ފްރާންސްގެ ޕެރިހުގައި މިހާރު ކުރިއަށްދާ އޮލިމްޕިކްސްގެ ދުވުމުގެ ފަސްވަނަ މަގާމާއެކު ރާއްޖޭގެ އިބާދުﷲ އާދަމްގެ ދުވުން ނިންމާ ޓައިމިންގައި ކުރިއެރުމެއް ހޯދައިފިއެވެ.
އިބާދުﷲ ދުވެފައިވަނީ 100 މީޓަރު ދުވުމުގެ ޕްރިލިމިނަރީ ހީޓު ހަތަރެއްގައެވެ. މި ދުވުން އިބާދުﷲ ނިންމާފައިވަނީ 10.55 ސިކުންތުންނެވެ. މި ޓައިމިން އަކީ އޮލިމްޕިކްސްގެ އެއްވަނަ ރައުންޑަށް ކޮލިފައިވެވޭ ވަރުގެ ޓައިމިންއެއް ނޫނެވެ.
ހީޓުގެ އެއްވަނަ ހޯދި ހައިޓީގެ ކްރިސްޓޮފާ ބްރޮޒޯ އެވެ. އޭނާގެ ޓައިމިންއަކީ 10.26 ސިކުންތެެވެ. ދެވަނަ ހޯދި އެންގޯލާގެ މާކޯސް ސަންޓޯސް ރޭސް ނިންމީ 10.31 ސިކުންތުންނެވެ. އަދި ތިންވަނަ ހޯދި ކޮމޮރޯސްގެ ހަކީމް މަރޫފޫގެ ޓައިމިންއަކީ 10.44 ސިކުންތެެވެ.
އެއްވަނަ ރައުންޑަށް ކޮލިފައިވި އެންމެ ލަސް ވަގުތަކީ 10.54 ސިކުންތެވެ. އެހެންކަމުން އިބާދުﷲ އަށް ފުރުސަތު ގެއްލުނީ ގާތްގަނޑަކަށް 0.01 ސިކުންތުގެ ފަރަގަކުންނެވެ.
އޮލިމްޕިކްސްގެ ޕްރިލިމިނަރީ ބުރު ފަހަނައަޅައިގެން އެންމެ ފަހުން ދުވެފައިވަނީ ހަސަން ސާއިދެވެ. ބްރެޒިލްގެ ރިއޯގައި 2016 ވަނަ އަހަރު ކުރިއަށްދިޔަ އޮލިމްޕިކްސްގައި ސާއިދު ވަނީ ޕްރިލިމިނަރީ ހީޓުގެ އެއްވަނައިގެ ގޮތުގައި ފުރަތަމަ ބުރުން ފުރުސަތު ހޯދާފައެވެ. ފުރަތަމަ ބުރުގައި އޭނާ ދުވެފައިވަނީ ދުނިޔޭގެ އެންމެ ބާރު ދުވުންތެރިޔާ އުސެއިން ބޯލްޓް އާއި އެއް ހީޓެއްގައެވެ.
ރާއްޖޭގެ އަޒްނީމް އަހުމަދު ވަނީ 2012 ވަނަ އަހަރުގެ ލަންޑަން އޮލިމްޕިކްސްގެ ފުރަތަމަ ބުރުން ޖާގަ ހޯދާފައެވެ. މި ނަތީޖާއާއެކު އިބާދުﷲ އަށް ވަނީ އޮލިމްޕިކްސް ނިމިފައެވެ.