16 މީހުންނާއެކު ދަތުރުކުރި ލޯންޗެއް އިންޖީނު ހުއްޓިގެން އެހީތެރިކަން ފޯރުކޮށްދީފި
-
ލޯންޗުގައި ތިބި 16 މީހުން ވަނީ މާލެ ގެނެސްފައި
-
މިޙާދިސާ ހިނގާފައިވަނީ ކ.ހިންމަފުށީގެ ހުޅަނގު އުތުރުން 9 ނޯޓިކަލްމޭލު ބޭރުން
މާލެއިން ފުރައިގެން ޅ.އަތޮޅަށް ދަތުރުކުރަމުންދިޔަ ލޯންޗެއް އިންޖީނު ހުއްޓިގެން އެމްއެންޑީއެފްގެ ކޯސްޓްގާޑުން އެހީތެރިކަން ފޯރުކޮށްދީފިއެވެ.
އެމްއެންޑީއެފްއިން ވިދާޅުވީ، މާލެއިން ފުރައިގެން ޅ.ނައިފަރަށް ދަތުރުކުރި ލޯންޗެއްގެ އިންޖީނު ހުއްޓިގެން އެހީތެރިކަމަށް އެދި މިއަދު ރިޕޯޓުކޮށްފައިވާކަމަށެވެ. އަދި އެ ލޯންޗްގައި ތިބި 16 މީހުން އެމްއެންޑީއެފްގެ މާލޭ އޭރިއާގެ ކޮމާންޑް ކޯސްޓްގާޑް ސެކަންޑް ސްކޮޑްރަންގެ އެހީތެރިކަމާއެކު މިއަދު މެންދުރު 1340 ހާއިރު މާލެ ގެނެސްފައިވާކަމަށްވެސް އެމްއެންޑީއެފްއިން ވިދާޅުވެއެވެ.
އެމްއެންޑީއެފްއިން ވިދާޅުވީ މިޙާދިސާ ހިނގާފައިވަނީ ކ.ހިންމަފުށީގެ ހުޅަނގު އުތުރުން 9 ނޯޓިކަލްމޭލު ބޭރުންކަމަށެވެ.
މާލޭއިން ފުރައިގެން ޅ.ނައިފަރަށް ދަތުރުކުރި ލޯންޗެއް ކ.ހިންމަފުށީގެ ހުޅަނގުއުތުރުން 9 ނޯޓިކަލްމޭލު ބޭރުން އިންޖީނު ހުއްޓިގެން، އެ ލޯންޗުގައި ތިބި 16 މީހަކު، އެމްއެންޑީއެފް މާލޭ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންގެ އެހީތެރިކަމާއެކު މިއަދު 13:40 ހާއިރު މާލެ ގެނެސްދީފި.
— Maldives National Defence Force (@MNDF_Official) August 11, 2024
ރާއްޖެއަށް މިހާރު ކުރަމުންދާ ވިއްސާރައިގައި، ކަނޑު ދަތުރުކުރާ ފަރާތްތަކުން ޚާއްސަ ސަމާލުކަމެއް ދެއްވުމަށް ކަމާބެހޭ އިދާރާތަކުން ދަނީ އިލްތިމާސްކުރަމުންނެވެ. މިގޮތުން ދަތުރަށް ފުރުމުގެ ކުރިން މޫސުމީ އެންމެ ފަހުގެ ޚަބަރު ހޯދުމަށާއި، މޫސުމީ އެލަރޓްތަކަށް ސަމާލުވުމަށް ވަނީ އެދިވަޑައިގަންނަވާފައެވެ. ހަމައެއާއެކު ކަނޑު އުޅަނދުތަކުގެ ސަލާމަތީ ކަންކަމާއި މުވާސަލާތީ ވަޞީލަތްތައް ހުރި ނެތްގޮތް ބެލުމަށް ވަނީ އިލްތިމާސްކުރައްވާފައެވެ.
ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި މިހަފްތާގެ ކުރިއަށް އޮތް ދުވަސްތަކުގައިވެސް ވައިގަދަވެ ކަނޑުތައް ގަދަވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ.