އިނގިރޭސި ޕްރިމިއާ ލީގުގެ އައު ސީޒަން ފެށުމުގެ ގޮތުން ކުޅެނު މެޗުގައި ޕެނަލްޓީ ޖަހައިގެން މެންޗެސްޓާ ޔުނައިޓެޑް ބަލިކޮށް، މެންޗެސްޓާ ސިޓީން ކޮމިއުނިޓީ ޝީލްޑް އުފުލާލައިފިއެވެ.
މިއީ މިދިޔަ ހަތަރު އަހަރުގެ ތެރޭގައި ސިޓީން ކޮމިއުނިޓީ ޝީލްޑް ކާމިޔާބުކުރި ފުރަތަމަ ފަހަރެވެ. އަނެއް ތިން ފަހަރު ސިޓީއަށް ވަނީ ނާކާމިޔާބީއާ ކުރިމަތިލާންޖެހިފައެވެ. ސިޓީން އެންމެ ފަހުން ކޮމިއުނިޓީ ޝީލްޑް ކާމިޔާބުކުރީ 2019 ގައެވެ.
އިނގިރޭސި ވެމްބްލީ ސްޓޭޑިއަމްގައި މިރޭ ކުޅުނު މެޗުގެ ފުރިހަމަ ވަގުތު ހަމަވިއިރު ދެ ޓީމު 1-1 އިން އެއްވަރުވުމުން ނަތީޖާ ނެރުމަށް ދެން ޖެހުނީ ޕެނަލްޓީ ޝޫޓްއައުޓަށް ދާށެވެ. ޕެނަލްޓީގައި ސިޓީ މޮޅުވީ 7-6 އިންނެވެ.
ސިޓީން މި މެޗަށް ނިކުތްއިރު އެ ޓީމުގެ ފުރަތަމަ އެގާރައިގައި ކެވިން ޑި ބްރޭނާ އާއި ބެނާޑޯ ސިލްވާ ހިމަނާފައެއް ނުވެއެވެ. މީގެއިތުރުން، ސްޕެއިނުން ޔޫރޯ ކާމިޔާބުކުރިއިރު މުހިއްމު ދައުރެއް އަދާކުރި ރޮޑްރީ އާއި އިނގިރޭސި ޑިފެންޑަރު، ޖޯން ސްޓޯންސް މި މެޗަށް ނެގި ސްކޮޑުގައި ނުހިމެނެއެވެ.
ޔުނައިޓެޑުން މި މެޗަށް ނިކުތީ މިވަގުތު އަނިޔާގައި ތިބި ޑިފެންސްގެ މުހިއްމު ކުޅުންތެރިންތަކެއް ނުލައެވެ. އެ ޓީމުގައި މިވަގުތު އަނިޔާގައި ތިބި ކުޅުންތެރިންގެ ތެރޭގައި، ލޫކް ޝޯ އާއި ވިކްޓަ ލިންޑެލޯފްގެ އިތުރުން މިފަހަރުގެ ސީޒަނަށް އެ ޓީމާ ގުޅުނު ޒުވާން ސެންޓްރަލް ޑިފެންޑަރު، ލެނީ ޔޯރޯ ހިމެނެއެވެ. އަދި އެ ޓީމުގެ ފޯވާޑްލައިންގައި ހިމެނޭ ޑެންމާކްގެ ރަސްމުސް ހޮއިލުންޑް ވެސް އަނިޔާގެ ސަބަބުން މި މެޗުގައި ނުކުޅެއެވެ.
މި މެޗުގައި ފެނިގެންދިޔަ ހުރިހާ ގޯލެއްވެސް ކާމިޔާބުކުރީ ދެވަނަ ހާފުގެ ފަހު 10 މިނެޓުގެ ތެރޭގައެވެ. އެގޮތުން، މެޗުގެ 82 ވަނަ މިނެޓުގައި ޔުނައިޓެޑުން ލީޑު ނެގީ ޕެނަލްޓީއޭރިއާ ތެރެއިން އާޖެންޓީނާގެ ވިންގް، އަލެހަންދްރޯ ގަނާޗޯ ކާމިޔާބުކުރި ގޯލުންނެވެ. މި ލަނޑުޖެހުމަށް އެހީތެރިވެދިނީ ޔުނައިޓެޑްގެ ކެޕްޓަން، ބްރޫނޯ ފެނާންޑޭސް އެވެ.
ސިޓީން އެއްވަރުކުރީ މެޗުގެ ފުރިހަމަވަގުތު ހަމަވާން މިނެޓަކަށްވެފައިވަނިކޮށް، އެ ޓީމުގެ ޕޯޗުގީޒް މިޑްފީލްޑަރު، ބެނާޑޯ ސިލްވާ ވައްދާލި ލަނޑުންނެވެ. އެ ޓީމުގެ ޒުވާން މިޑްފީލްޑަރު، އޮސްކާ ބޮބް ދިން ބޯޅައަކުން ބެނާޑޯ މި ލަނޑުޖެހީ ބޮލުންނެވެ.
ޕެނަލްޓީ ޝޫޓްއައުޓްގައި ދެ ޓީމުން ވެސް ފުރަތަމަ ފޮނުވާލި ފަސް ޕެނަލްޓީގެ ތެރެއިން ކާމިޔާބުކުރެވުނީ ހަތަރު ޕެނަލްޓީ އެވެ. ސިޓީ މޮޅުވި ޕެނަލްޓީ ކާމިޔާބުކޮށްދިނީ ނިމިދިޔަ ޔޫރޯ ފުޓްބޯޅަ މުބާރާތުގައި އިންގްލެންޑް އަތުން ސްވިޒަލޭންޑް ޕެނަލްޓީ ޖަހައިގެން ބަލިވިއިރު ޕެނަލްޓީ ނާކާމިޔާބުވި، މެނުއެލް އަކަންޖީ އެވެ.
ސިޓީގެ ޕެނަލްޓީތައް ކާމިޔާބުކޮށްދިނީ، އަކަންޖީ، ރުބެން ޑިއާޒް، މަތެއުސް ނޫނޭސް، ސަވީނިއޯ، ޑި ބްރޭނާ އާއި އާލިން ބްރައުޓް ހާލަންޑެވެ. އެ ޓީމަށް ނާކާމިޔާބުވީ އެންމެ ފުރަތަމަ ބެނާޑޯ ފޮނުވާލި ޕެނަލްޓީއެވެ.
ޔުނައިޓެޑްގެ ޕެނަލްޓީތައް ކާމިޔާބުކޮށްދިނީ، ފެނާންޑޭސް، ޑިއޯގޯ ޑަލޮޓް، ގަނާޗޯ، ކަސެމީރޯ އާއި ސްކޮޓް މެކްޓޮމިނޭ އަދި ލިސަންދްރޯ މާޓިނޭޒް އެވެ. އެ ޓީމުން ޕެނަލްޓީ ނާކާމިޔާބުވީ، ޖޭޑަން ސަންޗޯ އާއި ޖޮނީ އެވަންސް އަށެވެ.