ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)، ބީޗް ވޮލީބޯލް ޗެލެންޖު ކަޕުގެ ޗެމްޕިއަންކަން ޖެހިޖެހިގެން ދެވަނަ ފަހަރަށް ރާއްޖޭގެ އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)ގެ ޕެއާ ދިފާއުކޮށްފި އެވެ.
މުބާރާތުގެ ޗެމްޕިއަންކަން ރާއްޖޭގެ ޕެއާ ހޯދާފައިވަނީ ފައިނަލުގައި ނޭޕާލުގެ އެއްވަނަ ޕެއާ މަން ބަހާދުރު އާއި ދިލް ބަހާދުރުގެ ޕެއާ ބަލިކޮށްގެންނެވެ.
ފައިނަލް އެޑަމް އާއި ކުޑަކާއްޓެގެ ޕެއާ މޮޅުވެފައިވަނީ 21-19، 21-17 އިންނެވެ. ވާދަވެރިކޮށް ފެނުނު މި މެޗުގައި ނޭޕާލުގެ މަން އާއި ދިލްގެ ޕެެއާއަށް ރާއްޖޭގެ މައްޗަށް އަތްގަދަކުރެވޭ ގޮތެއް ނުވިއެވެ. އެއަށްވުރެ ދިވެހި ޕެއާ ފެނުނީ ހުށިޔާރުކޮށެވެ.
އެޑަމް އާއި ކުޑަކާއްޓެގެ ފަރާތުން މި މެޗުގައިވެސް ފެނުނީ ތަޖުރިބާގެ ބޭނުންކުރި ތަނެވެ. މިފަހަރުގެ މުބާރާތް މި ޕެއާ ކާމިޔާބުކޮށްފައި ވަނީވެސް ކުޅުނު ހުރިހާ މެޗަކުން މޮޅުވެގެންނެވެ. އެގޮތުން ގްރޫޕްގެ ހަތަރު މެޗާއި ސެމީން ހިމެނެއެވެ.
މީގެ ކުރިން، އެޑަމް އާއި ކުޑަކާއްޓެގެ ޕެއާ އިން، ކާވާގެ ފުރަތަމަ ބީޗް މުބާރާތް ކާމިޔާބުކުރީ 2022 ވަނަ އަހަރު ޑިސެމްބަރު މަހުގައެވެ. ހަ ގައުމުން އަށް ޕެއާ ވާދަކުރި އެ މުބާރާތުގެ ފައިނަލުގައި އެޑަމް އާއި ކުޑަކާއްޓެގެ ޕެއާ ނުކުތީ މިފަހަރު ވެސް ފައިނަލުގައި ކުޅުނު މަން އާއި ދިލްގެ ޕެއާއާ ދެކޮޅަށެވެ. އެޑަމް އާއި ކުޑަކާއްޓެގެ ޕެއާ އިން އެފަހަރު މޮޅުވީ، 21-13، 21-19 ސެޓުތައް ގެންގޮސްގެންނެވެ.