ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިންގް، ވިނީޝިއުސް ޖޫނިއާ އަށް ސައުދީ ޕްރޯ ލީގުގައި ކުޅުމަށް ލިބުނު ބޮޑު ހުށަހެޅުމަކަށް ފުރަގަސްދީފައިވާ ކަމަށް ފަހުގެ މީޑިއާ ހަބަރުތައް ބުނެފިއެވެ.
މި ޑީލާ ގުޅޭގޮތުން، ސައުދީގެ ސްޕޯޓްސް މިނިސްޓްރީގެ ފަރާތުން މަސައްކަތްކުރާ ޕަބްލިކް އިންވެސްޓްމަންޓް ފަންޑުގެ ވަފުދެއް ވަނީ ވިނީޝަސްގެ މަންދޫބުންނާ ބައްދަލުކޮށްފައެވެ.
އެގޮތުން، ސައުދީން ބޭނުންވަނީ 2034 ވަނަ އަހަރުގައި އެ ގައުމުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ކުރީން، ސައުދީ ޕްރޯ ލީގުގެ އެންމެ މުހިއްމު ކުޅުންތެރިޔާގެ ގޮތުގައި ވިނީޝަސް ދައްކާލުމަށެވެ.
މި މުބާރާތް ބާއްވާނެ ގައުމެއް ކަނޑައެޅިގެންދާނީ އަންނަ ޑިސެންބަރު މަހުގެ 11 ގައި ބޭއްވޭ ފީފާ ކޮންގްރެސްގައެވެ. މިހާތަނަށްއައިއިރު، ސައުދީ އަރަބިއްޔާގެ އިތުރުން އެހެން ގައުމަކުން ބިޑެއް ކޮށްފައެއްނުވެއެވެ.
ކަންމިހެން އޮތްއިރު، ވިނީޝަސްގެ މިހާރުގެ ކްލަބު ރެއާލުން އޭނާ ވިއްކާލުމުގެ ވިސްނުމެއް ނުގެންގުޅެއެވެ. އެ ކްލަބާއެކު ވިނީޝަސް ހަދާފައިވާ ކޮންޓްރެކްޓްގެ މުއްދަތު 2027 ވަނަ އަހަރުގެ ޖޫން މަހުގެ ނިޔަލަށް ހަމަވާއިރު، އޭނާގެ އެއްބަސްވުން އުވާލުމަށްޓަކައި 1 ބިލިއަން ޔޫރޯގެ ރިލީޒް ކްލޯޒްއެއް ދައްކަންޖެހެއެވެ.
މީގެ ހަ އަހަރު ކުރީން، 2018 ގައި ބްރެޒިލްގެ ފްލަމިންގޯ އިން 45 މިލިއަން ޔޫރޯ (މިހާރުގެ އަގުން ނަމަ، ގާތްގަނޑަކަށް 49 މިލިއަން އެމެރިކާ ޑޮލަރު) ގެ ޑީލެއްގައި ރެއާލަށް ބަދަލުވުމަށްފަހު ވިނީޝަސް ވަނީ އެ ޓީމަށް ކުޅުނު 263 މެޗުގައި 93 ލަނޑުޖަހައިފައެވެ. މި މުއްދަތުގެ ތެރޭގައި އޭނާ ވަނީ ތިން ފަހަރު ސްޕެނިޝް ލީގާއި، ޔުއެފާ ޗެމްޕިއަންސް ލީގާއި ފީފާ ކްލަބް ވޯލްޑް ކަޕް ދެ ފަހަރު ކާމިޔާބުކޮށްފައެވެ.
އެހެންނޫނަސް، ރެއާލްގައި ވިނީޝަސް ހުރީ ވަރަށް އުފަލުންނެވެ. އޭނާގެ އަމާޒަކަށްވެފައިވަނީ އެ ކްލަބާއެކު ބެލަންޑިއޯ ހާސިލްކުރުމެވެ.
މި ފަހަރު މަސައްކަތް ކާމިޔާބުނުވި ނަމަވެސް، މުސްތަޤުބަލުގައި ސައުދީން އަލުން ވިނީޝަސް ގެންދިއުމުގެ މަސައްކަތް ކުރާނެކަމަށް ބެލެވެއެވެ.