މިހާރު ޕެރިހުގައި ކުރިއަށްދާ އޮލިމްޕިކްސްގެ ފިރިހެނުންގެ ފުޓްބޯޅައިގެ އިވެންޓްގެ ސެމީ ފައިނަލްގައި ރޭ މޮރޮކޯއާ ސްޕެއިން ބައްދަލުކުރި މެޗުގެ ފުރަތަމަ ހާފުގައި ރެފްރީ އަށް އަނިޔާވެގެން ބަދަލުކޮށްފިއެވެ.
މޮރޮކޯ އަތުން ފަހަތުންއަރައި 1-2 އިން ސްޕެއިން މޮޅުވި މި މެޗުގައި އެންމެ ފުރަތަމަ ފެނިގެންދިޔަ ބަދަލަކީ، މެޗުގެ އިސް ރެފްރީ އުޒްބެކިސްތާނުގެ އިލްގިޒް ޓަންޓަޝެވް އަށް ފުރަތަމަ ހާފުގެ 15 ވަނަ މިނެޓުގައި ބަދަލުކުރަންޖެހުމެވެ.
ރެފްރީ ޓަންޓަޝެވް ބަދަލުކުރަން ޖެހުނީ، އެނގުމަކާއި ނުލައި ދަނޑުގެ މެދުތެރެއިން ސްޕެއިނުގެ ޑިފެންޑަރު، މާކް ޕުބިލްގެ ގައިގަ ޖެހި ވެއްޓިގެން، ލިބުނު އަނިޔާއަކާ ގުޅިގެންނެވެ.
ޕުބިލް ވެއްޓުނީ މޮރޮކޯގެ ކުޅުންތެރިއަކު އޭނާ ކޮށްޕާލުމުންނެވެ. އޭނާ ވެއްޓިފައި ޖެހުނީ ޓަންޓަޝެވްގެ ކަނާތު ފައިގައެވެ. މިއާއެކު، ކުޅުން ހުއްޓާލުމަށްފަހު ދަނޑުމަތީގައި ރެފްރީއަށް ފަރުވާދިނެވެ. ނަމަވެސް، ޓަންޓަޝެވް އަށް އިތުރަށް ކުރިއަށްގެންދެވޭ ގޮތް ނުވުމުން ބަދަލުގައި ހަތަރުވަނަ އޮފިޝަލް، ސްވިޑެންގެ ގްލެން ނީބާގް ވަނީ ދަނޑަށް އަރާފައެވެ.