަސައްކަތް ފައްޓަވާފައިވާކަން ފާހަގަކުރައްވާފައެވެ.

ވަޒީރު ވިދާޅުވީ، ފެން ބޮޑުވާ ހާލަތެއްގައި ބޭނުންކުރުމަށް ކަމާބެހޭ މުވައްސަސާތައް ގުޅިގެން ވޭތުވެދިޔަ ދެ ދުވަހުގެ ތެރޭގައި 2،000 ބަސްތާ ވެލި ތައްޔާރުކޮށްފައިވާކަމަށެވެ. އެ ގޮތުން ކުންފުނިތަކުން ފޯރުކޮށްދިން އެހީގެ އިތުރުން ހުޅުމާލެއިން ވެސް ވެލި ގެންނަމުންދާކަން ވަޒީރު ފާހަގަކުރެއްވިއެވެ.

"އަޅުގަނޑު ފާހަގަކޮށްލަން ހުރިހާ ފަރާތެއްގެ އެހީތެރިކަމާއެކު ވަރަށް ރަނގަޅު ކޯޑިނޭޝަންއެއްގެ ދަށުން މިމަސައްކަތް ކުރެވެމުން މިދަނީ. މާލެ އެކަންޏެއް ނޫން. މުޅި ރާއްޖެއަށް ވިއްސާރަކުރަމުންދާއިރު އުތުރުގެ އަތޮޅުތަކުގެ ބައެއް ރަށްރަށުގައި އިއްޔެއިން ފެށިގެންވެސް މިހާލަތުގައި އޮތްކަން ފާހަގަކުރެވޭ. ސަރުކާރުންދަނީ ވަރަށް ގާތުން ހާލަތު ބަލަމުން." ވަޒީރު ވިދާޅުވިއެވެ.

މާލޭގައި ވެން ބޮޑުވުމުގެ ސަބަބުން ފެން ހިންދުމަށްޓަކައި ސަލާމަތީ ބާރުތަކުން މަސައްކަތް ކުރަމުންދާއިރު ވެލި ބަސްތާ ބޭނުންވާ ފަރާތްތަކުން މާލެ ސިޓީ ކައުންސިލްގެ ޢާއްމު ޚިދުމަތްތަކާ ބެހޭ ބައިން ވެލި ބަސްތާ ލިބޭނެ އިންތިޒާމުވަނީ ހަމަޖައްސާފައެވެ. ވިއްސާރަވެ ފެން ބޮޑުވުމުގެ ސަބަބުން މާލޭގައި ބަރު އުޅަނދު ނުދުއްވުމަށް ފުލުހުންވަނީ އިލްތިމާސްކުރައްވާފައެވެ. އަދި ޒަރޫރީ ބޭނުމެއްގައި ނޫނީ 4 ފުރޮޅުލީ އުޅަނދުތަކުގައިވެސް ނޫޅުމަށްވަނީ އިލްތިމާސްކުރައްވާފައެވެ.