އެފްރިކާގެ ފުޓްބޯޅަ (ސީއޭއެފް) ގެ ރައީސްކަން ދިގު މުއްދަތެއް ވަންދެން ކޮށްފައިވާ، އިއްސާ ހައްޔާޓޫ، އުމުރުން 77 އަހަރުގައި އަވަހާރަވެއްޖެއެވެ.
ކެމަރޫނަށް އުފަން، ހައްޔާޓޫ ވަނީ، ސީއޭއެފްގެ ރައީސް ކަމުގައި 29 އަހަރު ވަންދެން ހުންނަވާފައެވެ. ހައްޔާޓޫ ރައީސްކަމާ ހަވާލުވީ 1988 ގައެވެ. އަދި އެ މަގާމުން ވަކިވީ 2017 ގައެވެ.
ހައްޔާޓޫ އަވަހާރުވުމާ ގުޅިގެން، ފީފާގެ ރައީސް ޖިއާނީ އިންފަންޓީނޯ ވަނީ، އިންސްޓަގްރާމްގައި ޕޯސްޓެއް ކުރައްވައި ޒުވާން އުމުރުގައި އެތުލީޓެއް އަދި ބާސްކެޓްބޯޅަ ކުޅުންތެރިއެއްގެ ގޮތުގައި އުޅުއްވި ހައްޔާޓޫ އަށް ހަނދާނީ ބަސްތަކެއް ދޫކޮށްލައިފައެވެ.
"ކުރީގެ ސީއޭއެފްގެ ރައީސް، ކުރީގެ ފީފާގެ ވަގުތީ ރައީސް، ފީފާގެ ނައިބު ރައީސް އަދި ފީފާ ކައުންސިލްގެ މެންބަރު، އިއްސާ ހައްޔާޓޫ އަވަހާރަވެއްޖެކަން އެނގުމުން ވަރަށް ބޮޑަށް ހިތާމަކުރަން،" އިންފަންޓީނޯ ކުރެއްވި ޕޯސްޓްގައިވެއެވެ.
އިންފަންޓީނޯގެ ޕޯސްޓްގައި ވަނީ، ކުޅިވަރަށް ވަރަށް ލޯބިކުރައްވާ ސަޕޯޓަރެއްގެ ގޮތުގައި، ހައްޔާޓޫގެ އުމުރުފުޅު ހޭދަކުރެއްވީ ކުޅިވަރު ހިންގުމުގެ ދާއިރާގައި ކަމަށެވެ.
އިންފަންޓީނޯ ވަނީ، ފީފާގެ ފަރާތުން، އެމަނިކުފާނުގެ އާއިލާއަށާއި، ރަހުމަތްތެރިންނަށާއި، އެކުގައި މަސައްކަތްކުރެއްވި ބޭފުޅުން އަދި އެމަނިކުފާނު ދަންނަ އެންމެހައި ފަރާތްތަކަށް ތަޢުޒިޔާ ރައްދުކުރައްވާފައެވެ.
ހައްޔާޓޫ ވަނީ، ދުނިޔޭގެ ފުޓްބޯޅައިގެ މައި އިދާރާ، ފީފާގެ މުހިންމު މަޤާމުތަކެއްވެސް ފުރުއްވާފައިވެއެވެ. އެގޮތުން، 1990 އިން 2017 އަށް ފީފާގެ އެގްޒެކެޓިވް ކޮމިޓީގެ (މިހާރު ކިޔާގޮތުން ފީފާ ކައުންސިލް) މެންބަރުކަން އަދާކޮށްފައިވެއެވެ.
މީގެއިތުރުން، ހައްޔާޓޫ ވަނީ، 2015 އިން 2016 އަށް އޭރުގެ ފީފާގެ ރައީސް ސެޕް ބްލެޓާ ސަސްޕެންޑް ކުރެމުން، ކުރު މުއްދަތަކަށް ފީފާގެ އެކްޓިންގ ރައީސްކަންވެސް ކުރައްވާފައިވެއެވެ.
2016 ގައި ފްރާންސްގެ މީޑިއާ ކުންފުންޏެއް ކަމަށްވާ ލަގާދޭރާއެކު އެފްރިކާގެ ފުޓްބޯޅައިގެ އެންމެ ބޮޑު ޑީލް ސޮއިކުރުމާ ގުޅިގެން ފީފާގެ ކޯޑް އޮފް އެތިކްސްއާ ހިލާފުވުމުން، 2021 ވަނަ އަހަރުގެ އޯގަސްޓް މަހުގައި ފީފާ އިން އެއްއަހަރު ދުވަހަށް ހައްޔާޓޫ ސަސްޕެންޑްކުރިއެވެ. ނަމަވެސް މި އަދަބު ވަނީ ޖެހިގެން އައި އަހަރުގެ ފެބްރުއަރީ މަހު ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އިން ބާޠިލްކޮށްފައެވެ.