މެންޗެސްޓާ ސިޓީ އަށް ކުޅެމުންއައި އާޖެންޓީނާގެ ފޯވާޑް، ހޫލިއަން އަލްވަރޭޒް ސްޕެއިނުގެ އެތުލެޓިކޯ މެޑްރިޑަށް ބަދަލުވެއްޖެއެވެ.
އަލްވަރޭޒް، 24، އެތުލެޓިކޯ އަށް ބަދަލުވީ ގާތްގަނޑަކަށް 75 މިލިއަން ޔޫރޯ (82 މިލިއަން އެމެރިކާ ޑޮލަރު) އާއެކު ބޯނަހުގެ ގޮތުގައި އިތުރު 25 މިލިއަން ޔޫރޯގެ ޑީލެއްގައެވެ. އަލްވަރޭޒް ވަނީ އެތުލެޓިކޯ އާއެކު ހަ އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ.
މިއީ މިހާތަނަށް ކުޅުންތެރިއަކު ވިއްކާލައިގެން ސިޓީ އަށް ލިބުނު އެންމެ ބޮޑު ޓްރާންސްފާ ފީ އެވެ. މީގެކުރީން، ސިޓީ އަށް ކުޅުންތެރިއަކު ވިއްކާލައިގެން ލިބުނު އެންމެ ބޮޑު ޓްރާންސްފާ ފީ އަކީ، 2022 ގައި ޗެލްސީ އިން ރަހީމް ސްޓާލިންގ އަށް ދެއްކި 50 މިލިއަން ޕައުންޑެވެ.
މީގެ ދެ އަހަރެއްހާ ދުވަސްކުރީން، އާޖެންޓީނާގެ ރިވާ ޕްލޭޓް އިން 14 މިލިއަން ޕައުންޑްގެ ޓްރާންސްފާ ފީ އަކަށް ސިޓީ އަށް ބަދަލުވެ، އަލްވަރޭޒް ވަނީ އެ ޓީމަށް ކުޅުނު 103 މެޗުގައި 36 ލަނޑުޖަހައިފައެވެ. އަލްވަރޭޒް ވަނީ، ސިޓީ އާއެކު، ޕްރިމިއާ ލީގު ދެ ފަހަރު، ޗެމްޕިއަންސް ލީގާއި އެފްއޭ ކަޕާއި ކްލަބް ވޯލްޑް ކަޕްގެ އިތުރުން ޔުއެފާ ސުޕަ ކަޕް އެއްފަހަރު ކާމިޔާބުކޮށްފައެވެ.
2021 ވަނަ އަހަރުން ފެށިގެން އާޖެންޓީނާގެ ގައުމީ ޓީމަށް ކުޅެމުން އަންނަ އަލްވަރޭޒް ވަނީ އެ ޓީމާއެކު 2022 ގެ ފީފާ ވޯލްޑް ކަޕާއި މިއަހަރުގެ ކޮޕާ އެމެރިކާ ފުޓްބޯޅަ މުބާރާތް ކާމިޔާބުކޮށްފައެވެ. އޭނާ ވަނީ އެ ޓީމަށް މިހާތަނަށް ކުޅުނު 36 މެޗުގައި 9 ލަނޑުޖަހައިފައެވެ.
ފާއިތުވި މަހުގައި އެތުލެޓިކޯގެ ސްޕެއިން ފޯވާޑް، އަލްވާރޯ މޮރާޓާ އިޓަލީގެ އޭސީ މިލާނަށް ބަދަލުވުމާއެކު، އެ ޓީމުގެ ކޯޗު، ޑިއޭގޯ ސިމިއޯނީ އަންނަނީ ފޯވާޑެއް ހޯދުމުގެ މަސައްކަތްކުރަމުންނެވެ.
އަލްވަރޭޒް އަކީ މިފަހަރުގެ ސީޒަނަށް އެތުލެޓިކޯ އިން ގެނައި ތިންވަނަ ކުޅުންތެރިޔާ އެވެ. މީގެކުރީން، އެ ޓީމުން ވަނީ ރެއާލް ސޮސިއެޑާޑުން ސްޕެއިނުގެ ޑިފެންޑަރު، ރޮބިން ލެ ނޯމަންޑް އާއި ވިޔަރެއާލަށް ކުޅެމުންއައި ނޮވޭގެ ފޯވާޑް، އަލެކްސެންޑާ ސޯލޯތު ގެނެސްފައެވެ.