ޕެރިސް އޮލިމްޕިކްސް: މެޑެލް ތާވަލުގެ އެންމެ ކުރީގައި އެމެރިކާ!

އާދީއްތަ ދުވަހުގެ ނިޔަލަށް މި ފަހަރުގެ ޕެރިސް އޮލިމްޕިކްސް ނިމުނުއިރު، އެމެރިކާއިން މެޑެލް ތާވަލުގެ އެއްވަނަ ހޯދައިފިއެވެ.

މި އަހަރުގެ އޮލިމްޕިކްސްގައި އެމެރިކާއިން ގާތްގަނޑަކަށް 592 އެތުލީޓުން ވާދަކުރިއިރު، އެ ގައުމުން ވަނީ ޖުމްލަ 126 މެޑެލް ހޯދައިފައެވެ. މީއި އެންމެ ފަހުން ބޭއްވުނު ޓޯކިޔޯ އޮލިމްޕިކްސްގައި އެ ގައުމުން ހޯދީ ޖުމްލަ މެޑެލް އަށް ވުރެ 13 ގެ އިތުރުވުމެކެވެ.

އެމެރިކާ އިން މި އަހަރުގެ ގޭމްސްގައި ވަނީ 40 ރަން މެޑެއްޔާއި، 44 ރިހި މެޑެލް އަދި 42 ލޯ މެޑެލް ހޯދައިފައެވެ. އެމެރިކާއިން މެޑެލް ތާވަލްގެ އެއްވަނަ ހޯދިއިރު، އެ ގައުމުން މެޑެލް ތާވަލްގެ އެންމެ ކުރިއަށް ޖެހިލީ ވާދަވެރިކޮށްދިޔަ އަންހެނުންގެ ބާސްކެޓްބޯޅަ ފައިނަލްގައި އިއްޔެ ފްރާންސް ބަލިކޮށްގެންނެވެ. ބާސްކެޓްބޯޅައިގައި އަންހެން އަދި ފިރިހެނުންގެ އިވެންޓްގައި ރަން މެޑެލް ހާސިލްކޮށްފައިވަނީ އެމެރިކާ އެވެ.

ދެވަނައިގައި އޮތް ޗައިނާ އަށް ވެސް 40 ރަން މެޑެލް ލިބުނުއިރު، އެ ގައުމަށް ލިބުނީ 27 ރިހި މެޑެލް އެވެ. މުޅި ޖުމްލަ 91 މެޑެލް ލިބުނުއިރު، 24 ލޯ މެޑެލް ހޯދާފައިވެއެވެ. މީގެކުރީން، ޗައިނާ އިން އެންމެ ގިނަ މެޑެލް ހޯދާފައިވަނީ 2008 ވަނަ އަހަރު ބޭއްވި ބެއިޖިންގ އޮލިމްޕިކްސްގައެވެ.

ތިންވަނަ އަށް އެންމެ ގިނަ މެޑެލް ހާސިލްކުރި ޖަޕާނުން 20 ރަން މެޑެލް އާއެކު ވަނީ ޖުމްލަ 45 މެޑެލް ހޯދާފައެވެ. އޭގެތެރޭގައި ދެން ހިމެނެނީ، 12 ރިހި މެޑެލް އާއި 13 ލޯ މެޑެލް އެވެ.

ދެން އެންމެ ގިނައިން މެޑެލް ހޯދީ އޮސްޓްރޭލިއާ އިންނެވެ. އެ ގައުމުން 18 ރަން މެޑެލް އާއެކު މުޅި ޖުމްލަ 53 މެޑެލް ހޯދިއެވެ. އޮސްޓްރޭލިއާ އިން ވަނީ 19 ރިހި މެޑެލް އާއި 16 ލޯ މެޑެލް ހޯދާފައެވެ.

މި އަހަރުގެ ގޭމްސްގައި ދެވަނަ އަށް އެންމެ ގިނަ އެތުލީޓުން ބައިވެރިވި، ހޯސްޓް ފްރާންސަށް މެޑެލް ތާވަލްގައި ލިބުނީ ފަސްވަނަ އެވެ. އެ ގައުމަށް 16 ރަން މެޑެލް ލިބުނުއިރު، ޖުމްލައެކު ލިބުނީ 64 މެޑެއްޔެވެ. މިއީ ފާއިތުވި ގަރުނެއްހާ ދުވަހުގެ ތެރޭގައި އެ ގައުމަށް މިހާތަނަށް އެންމެ ގިނަ މެޑެލް ލިބުނު ގޭމްސް އެވެ.

މެޑެލްގެ ދަރަޖަތައް ކަނޑައަޅަނީ އެ ގައުމަކަށް ލިބޭ ރަން މެޑެލްގެ އަދަދުންނެވެ. އެމެރިކާ އެންމެ ފަހުން މެޑަލް ތާވަލްގެ އެންމެ ކުރީގައި ނުހިމެނުނީ، 2008 ވަނަ އަހަރު ބެއިޖިންގ އޮލިމްޕިކްސްގައެވެ. އެފަހަރުގެ ގޭމްސްގައި އެމެރިކާ ދެވަނައަށް ދިޔައިރު، ޗައިނާ އަށް ލިބުނީ އެއްވަނަ އެވެ. ޗައިނާ ކުރިހޯދީ 48 މެޑެއްޔާއި 36 މެޑެލްގެ ތަފާތުންނެވެ.

އެމެރިކާ ވަނީ ވިދިވިދިގެން 8 ފަހަރު އޮލިމްޕިކްސްގައި އެންމެ ގިނަ މެޑެލް ހޯދާފައެވެ. އެމެރިކާ އެންމެ ފަހުން ޖުމްލަ މެޑެލް ތާވަލްގެ އެންމެ ކުރީގައި ނުހިމެނުނީ 1992 ވަނަ އަހަރު ބާސެލޯނާގައި ކުރިއަށްދިޔައި އޮލިމްޕިކްސްގައެވެ.