އިންޓަ މިލާނަށް ކުޅެމުންއަންނަ އާޖެންޓީނާގެ ފޯވާޑް، ލަޓާރޯ މާޓިނޭޒް، އެ ކްލަބާއެކު ހަދާފައިވާ އައު ފަސް އަހަރު ދުވަހުގެ އެއްބަސްވުމެއްގައި ސޮއިކޮށްފިއެވެ. މިއާއެކު، މާޓިނޭޒް، 26، އިންޓަ އާއެކު ހަދާފައިވާ އެއްބަސްވުން ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ.
އިންޓަގެ ކޮންޓްރެކްޓް އައު ކުރުމަށްފަހު މާޓިނޭޒް ބުނީ، އިންޓަ އާއެކު ހަދާފައިވާ އެއްބަސްވުން އައު ކުރެވުމުން ވަރަށް ބޮޑަށް އުފާވާ ކަމަށާއި، އެ ކްލަބުގެ ކެޕްޓަނެއްގެ ޒިންމާ އަދާކުރުމުގެ ފުރުޞަތު ލިބުމަކީ ވަރަށް ބޮޑު ފަޚުރަކާއި ޝަރަފެއް ކަމަށެވެ. އަދި ކުރިއަށް އޮތީ ވަރަށް ދިގު ސީޒަނެއް ކަމަށާއި، އެކަމުގައި ހުރިހާ އެންމެންގެ ސަޕޯޓް ބޭނުންވާ ކަމަށް ވެސް އިންސްޓަގްރާމް މެދުވެރިކޮށް ކުރި ޕޯސްޓްގައި މާޓިނޭޒް ބުނެފައިވެއެވެ.
މިހާތަނަށް ދެމުންއައި ސަޕޯޓާއި، ލޯތްބާއި އަދި ބެހެއްޓީ ގާތްކަމަށް ވަރަށް ހާއްސަ ޝުކުރެއް އަދާކުރާ ކަމަށް ވެސް މާޓިނޭޒް ވަނީ ބުނެފައެވެ.
އާޖެންޓީނާގެ ރޭސިންގ ކްލަބުން 2018 ވަނަ އަހަރުގެ ޖުލައި މަހުގައި 25 މިލިއަން ޔޫރޯގެ ޓްރާންސްފާ ފީ އަކަށް އިންޓަ އަށް ބަދަލުވެ، މިހާތަނަށް އެ ކްލަބުގައި ހޭދަކުރީ ހަ ސީޒަނުގައި ވަނީ 129 ލަނޑުޖަހައިފައެވެ.
މާޓިނޭޒް ވަނީ އިންޓަ އާއެކު މިހާތަނަށް ހަތް ޓްރޮފީ ހޯދާފައެވެ. އޭގެތެރޭގައި، 2021 އަދި 2024 ވަނަ އަހަރުގެ އިޓަލިއަން ސެރިއޭ ހިމެނެއެވެ. އަދި، 2023 ވަނަ އަހަރުގެ ސީޒަނުގެ ޔުއެފާ ޗެމްޕިއަންސް ލީގުގެ ފައިނަލަށް އެ ޓީމު ގެންގޮސްދިނުމުގައި އިސްދައުރެއް އަދާކޮށްފައިވެއެވެ.
ނިމިދިޔަ ސީޒަނަކީ މާޓިނޭޒްގެ ކެރިއަރުގައި އެންމެ ފާހަގަކޮށްލެވޭ އެއް އަހަރެވެ. އޭނާ ވަނީ މިދިޔަ ސީޒަނުގެ ސެރިއޭގައި އެންމެ ގިނަ ލަނޑުޖެހި ކުޅުންތެރިޔާއަށްދިން ރަން ބޫޓް ހާސިލްކޮށްފައެވެ. އެގޮތުން، އޭނާ ވަނީ އެ ޓީމަށް ކުޅުނު 33 މެޗުގައި 24 ލަނޑުޖަހައިފައެވެ. މިއީ ލީގުގައި އޭނާ ޖެހިޖެހިގެން 20 ލަނޑުޖެހި ތިންވަނަ ފަހަރެވެ. މިހާރު އޭނާއަކީ އިންޓަގެ ތާރީޚުގައި މިހާތަނަށް އެންމެ ގިނަ ލަނޑުޖެހި ކުޅުންތެރިންގެ ލިސްޓުގެ އަށްވަނަ ކުޅުންތެރިޔާއެވެ.
2018 ވަނަ އަހަރުން ފެށިގެން އާޖެންޓީނާގެ ގައުމީ ޓީމަށް ގަވާއިދުން ކުޅެމުން އަންނަ މާޓިނޭޒް ވަނީ އެންމެ ފަހުން ކުޅެވުނު 2022 ވަނަ އަހަރުގެ ފީފާ ވޯލްޑް ކަޕާއި، 2021 އާއި 2024 ވަނަ އަހަރުގެ ކޮޕާ އެމެރިކާ ފުޓްބޯޅަ ކާމިޔާބުކޮށްފައެވެ. އެންމެ ފަހުގެ ކޮޕާ އެމެރިކާގެ ފައިނަލްގައި ކޮލަމްބިއާ ކޮޅަށް އާޖެންޓީނާ މޮޅުވި ލަނޑުޖަހައި، މުޅި މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަޤާމު ވަނީ ހާސިލްކޮށްފައެވެ. އޭނާ ވަނީ 6 މެޗުގައި 5 ލަނޑުޖަހައިފައެވެ. އަދި މުޅިއެކު ގައުމީ ޓީމަށް ވަނީ މިހާތަނަށް 64 މެޗުގައި 29 ލަނޑުޖަހައިފައެވެ.