ލީޑްސް ޔުނައިޓެޑަށް ކުޅެމުންއައި ނެދަލެންޑްސްގެ ވިންގް، ކްރައިސެންސިއޯ ސަމަރވިލްގެ ސޮއި ހޯދުމުގައި ވެސްޓް ހޭމް ޔުނައިޓެޑުން ކާމިޔާބުހޯދައިފިއެވެ.
ސަމަރވިލް، 22، ވަނީ ވެސްޓް ހޭމް އާއެކު ފަސް އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން، އިތުރު އެއްއަހަރަށް ކޮންޓްރެކްޓް އައު ކުރުމުގެ ފުރުޞަތުވެސް ލިބިގެންވާ ކަމަށް ވެސްޓް ހޭމުން ބުނެއެވެ.
ފަހުގެ މީޑިއާ ރިޕޯޓްތައް ބުނާގޮތުން، ވޭސްޓް ހޭމުން ވަނީ ސަމަރވިލްގެ ސޮއި ހޯދުމަށް ލީޑްސް އަށް ގާތްގަނޑަކަށް 25 މިލިއަން ޕައުންޑް (32 މިލިއަން އެމެރިކާ ޑޮލަރު) ދައްކަން އެއްބަސްވެފައެވެ.
މީގެ ހަތަރު ވަރަކަށް އަހަރުކުރީން، ލީޑްސްއާ ގުޅުނު ސަމަރވިލް ވަނީ ނިމިދިޔަ ސީޒަނުގައި އިނގިރޭސި ދެވަނަ ޑިވިޝަން (ޗެމްޕިއަންޝިޕް) ގެ އަހަރުގެ މޮޅު ކުޅުންތެރިޔާގެ މަގާމް ހާސިލްކޮށްފައެވެ. މިދިޔަ ސީޒަނުގައި އޭނާ ވަނީ 19 ލަނޑުޖަހައި، އިތުރު ނުވަ ލަނޑުޖެހުމަށް އެހީތެރިވެދީފައެވެ.
އައު ސީޒަނުގެ ޕްރިމިއާ ލީގުގައި ވެސްޓް ހޭމުން ކުޅުމަށް ހަމަޖެހިފައިވާ ފުރަތަމަ މެޗުގައި މި އޯގަސްޓް މަހުގެ 17 ވަނަ ދުވަހު އަމިއްލަ ދަނޑުގައި ނިކުންނާނީ އެސްޓަން ވިލާއާ ދެކޮޅަށެވެ.