ރުމޭނިއާގެ ފުޓްބޯޅަ ޓީމުގެ ކޯޗުގެ މަގާމުގައި ކުރިން ހުރި އެޑްވާޑް އިއޮޑަނެސްކޫގެ ބަދަލުގައި އެ މަގާމަށް މިރްޗެއާ ލުޗެސްކޫ އައްޔަންކޮށްފައިވާ ކަމަށް އެ ގައުމުގެ ފުޓްބޯޅަ ފެޑެރޭޝަން (އެފްއާރްއެފް) އިން ބުނެފިއެވެ.
މިއީ ލުޗެސްކޫ، 79، ރުމޭނިއާގެ ކޯޗުގެ މަގާމާ ހަވާލުވާ ދެވަނަ ފަހަރެވެ. މީގެކުރީން، އޭނާ ވަނީ 1981 އިން 1986 އަށް އެ ޓީމަށް އިރުޝާދު ދީފައެވެ. އޭގެފަހުން، އިޓަލީގެ އިންޓަ މިލާނާއި، ތުރުކީގެ ސުޕަ ލީގުގެ ގަލަތަސާރޭގެ އިތުރުން ޔޫކްރޭންގެ ޝަހުތަރު ޑޮނެސްކް ފަދަ ކްލަބުތަކަށާއި، ތުރުކީގެ ގައުމީ ޓީމަށް ވެސް ލުޗެސްކޫ ވަނީ ކޯޗުކޮށްދީފައެވެ.
ރުމޭނިއާގެ ކޯޗުގެ މަގާމަށް އައްޔަންކުރުމާ ގުޅިގެން ލުޗެސްކޫ ބުނީ، އޭނާ އަކީ ސައްތައިން ސައްތަ ރުމޭނިއާގެ ފުޓްބޯޅައިން އުފެދިފައިވާ މީހެއް ކަމަށާއި، އެ ގައުމުގައި މިހާރު އޮތް ޖީލުގެ ކުޅުންތެރިންނާ މެދު އޭނާ އަށް ވަރަށް ބޮޑު އިތުބާރަކާއި ޔަގީންކަން އެބައޮތް ކަމަށެވެ. އަދި އެ ކުޅުންތެރިންނަށް އިތުރަށް ކުރިއަރައިގެންދިއުމުގެ ފުރުޞަތު ވަރަށް ބޮޑު ކަމަށްވެސް ލުޗެސްކޫ ވަނީ ބުނެފައެވެ.
އެންމެފަހުން، ޔޫކްރޭންގެ ޑީނަމީ ކިއެވްގެ ކޯޗުކަން ކުރި ލުޗެސްކޫ ވަނީ، ރުމޭނިއާގެ ގައުމީ ޓީމާއެކު ދެ އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. އެފްއާރްއެފް އިން ބުނީ، އޭގެ މައިގަނޑު މަޤްޞަދަކީ 2026 ވަނަ އަހަރުގެ ވޯލްޑް ކަޕަށް އެ ޓީމު ކޮލިފައިކޮށްދިނުން ކަމަށެވެ.
ރުމޭނިއާގެ ކުރީގެ ކޯޗު، އިއޮޑަނެސްކޫގެ އިރުޝާދުގެ ދަށުން އެ ޓީމުން ވަނީ މިދިޔަ 24 އަހަރުގެ ތެރޭގައި ފުރަތަމަ ފަހަރަށް ޔޫރޯ ފުޓްބޯޅަ މުބާރާތުގެ ނޮކްއައުޓް ބުރަށް ގެންގޮސްދީފައެވެ. ނަމަވެސް، ގަދަ 16 ގެ ބުރުގައި ނެދަލެންޑްސް އަތުން ވަނީ ބަލިވެފައެވެ.