އެންމެ ފަހުގެ ޑަޗް ކަޕް ޗެމްޕިއަން، ފެޔަނޫޑުން ޕެނަލްޓީ ޝޫޓްއައުޓްގައި ލީގު ޗެމްޕިއަން، ޕީއެސްވީ އެއިންދޯވަން ބަލިކޮށް، ސީޒަން ހުޅުވުމަށް ކުޅޭ ޔޯހަން ކްރައިފް ޝީލްޑް ކާމިޔާބުކޮށްފިއެވެ.
މިއީ ފެޔަނޫޑްގެ ފަސްވަނަ ޔޮހާން ކްރައިފް ޝީލްޑެވެ. ވޭތުވެދިޔަ ތިން އަހަރުގެ ސުޕަ ކަޕް މެޗު ކާމިޔާބުކޮށްފައިވަނީ ޕީއެސްވީ އިންނެވެ.
ސީޒަން ހުޅުވުމުގެ ގޮތުން ކޮންމެ އަހަރަކު ކުޅެމުން އަންނަ މެޗު ފެށިގެން ނުވަވަނަ މިނެޓުގައި ކުރީން ލީޑްނެގީ ޕީއެސްވީ އިންނެވެ. އެހެންނަމަވެސް، އޭގެ ފަހުން، ތިން ފަހަރެއްގެ މަތީން އެ ޓީމަށް ވަނީ ނަތީޖާ އެއްވަރުކުރަންޖެހިފައެވެ. މި މެޗު ނިމިގެންދިޔައީ 4-4 އިން ދެ ޓީމު އެއްވަރުވެގެންނެވެ. ޕެނަލްޓީގައި ފެޔަނޫޑް ކުރިހޯދީ 4-2 އިންނެވެ.
ފިލިޕްސް ސްޓޭޑިއޯންގައި ރޭ ކުޅުނު މި މެޗުގައި ޕީއެސްވީގެ ލަނޑުތައް ޖަހައިދިނީ ލޫކް ޑި ޔޯން ދެ ގޯލާއި، ލޫކަސް ޓިލް އާއި ނޯއާ ލޭންގް އެވެ. ފެޔަނޫޑްގެ ގޯލްތައް ޖަހައިދިނީ ސަންޓިއާގޯ ގިމެނޭޒް ދެ ގޯލާއި، ބާޓް ނިއުކޫޕް އާއި އެންޓޮނީ މިލަމްބޯ އެވެ.
ޕެނަލްޓީ ޝޫޓްއައުޓްގައި ޕީއެސްވީން ފޮނުވާލި ހަތަރު ޕެނަލްޓީގެތެރެއިން ކާމިޔާބުކުރެވުނީ ދެ ޕެނަލްޓީ އެވެ. އެއީ ރިކާޑޯ ޕެޕީ އާއި މަލިކް ޓިލްމަންގެ ޕެނަލްޓީއެވެ. އެ ޓީމުގެ ޔޯހަން ބަކަޔޯކޯ އާއި ގޫސް ޓިލްގެ ޕެނަލްޓީ ކާމިޔާބުނުކުރެވުނެވެ.
ފެޔަނޫޑުން ފޮނުވާލި ހަތަރު ޕެނަލްޓީ ވެސް ކާމިޔާބުކުރިއެވެ. އެ ޓީމުގެ ޕެނަލްޓީތައް ފޮނުވާލީ ލުޓްޝަރެލް ގީރްޓްރުއިޑާ، އަޔާސެ ޔުއެޑާ، ޑޭވިޑް ހެންކޯ އާއި ލޫކާ އިވަނުސެޗް އެވެ.
އައު ސީޒަނުގެ ލީގުގައި އެންމެ ފަހުގެ ޗެމްޕިއަން، ޕީއެސްވީ އަށް އޮތީ އާރްކޭސީ ވާލްވިކްއާ ދެކޮޅަށް މި މަހުގެ 11 ވަނަ ދުވަހު އަމިއްލަ ދަނޑުގައި ކުޅުމަށް ހަމަޖެހިފައިވާ މެޗެވެ. އޭގެ އެއްދުވަސް ކުރީން، އަމިއްލަ ދަނޑުގައި ފެޔަނޫޑް ނިކުންނާނީ ވިލެމް ޓޫއާ ދެކޮޅަށެވެ.