ވޭތުވެދިޔަ ދެ ސީޒަންގައި 22 ފަހަރު ޕްރިމިއަރ ލީގުގެ މެޗުތައް ފެށުމާއި، އަލުން ފެށުން ލަސްކުރުމުގެ ސަބަބުން މެންޗެސްޓާ ސިޓީއަށް ޖޫރިމަނާއެއް ދައްކަން ޖެހިއްޖެއެވެ.
ސިޓީއަށް ޕްރިމިއާ ލީގުން ގާތްގަނޑަކަށް 2 މިލިއަން ޕައުންޑް (2.5 މިލިއަން ޑޮލަރު) އަށްވުރެ ގިނަ އަދަދަކުން ޖޫރިމަނާކުރީ، 22 ފަހަރެއްގެ މަތިން މެޗު ފެށުން ނުވަތަ އަލުން ފެށުން ލަސްކުރުމުގެ ސަބަބުންނެވެ.
އެގޮތުން، ގިނަ ފަހަރު މަތިން "އެކަށީގެންވާ ސަބަބެއް ނެތި" މެޗު ފެށުން ނުވަތަ ދެވަނަ ހާފުގެ ފަހުން މެޗު އަލުން ފެށުން ލަސްކޮށްގެން ޕްރިމިއާ ލީގުގެ ގަވާއިދާ ޚިލާފުވެފައިވާކަން އެ ކުލަބުން ވެސް ވަނީ ގަބޫލުކޮށްފައެވެ.
މި ހަފްތާގެ ބުދަ ދުވަހު ޕްރިމިއާ ލީގުން ނެރުނު ބަޔާނެއްގައި ބުނެފައިވަނީ، "ޕްރިމިއާ ލީގާއި މެންޗެސްޓާ ސިޓީ އެފްސީ އާ ދެމެދު އަދަބު ދިނުމުގެ އެއްބަސްވުމެއްގައި ސޮއިކުރެވިފައިވެއެވެ. މިއީ ކުޅުން ފެށުމާއި އަލުން ފެށުމުގެ ޒިންމާތަކާ ގުޅޭ ޕްރިމިއަރ ލީގުގެ ގަވާއިދު L.33 އާ ޚިލާފުވެފައިވާކަން ކްލަބުން ޤަބޫލުކުރުމާ ގުޅިގެންނެވެ."
ސިޓީއަށް ކޮންމެ ކުށަކަށް ވަކި މިންގަނޑަކުން އަދަބު ދީފައިވެއެވެ. އެންމެ ފުރަތަމަ ކުށަކީ 2022 ވަނަ އަހަރުގެ އޯގަސްޓް މަހު ކްރިސްޓަލް ޕެލަސްއާ ދެކޮޅަށް ކުޅުނު މެޗުގެ ދެވަނަ ހާފު ފެށުން 1 މިނެޓާއި 18 ސިކުންތު ލަސްކުރުމެވެ. އެ ފަހަރުގެ ކުށަށް އިންޒާރެއް ދީފައިވެއެވެ.
އެއަށްފަހު އެކަން ތަކުރާރުވާ ކޮންމެ ފަހަރަކު ޖޫރިމަނާ އިތުރުކުރަމުން ގެންގޮސްފައިވެއެވެ. އެ ޓީމުން އެންމެ ގިނަވަގުތު ވަންދެން ފެށުން ލަސްކުރީ، ވޭތުވެދިޔަ ސީޒަންގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު ލީގުގެ ފަހު މެޗުގައެވެ. އެގޮތުން، އެ ޓީމުން އެ މެޗު ފެށީ ވެސް ދީފައިވާ ގަޑިއަށްވުރެ 2 މިނެޓް 46 ސިކުންތު ލަހުންނެވެ. އެ މެޗު ކާމިޔާބުކޮށް ސިޓީން ވަނީ ވިދިވިދިގެން 4 ވަނަ ލީގު ތަށި އުފުލާލައިފައެވެ.
ޕްރިމިއާ ލީގުން ނެރުނު ބަޔާންގައިވަނީ، ސިޓީން "ޤަބޫލުކުރެވިފައިވާ ޚިލާފުވުންތަކަށް މަޢާފަށް އެދިފައިވާ ކަމަށާއި އަދި ކްލަބުގެ ކުޅުންތެރިންނާއި ފުޓްބޯޅަ މެނޭޖްމަންޓް ޓީމްތަކަށް ގަވާއިދު އެލް.33 އާ އެއްގޮތަށް އަމަލުކުރުމުގެ ޒިންމާތައް ހަނދާންކޮށްދީފައިވާ ކަމަށް ކަށަވަރުކޮށްދީފައިވާ" ކަމަށެވެ.
މިއީ ފާއިތުވި ދެ ސީޒަންގައި ގަވާއިދާ ޚިލާފުވުމާ ގުޅޭ ކަމެކެވެ. އަދި މިކަމަކީ ސިޓީއަށް ކުރިމަތިވެފައިވާ މާލީ ގަވާއިދުތަކާ ޚިލާފުވުމުގެ 115 ދަޢުވާއާ ގުޅުންހުރި ކަމެއް ނޫނެވެ.