މިފަހަރުގެ ޓްރާންސްފާ ބާޒާރުގައި މެންޗެސްޓާ ޔުނައިޓެޑުން ބޮޑު އަގުގައި ގެނައި، ފްރާންސްގެ ޒުވާން ސެންޓްރަލް ޑިފެންޑަރު، ލެނީ ޔޯރޯ އާއި އެ ޓީމަށް ކުޅެމުންއަންނަ ޑެންމާކްގެ ފޯވާޑް، ރަސްމުސް ހޮއިލުންޑް އަށް އަނިޔާވެ، ދުވަސްތަކަކަށް ކުޅުމާ ދުރަށް ދާން ޖެހިއްޖެއެވެ.
އެގޮތުން، މީގެ ދެ ހަފްތާއެއްހާ ދުވަސް ކުރީން ލިއްލެ އިން ބޯނަހާއެކު ގާތްގަނޑަކަށް 70 މިލިއަން ޔޫރޯގެ ޓްރާންސްފާ ފީ އަކަށް ޔުނައިޓެޑަށް ބަދަލުވި އުމުރުން 18 އަހަރުގެ ޔޯރޯގެ ފަޔަށް ލިބުނު އަނިޔާގެ ސަބަބުން ތިން މަހެއްހާ ދުވަހު ކުޅުމާ ދުރުގައި ހުންނަން ޖެހޭއިރު، އެ ޓީމުގެ ހޮއިލުންޑްގެ ފައިގެ ފަލަމަސްގަނޑަށް ލިބިފައިވާ އަނިޔާއިން ރަނގަޅުވާން ހަ ހަފްތާ ނަގާނެ ކަމަށް މީޑިއާ ރިޕޯޓްތައް ބުނެއެވެ.
މި ދެ ކުޅުންތެރިންނަށްވެސް އަނިޔާވީ، މި ހަފްތާގައި ވާދަވެރި އާސެނަލްއާ ދެކޮޅަށް ޕްރީ-ސީޒަންގައި ކުޅުނު އެކުވެރިކަމުގެ މެޗުގައެވެ. އެހެންކަމުން، އައު ސީޒަނުގެ ކުރީކޮޅު ޔުނައިޓެޑަށް ކުރިއަށް ހުރި މެޗުތަކުގައި މި ދެ ކުޅުންތެރިންނަށް ވެސް ނުކުޅެވޭނެ އެވެ.
ޔުނައިޓެޑްއިން އަންދާޒާކުރާ ގޮތުގައި ޔޯރޯއަށް 3 މަސްދުވަހު ނުކުޅެވޭނެއެވެ. ފުރަތަމަ ސްކޭންއިން ދައްކާ ގޮތުގައި، އޭނާގެ ފަސްވަނަ މެޓަޓާސަލްގައި ރެނދެއްލާފައިވާ ކަމަށާއި، ނަމަވެސް އިނގިރޭސިވިލާތަށް އެނބުރި އައުމުން އިތުރަށް ބަލައި، އޭނާއަށް ނުކުޅެވޭނެ މުއްދަތު ކަށަވަރުކުރެވިގެންދާނެ ކަމަށް ޔުނައިޓެޑުން ގަބޫލުކުރެއެވެ.
ޔޯރޯ އަކީ އައު ސީޒަނަށް ތައްޔާރުވުމުގެ ގޮތުން ބޮޑު ހޭދައެއް ކޮށްގެން ޔުނައިޓެޑުން ގެނައި އެންމެ އުއްމީދީ ކުޅުންތެރިޔާ އެވެ. އާސެނަލްއާ ދެކޮޅަށް ކުޅުނު މެޗުގެ ކުރީކޮޅު ލިބުނު އަނިޔާއާ ގުޅިގެން ދަނޑުމަތީގައި ފަރުވާދިނުމަށްފަހު، ވަނީ ފަހުން ބަދަލުކޮށްފައެވެ.
މިހާރު ޔުނައިޓެޑްގެ ފޯވާޑްލައިންގައި ހިމެނޭ އެންމެ މުހިއްމު ކުޅުންތެރިޔާ ކަމަށްވާ، ހޮއިލުންޑް، 21، އަށް އަނިޔާވެގެން ބަދަލުކުރިއިރު އާސެނަލްއާ ދެކޮޅަށް ކުޅުނު އެ މެޗުގައި ކުރީން ލީޑްނަގައިދިނީ ވެސް އޭނާ އެވެ.
ޑެންމާކުގެ އެޓޭކުގައި ވެސް މުހިއްމު ދައުރެއް އަދާކުރަމުން އަންނަ ހޮއިލުންޑް އަށް ލިބުނު މި އަނިޔާގެ ސަބަބުން ބެލެވޭގޮތުގައި ކުރިއަށް އޮތް ސެޕްޓެންބަރު މަހުގައި އޮންނަ ފުރަތަމަ އިންޓަނޭޝަނަލް ބްރޭކް ނިމުމުގެކުރީން ކުޅުމަށް އެނބުރި ނާދެވޭނެ އެވެ.
ޔޯރޯ އާއި ހޮއިލުންޑް އަށް ލިބުނު އަނިޔާގެ ސަބަބުން ގިނަ ދުވަސްތަކަކަށް ކުޅުމާ ދުރަށް ދާން ޖެހިފައިވާއިރު، އެންމެ ފަހުން ރެއާލް ބެޓިސްއާ ދެކޮޅަށް ކުޅުނު އެކުވެރިކަމުގެ މެޗުގައި މާކަސް ރަޝްފޯޑްގެ އިތުރުން ބްރެޒިލްގެ ވިންގް، އެންތަނީ ވެސް ވަނީ އަނިޔާވެގެން ބަދަލުކޮށްފައެވެ.
މީގެއިތުރުން، ފާއިތުވި ސީޒަނުގައި ވެސް ޔުނައިޓެޑަށް ވަނީ އަނިޔާގެ ގިނަ މައްސަލަތަކެއް ކުރިމަތިވެފައެވެ. އެގޮތުން، އެ ޓީމުގެ ޑިފެންސްގެ މުހިއްމު ކުޅުންތެރިން ކަމަށްވާ، ލޫކް ޝޯވ އާއި ޓައިރެލް މަލާސިއާގެ އިތުރުން ހެރީ މެގުއާ އާއި ލިސާންދްރޯ މާޓިނެޒް އަދި މިޑްފީލްޑްގައި ހިމެނޭ މޭސަން މައުންޓް ފަދަ ކުޅުންތެރިންނަށް އަނިޔާގެ ސަބަބުން މުހިއްމު ގިނަ މެޗުތަކެއް ވަނީ ގެއްލިފައެވެ.
އައު ސީޒަނުގައި ޔުނައިޓެޑަށް އެންމެ ފުރަތަމަ އޮތީ ވާދަވެރި މެންޗެސްޓާ ސިޓީއާ ދެކޮޅަށް ކޮމިއުނިޓީ ޝީލްޑްގައި ކުޅޭ މެޗެވެ. މި މަހުގެ 10 ވަނަ ދުވަހު ވެމްބްލީ ސްޓޭޑިއަމްގައި ކުޅުމަށް ހަމަޖެހިފައިވާ އެ މެޗަށްފަހު، އޭގެ ހަ ދުވަސް ފަހުން ޕްރިމިއާ ލީގުގެ ފުރަތަމަ މެޗުގައި އަމިއްލަ ދަނޑުގައި އެ ޓީމު ނިކުންނާނީ ފުލަމްއާ ދެކޮޅަށެވެ.