ބްރައިޓަން ހޯވް އެންޑް އެލްބިއަން އަށް ކުޅެމުންއައި ޖަރުމަނުގެ މިޑްފީލްޑަރު، ޕަސްކަލް ގްރޮސް، ބޮރޫޝިއާ ޑޯޓްމަންޑަށް ސޮއިކޮށްފިއެވެ.
ގްރޮސް، 33، ކުޑައިރުއްސުރެއް ސަޕޯޓްކުރަމުންއައި ކްލަބު ކަމަށްވާ، ޑޯޓްމަންޑާއެކު ސޮއިކުރީ ދެ އަހަރު ދުވަހުގެ ކޮންޓްރެކްޓެއްގައެވެ. މި ޑީލުގެ ދަށުން ޑޯޓްމަންޑުން ވަނީ ބޯނަހާއި ނުލައި ގާތްގަނޑަކަށް 8 މިލިއަން ޕައުންޑްގެ ޓްރާންސްފާ ފީ އެއް ބްރައިޓަން އަށް ދެއްކުމަށް އެއްބަސްވެފައެވެ.
ޑޯޓްމަންޑަށް ސޮއިކުރުމަށްފަހު ގްރޮސް ބުނީ، އެ ކްލަބުގެ ކުޅުންތެރިއަކަށް ވެވުމުން ވަރަށް ބޮޑަށް އުފާވާ ކަމަށެވެ. އެކަން ހާސިލްކުރެވުމަކީ އޭނާ އަށް ވަރަށް މުހިއްމު ކަމެއްގެ ގޮތުގައި ފާހަގަކޮށް، ގްރޮސް ބުނީ، އެކަން ހާއްސަވަނީ ކުޑައިރުއްސުރެ އޭނާ އަކީ ޑޯޓްމަންޑްގެ ފޭނަކަށް ވާތީވެ ކަމަށެވެ.
ގްރޮސް އިތުރަށް ބުނީ، އޭނާ އަށް އެ ކްލަބުން ކުރި އިތުބާރަށް އަގު އަދާކުރުމުގެ ގޮތުން، ދަނޑުމަތީގައި އޭނާގެ ކުޅުމުން އެކަން ސާބިތުކޮށްދޭނެ ކަމަށެވެ.
މިދިޔަ ހަތް އަހަރެއްހާ ދުވަހު އިންގްލެންޑްގައި ބްރައިޓަން އަށް ކުޅެފައިވާ ގްރޮސް އަކީ ޖަރުމަނުގެ ތާރީޚުގައި މިހާތަނަށް ތިންވަނަ އަށް އެންމެ ގިނައިން ޕްރިމިއާ ލީގުގައި މެޗު ކުޅެފައިވާ ކުޅުންތެރިޔާ އެވެ. އެގޮތުން، އޭނާ ވަނީ ލީގުގައި އެ ޓީމަށް 228 މެޗު ކުޅެދީފައެވެ.
ގްރޮސް އެންމެ ފުރަތަމަ ޖަރުމަނުގެ ގައުމީ ޓީމަށް ކުޅެފައިވަނީ މިދިޔަ އަހަރުގެ ސެޕްޓެންބަރު މަހު އެވެ. މިހާތަނަށްއައިއިރު އޭނާ ވަނީ ގައުމީ ޓީމަށް 8 މެޗު ކުޅެފައެވެ. މިއާއެކު، ގްރޮސް އަކީ ޖަރުމަނުގައި މާ މަޝްހޫރު ކުޅުންތެރިއެއް ނޫނެވެ. އެކަމަކު، އޭނާ ވަނީ ނިމިދިޔަ ޔޫރޯގައި ވާދަކުރި ޖަރުމަނުގެ ސްކޮޑުގައި ހިމެނި، މުބާރާތް ހުޅުވި މެޗުގައި ސްކޮޓްލެންޑާ ދެކޮޅަށް ކުޅެފައެވެ.
ޖަރުމަނުގެ ހޮފެންހައިމްގެ އެކި އުމުރުފުރާގެ ޓީމުތަކަށް ކުޅެފައިވާ ގްރޮސް އެ ގައުމުގެ މަތީ ފަންތީގައި ކުޅުނީ އެންމެ 70 މެޗެވެ. އޭނާ އެންމެ ފަހުން ކުޅުނީ 2016-17 ވަނަ އަހަރުގެ ސީޒަނުގައި އިންގޯލްޝްޓަޑްޓަށެވެ. އެފަހަރު އެ ޓީމު ވަނީ ރެލިގޭޓްވެފައެވެ. މިހާރު އެ ކްލަބު ކުޅެމުންއަންނަނީ ޖަރުމަނުގެ ތިންވަނަ ޑިވިޝަނުގައެވެ.
ގްރޮސް އަކީ ޑޯޓްމަންޑުން ކުރިއަށް އޮތް ސީޒަނަށް ގެނައި ތިންވަނަ ކުޅުންތެރިޔާ އެވެ. މީގެކުރީން، އެ ޓީމުން ވަނީ ސްޓުޓްގާޓަށް ކުޅެމުންއައި ޖަރުމަނުގެ ޑިފެންޑަރު، ވޯލްޑެމާރް އެންޓޮން އާއި ގިނީގެ ފޯވާޑް، ސަރްހޫ ގިރާސީ ގެ ސޮއި ހޯދާފައެވެ.