ބަޖެޓުގެ ތާށިކަމާއެކު އިސްކަންދެނީ ފަށާފައިވާ މަޝްރޫޢުތައް ނިންމުމަށް: ވަޒީރު ޑރ. މުއްޠަލިބު

ބަޖެޓުގެ ތާށިކަމުގެ ސަބަބުން އައު މަޝްރޫޢުތައް ފެށުމަށްވުރެ އިސްކަން ދެމުންގެންދަނީ މިހާރު ފަށާފައިވާ މަޝްރޫޢުތައް ނިންމުމަށް ކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

ވަޒީރު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. އެގޮތުން، އެކި ރަށްތަކުގައި ކުރިއަށްގެންދާ މަޝްރޫޢުތަކާ ގުޅޭގޮތުން މެންބަރުން ވަނީ ވަޒީރާ ސުވާލުކުރައްވާފައެވެ.

ރައްޔިތުންގެ މަޖިލީހުގެ މެންބަރުންގެ ސުވާލުތަކަށް ޖަވާބުދެއްވަމުން އިމާރާތްކުރުމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ މިއަހަރަށް ކުރިއަށްގެންދާ މަޝްރޫޢުތަކަށް އެކަށީގެންވާ ބަޖެޓެއް މިއަހަރުގެ ބަޖެޓުގައި ހިމަނާފައިނުވާ ކަމަށެވެ. އެހެންވެ، މަޝްރޫޢުތައް ކުރިއަށްގެންދަންޖެހިފައިވަނީ "ޕްރައޯރަޓައިޒް" ކޮށްގެން ކަމަށާއި އައު މަޝްރޫޢުތައް ފަށާނީ މިހާރު ފަށާފައިވާ މަޝްރޫޢުތައް ނިމެމުންދާ ވަރަކުންކަމަށް ކުންފުނިތަކަށް އަންގާފައިވާނެ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ސަރުކާރުން ސޮއިކޮށްފައިވާ ޕީއެސްއައިޕީ މަޝްރޫޢުތަކުގެ އަގު 36.8 ބިލިއަން ރުފިޔާއަށް އަރާ ކަމަށެވެ. އަދި މިހާރު ކުރިއަށްދާ މަޝްރޫޢުތަކުގެ އަގު 31.5 ބިލިއަން ރުފިޔާއަށް އަރާ ކަމަށާއި މިއަހަރަށް ލިބިފައިވަނީ އެންމެ ފަސް ބިލިއަން ރުފިޔާގެ ބަޖެޓެއްކަން ވަޒީރު ފާހަގަކުރެއްވިއެވެ.

"އަޅުގަނޑު ވަރަށް ބޮޑަށް ރައްޔިތުންގެ މަޖިލީހުގެ މެންބަރުން ކިބައިން އެދެން ބަޖެޓް ހައްދަވާއިރު ކުރިއަށްދާ މަޝްރޫޢެއް ވިއްޔާ އެމަޝްރޫޢު ކުރިއަށްގެންދެވޭނެ މިންވަރަކަށް ބަޖެޓް ހިމަނާލަދެއްވާށޭ. އެހެން ނޫނީ އަޅުގަނޑުމެން މިޖެހެނީ އެއް ދިމާލުން ފައިސާ ނަގައިގެން އަނެއް ދިމާލަށް ލައިގެން ޕްރޮޖެކްޓްތައް ކުރިއަށްގެންދަން،" ވަޒީރު ވިދާޅުވިއެވެ.

ވަޒީރު ވިދާޅުވީ މިސަރުކާރު ހަވާލުވިއިރު ބައެއް ކުންފުނިތަކާ ހަވާލުކޮށްފައި ހުރި މަޝްރޫޢުތައް ހުރީ ހުއްޓިފައި ކަމަށާއި އޭގެ ތެރެއިން ފެނަކައާ ހަވާލުކޮށްފައި ހުރި ފެނާއި ނަރުދަމާގެ 20 މަޝްރޫޢެއްގެ އެއްބަސްވުން ބާތިލުކޮށް އެމްޑަބްލިއުއެސްސީއާ ހަވާލުކުރުމުގެ މަސައްކަތް މިހާރު ކުރަމުންދާ ކަމަށެވެ. މިމަޝްރޫޢުތަކުގެ އަގު 1 ބިލިއަން ރުފިޔާއަށް އަރާކަމަށް ވަޒީރު ވިދާޅުވިއެވެ.

އެހެން ކުންފުނިތަކާ ވާހަކަދައްކައިގެން މަޝްރޫޢުތައް ކުރިއަށްގެންދެވޭނެ ގޮތްތައް ބަލައި އެ ކުންފުނިތަކަށް މަޝްރޫޢު ކުރިއަށްނުގެންދެވޭނަމަ އެއްބަސްވުން ބާތިލުކޮށްގެންވެސް ރައްޔިތުންނަށް ބޭނުންވާ ޚިދުމަތްތައް ފޯރުކޮށްދެއްވާނެ ކަމަށް ވަޒީރު ވިދާޅުވިއެވެ.

ކުރީ ސަރުކާރުން އެމްޓީސީސީއާ 150 އަށްވުރެ ގިނަ މަޝްރޫޢު ހަވާލުކޮށްފައިވާކަން ފާހަގަކުރައްވައި ވަޒީރު ވިދާޅުވީ އެއްފަހަރާ ހުރިހާ މަޝްރޫޢެއް ހިންގުމުގެ ގާބިލުކަން އެ ކުންފުނީގެ ނެތް ކަމަށެވެ. އެހެންވެ އެ ކުންފުނިން މިހާރު ފަށާފައިވާ މަޝްރޫޢުތަކަށް އިސްކަންދީގެން ކުރިއަށްގެންދިއުމަށް އަންގާފައިވާނެކަން އިމާރާތްކުރުމާއި ބިނާރާބެހޭ ވަޒީރު ވިދާޅުވިއެވެ.