ޗިލީގެ ފޯވާޑް، އަލެކްސިސް ސަންޗެޒް އެނބުރި އޭނާގެ ކުރީގެ ކުލަބު އުދިނޭޒީ އަށް ދިއުމަށް ލިބިފައިވާ ހުށަހެޅުމާމެދު ވިސްނަމުންދާ ކަމަށް ހަބަރުތައް ބުނެފިއެވެ.
ސަންޗޭޒް، 35، ގެ އެންމެ ފަހުގެ ކްލަބު އިންޓަ މިލާން އާއެކު ހަދާފައިވާ އެއްބަސްވުން ނިމިދިޔަ ސީޒަނަށްފަހު ހަމަވުމުން މިހާރު ހުރީ ފްރީ އޭޖެންޓެއްގެ ގޮތުގައެވެ.
އުދިނޭޒީ އިން ސަންޗޭޒް އަށް ހުށަހަޅާފައިވާ ކޮންޓްރެކްޓްގެ މާބޮޑު ތަފްޞީލެއް ހާމަކޮށްފައިނުވީނަމަވެސް، ދެ ފަރާތުން ވެސް ބޭނުންވަނީ އޭނާ އެނބުރި އެކްލަބަށް ދިއުމަށް މަގުފަހިކުރުމަށް ހައްލެއް ހޯދުމަށް ކަމަށް ހަބަރުތައް ބުނެއެވެ.
އާޖެންޓީނާގެ ރިވާ ޕްލޭޓުން 2008 ވަނަ އަހަރުގައި އުދިނޭޒީއާ ގުޅުނު ސަންޗޭޒް ވަނީ އެ ޓީމަށް ކުޅުނު 112 މެޗުގައި 21 ލަނޑުޖަހައި، އިތުރު 20 ގޯލްޖެހުމަށް އެހީތެރިވެދީފައެވެ. އުދިނޭޒީގައި ދެއްކި މޮޅު ކުޅުމާއެކު ބާސެލޯނާ އަށް ބަދަލުވެ، އެންމެ ރަނގަޅު ކުޅުން ނުދެއްކުނުނަމަވެސް އެ ޓީމާއެކު 2012-13 ވަނަ އަހަރުގެ ސްޕެނިޝް ލީގު ކާމިޔާބުކޮށްފައިވެއެވެ. ސަންޗޭޒް ވަނީ ބާސެލޯނާ އަށް ކުޅުނު 141 މެޗުގައި 46 ލަނޑުޖަހައިފައެވެ.
އެއަށްފަހު، ސަންޗޭޒްގެ ވިދުން އެންމެ ގަދަވީ ބާސެލޯނާ ދޫކޮށް އާސެނަލަށް ބަދަލުވި ހިސާބުންނެވެ. އޭރުގެ އާސެނަލްގެ ކޯޗު، އާސެން ވެންގާގެ އިރުޝާދުގެ ދަށުން އެ ޓީމާއެކު ސަންޗޭޒް ވަނީ މޮޅު ކުޅުމެއްދައްކައި ދެ ފަހަރު އެފްއޭ ކަޕް ކާމިޔާބުކޮށްފައެވެ. އަދި އޭގެފަހުން، މެންޗެސްޓާ ޔުނައިޓެޑަށް ބަދަލުވެ، އެންމެ އެދެވޭ ކުޅުމެއް ދެއްކޭ ގޮތްނުވެ، ފުރަތަމަ ލޯން އެއްބަސްވުމެއްގެ ދަށުން އިންޓަ އަށް ބަދަލުވުމަށްފަހު، ފަހުން ދާއިމީ އެއްބަސްވުމެއްގައި އެ ޓީމާއެކު ރަނގަޅު ކުޅުމެއް ދައްކައި، ގިނަ ކާމިޔާބީތަކެއް ހާސިލްކޮށްފައިވެއެވެ.
2022-23 ވަނަ އަހަރު ސީޒަނަށް މާސޭއަށް ލޯނު އުސޫލުން ކުޅުމަށްފަހު، ފާއިތުވި ސީޒަނުގައި އިންޓަ އަށް އެނބުރިއައިސް 23 މެޗުގައި 2 ގޯލު ޖަހައިދިނެވެ. މިދިޔަ ސީޒަނުގައި އިންޓަ އާއެކު ވަނީ އިޓަލިން ލީގު ޗެމްޕިއަންކަން ހޯދައިފައެވެ. އޭނާ ވަނީ ޤައުމީ ޓީމަށް ކުޅުނު 166 މެޗުގައި 51 ލަނޑުޖަހައިފައެވެ. އޭނާ އަކީމ ޗިލީގެ ތާރީޚުގައި އެންމެ ގިނަ ލަނޑުޖަހައިފައިވާ ކުޅުންތެރިޔާއެވެ.