އޭޝިއާގެ ސެންޓްރަލް ޒޯން ވޮލީބޯލް އެސޯސިއޭޝަން (ކާވާ) ގެ ބީޗުވޮލީ މުބާރާތުގެ ފައިނަލްގައި ހޮނިހިރު ދުވަހު (މިއަދު) ނޭޕާލާއި ދެކޮޅަށް މިއަދު މެންދުރު ފަހު 14:30 ގައި ނިކުންނާނެ އެވެ.
ކާވާ ބީޗް ވޮލީ މުބާރާތުން 2022 ގައި ރަން މެޑަލް ހޯދި އާދަމް ނަސީމާއި އިސްމާއީލް ސާޖިދު (ކުޑަ ކާއްޓޭ) ގެ ޕެއާ ނޭޕާލްގެ ޕެއާ އާއި ދެކޮޅަށް ނިކުންނައިރު މި މި މެޗު ވެފައިވަނީ ދިވެހި ކުޅުންތެރިންނަށް އިންތިހާއަށް އުންދަގޫ މެޗަކަށެވެ.
މުބާރާތް ކުޅެމުންދާ ބޫޓާންގެ މޫސުމުގެ ސަބަބުން ދިވެހި ކުޅުންތެރިންނަށް ތަފާތު ސިއްހީ މައްސަލަތައް ކުރިމަތިވެފައިވާ ކަމަށް ގައުމީ ޓީމުގެ އޮފިޝަލުން ވިދާޅުވިއެވެ. ބޫޓާންގެ މިހާރުގެ ފިނިހޫނުމިނަކީ 19 ޑިގްރީ ނަމަވެސް މެޗު ކުޅެމުންދާ ސަރަހައްދުގެ ފިނިހޫނުމިނަކީ 14 ޑިގްރީ އެވެ.
ކަނޑުގެ ސަތަހައަށް ވުރެން ހަތަރު ފޫޓް މަތީގައި ދިރިއުޅެމުންދާ ދިވެހި ކުޅުންތެރިން މި މެޗު ކުޅެމުންދަނީ ހަތް ހާސް ފޫޓް މަތީގައިވާ ކޯޓެއްގައެވެ. އެހެންކަމުން ދިވެހި ކުޅުންތެރިންނަށް ހުމުގެ ރޯގާ އާއި އާދަޔާ ހިލާފަށް ފިނިވުމުގެ ސަބަބުން ކަރުން ލޭއައުން ފަދަ މައްސަލަތައް ވަނީ ކުރިމަތިލާން ޖެހިފައެވެ. މެޗު ކުޅެމުންދާ ސަރަހައްދަށް ވާރޭ ވެހެމުންދާތީ އާއެކު ކޯޓުގެ ކޮންޑިޝަން ވަނީ ވަރަށް ބޮޑަށް ބަދަލުވެފައެވެ.
ބީޗު ވޮލީއަކީ މަޑު ފަސްގަނޑެއްގައި ކުޅޭ ކުޅިވަރެއް ނަމަވެސް ވާރޭ ވެހިވެހި އޮތުމުގެ ސަބަބުން ކޯޓުގެ ވެލިގަނޑު ހަރުވެ، ކުޅުންތެރިންނަށް ކުޅެން ވަނީ ވަރަށް އުނދަގޫވެފައެވެ. ކުޅުންތެރިން ތިބޭ ހޮޓަލަށްވުރެ މަތީގައި މެޗު ކުޅޭ ކޯޓު ހުރުމާއެކު ކުޅުންތެރިން އެ ސަރަހައްދަށް ދާންޖެހިފައި ވަނީވެސް ދިހަ މިނެޓް ހިނގާފައިކަމުން ކުޅުންތެރިންނަށް އެކަމުގެ ސަބަބުންވެސް ގިނަ ދަތިތަކާއި ވަނީ ކުރިމަތިލާން ޖެހިފައެވެ.
ފައިނަލް މެޗަށް ނިކުންނައިރު މި ހުރިހާ ދަތިތަކާއެކު ވެސް ދިވެހި ކުޅުންތެރިން ނިކުންނާނީ ގައުމަށްޓަކާ ރަންމެޑަލް ހޯދުމުގެ ވަރުގަދަ އަޒުމުގައި ކަމަށް ޓީމުން ބުނެއެވެ.
ފައިނަލް މެޗުގެ އިތުރުން މިއަދު ރާއްޖޭގެ ދެ ޕެއާ ތިންވަނަ ހޮވާ މެޗަށް ނިކުންނާއެވެ. ރާއްޖޭގެ ޓީމު ދޭއްގައި އަހުމަދު މުހައްމަދު (ކޯކޭ) އާއި މުހައްމަދު އަލީ (ޑެންޒޯ) ނުކުތީ ތަޖިކިސްތާނު ޓީމާއި ދެކޮޅަށެވެ.
ޒީނިއާ އާއި އަރީޝާގެ ޕެއާ ތިން ވަނަ ހޮވާ މެޗުގައި ބައްދަލުކުރާނީ އުޒްބަކިސްތާންގެ ޕެއާ އާއި ދެކޮށެވެ،.