ކަނޑުމަތީގެ 6 ހާދިސާ، 3 ހާދިސާއަކާ ގުޅިގެން މިވަގުތުވެސް ދަނީ އެހީތެރިކަންދެމުން

މޫސުން ގޯސްވެ ކަނޑު ގަދަވުމުގެ ސަބަބުން ރިޕޯޓްކޮށްފައިވާ 3 ޙާދިސާއަކާ ގުޅިގެން އެހީތެރިކަން ފޯރުކޮށްދިނުމަށް ހަރަކާތްތެރިކަމުންދާކަމަށް އެމްއެންޑީއެފުން ވިދާޅުވެއްޖެއެވެ.

މޫސުން ގޯސްވުމުގެ ސަބަބުން ކަނޑުމަތީގެ 6 ހާދިސާއެއް ރެއިން ފެށިގެން ރިޕޯޓްކޮށްފައިވާކަމަށް އެމްއެންޑީއެފް އިން ވަނި ވިދާޅުވެފައެވެ.

މީގެތެރެއިން 3 ޙާދިސާއަކާ ގުޅިގެން އެމްއެންޑީއެފްގެ ސެންޓްރަލް އޭރިއާ ކޮމާންޑް، ކޮސްޓްގާޑް ތާޑް ސްކޮޑްރަންއިން ދަނީ ހަރަކާތްތެރިވަމުންނެވެ. ނަމަވެސް ހާދިސާތަކުގެ ތަފްސީލް އަދި ޙިއްސާކޮށްފައެއް ނުވެއެވެ.

އިއްޔެއިން ފެށިގެން ރާއްޖޭގެ ހުރިހާ ސަރަޙައްދުތަކަށްވެސް ދަނީ ވިއްސާރަ ކުރަމުންނެވެ. މިއަދުވެސް ރާއްޖޭގެ އެކި ހިސާބުތަކަށް ގުގުރުމާއެކު ބޯކޮށް ވާރޭވެހޭނެކަމަށް ލަފާކުރެވޭކަމަށް މޫސުމާ ބެހޭ ޤައުމީ އިދާރާއިން ލަފާކުރެއެވެ. އެގޮތުން ތ.އަތޮޅުން ފެށިގެން ގދ. އަތޮޅަށް ވައިޓް އެލަރޓްވެސް ވަނީ ނެެރެފައިވެއެވެ.

8 މޭލާ 18 މޭލާ ދެމެދުގެ ބާރުމިނުގައި ވައި ޖެހޭނެކަމަށް ލަފާކޮށްފައިވާއިރު، ވިލާގަނޑުގައި 40 މޭލަށް ވައިގަދަވުން އެކަށީގެންވެއެވެ. ކަނޑުގެ ރާޅުގެ އުސްމިން ހުންނާނީ 4 ފުޓާ 7 ފޫޓާ ދެމެދުއެވެ. ކަނޑުތައް އާދައިގެވަރަލަށް ގަދަވާނެކަމަށް މޫސުމާ ބެހޭ ޤައުމީ އިދާރާއިން ވަނީ ވިދާޅުވެފައެވެ.