އައިބީސީ ވޯލްޑް ޓުއާގައި ހިމެނޭ ވިޒިޓް މޯލްޑިވްސް ޕްރޯ 2024 ގެ ހީޓުތައް މިއަދު ފަށައިފިއެވެ.
މުބާރާތުގެ ފުރަތަމަ ދުވަހު ދިވެހި ގިނަ އެތުލީޓުންތަކެއް ވާދަކުރާ ހީޓުތަކެއް ފެނިގެންދާނެ އެވެ. މީގެތެރޭގައި އެންމެ ފަހުން ބޭއްވި ދެ މުބާރާތުގެ ޖޫނިއާ ކެޓަގަރީން ރާއްޖެއަށް ކާމިޔާބީތަކެއް ހޯދައިދިން އާމިން އުމަރު މޫސާ އާއި އެއްވަނަ ބޮޑީބޯޑަރ އަލީ ހުޝްރުވާން (ކުޑަ އައްޔަ) ހިމެނެއެވެ.
ވިޒިޓް މޯލްޑިވްސް ޕްރޯ ރަސްމީކޮށް ފެށީ އިއްޔެ މިކަމަށް ހާއްސަކޮށް ރާޅުގަނޑުގައި ބޭއްވި ރަސްމިއްޔާތެއްގައެވެ. މި ރަސްމިއްޔާތުގައި މި މުބާރާތުގައި ބައިވެރިވާ އެތްލީޓުންގެ އިތުރުން މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) ގެ މެމްބަރުންނާއި ކުޅިވަރާއި ހަށިހެޔޮކަމާއިބެހޭ ވަޒީރު އަބްދުﷲ ރާފިއު ވެސް ވަނީ ބައިވެރިވެވަޑައިގެންފައެވެ.
މިއަހަރުގެ ވިޒިޓް މޯލްޑިވްސް ޕްރޯގައި 14 ގައުމަކުން 86 އެތުލީޓުން ވާދަކުރެއެވެ. މީގެތެރޭގައި ދުނިޔޭގެ ޗެމްޕިއަނުންނާއި ރޭންކިންގެ އެންމެ ކުރީސަފުގައި ގުނާލެވޭ އެތުލީޓުން ހިމެނެއެވެ. ރާއްޖެއިން މި މުބާރާތުގައި 15 އެތްލީޓުން ވާދަކުރާނެއެވެ.