ފްރާންސްގެ ޕެރިހުގައި ކުރިއަށްދާ އޮލިމްޕިކްސްގެ ފެތުމުގެ އިވެންޓްގައި ވާދަކޮށް ރާއްޖޭގެ ފެތުންތެރިޔާ މުހައްމަދު އާން ހުސެއިން ގައުމީ ރިކޯޑަކާއެކު ވާދަކުރި ހީޓުގެ ތިންވަނަ ހޯދައިފިއެވެ.
އުމުރުން 19 އަހަރުގެ އާން ވާދަކޮށްފައިވަނީ އޮލިމްޕިކްސްގެ 50 މީޓަރު ފްރީ ސްޓައިލް އިވެންޓްގެ ހީޓު ހަތަރެއްގައެވެ. ބުރާސްފަތި ދުވަހު ކުރިއަށްދިޔަ ހީޓު ހަތަރެއްގައި ވާދަކޮށް އާން ރޭސް ނިންމާފައިވަނީ ގައުމީ ރިކޯޑު ޓައިމިންއެއް ކަމަށްވާ 24.22 ސިކުންތުންނެވެ.
މި ރިކޯޑު މީގެކުރިންވެސް އޮތީ އާން އަތުގައެވެ. އެއީ މިއަހަރުގެ މެއި މަހު މެލޭޝިއާގައި ކުރިއަށްދިޔަ މުބާރާތުގައި 24.28 ސިކުންތުން ނިންމައިގެންނެވެ. އާން ގައުމީ ރިކޯޑު އައުކޮށްފައިވަނީ ހަ މިލިސިކުންތުގެ ކުރިއެރުމަކާއެކު އެވެ.
އާން ވާދަކުރި ހީޓުގައި ޖުމްލަ އަށް ފެތުންތެރިން ވަނީ ވާދަކޮށްފައެވެ. މި ހީޓުން އާންއަށް ތިންވަނަ ލިބުނުއިރު، މި ހީޓުން އެއްވަނަ ހޯދާފައިވަނީ ސްވިޒަލެންޑްގެ ތިއަރީ ބޮލިން އެވެ. އޭނާ ނިންމީ 22.95 ސިކުންތެވެ. ދެވަނައަށް ނިންމީ ބުރުންޑީގެ ބެލީ-ކްރެސަސް ގަނީރާ އެވެ. އޭނާ ރޭސް ނިންމީ 23.80 ސިކުންތުންނެވެ.
މިފަހަރުގެ އޮލިމްޕިކްސްގެ ސްވިމިން 50 މީޓަރު ފްރީސްޓައިލް އިވެންޓްގައި ޖުމްލައެކު 74 ފެތުންތެރިން ވާދަކުރި އެވެ. އާންގެ ޓައިމިންއާއެކު، އޭނާއަކީ ހުރިހާ ހީޓަކަށް ބަލާނަމަ 50 ވަނައެވެ.