ކުޑަކުދިންގެ ކުރިމަގަށް ޚާއްޞަކޮށް "ކުދިންނާ ގާތުން" ޕްރޮގްރާމް 10 ރަށެއްގައި ހިންގަނީ

ކުޑަދިންގެ ކުރިމަގު އުޖާލާކުރުމަށް ހަރުދަނާ ޖީލެއް ބިނާކުރުމަށް، ޔުނިސެފްގެ އެހީގައި އަތޮޅުތަކުގެ 10 ރަށެއްގައި ޚާއްސަ ޕްރޮގްރާމެއް ފަށައިފިއެވެ. މި ޕްރޮގްރާމް ކުރިއަށްގެންދާ ރަށްތަކުގެ ކައުންސިލްތަކަށް ޚާއްސަކޮށްގެން "ކުދިންނާ ގާތުން"ގެ ނަމުގައި ޚާއްސަ ފޯރަމެއް ވަނީ ފަށާފައެވެ.

ދެ ދުވަހުގެ މުއްދަތަށް ކުރިއަށްގެންދާ ފޯރަމްގައި މައިގަނޑުގޮތެއްގައި އަލިއަޅުވާލާނީ މި ޕްރޮގްރާމް ރަށްތަކުގައި ހިންގާނެ އުސޫލުތައްކަށް ކައުންސިލްތަކާއިި ކަމާގުޅުންހުރި އިދާރާތައް އަހުލުވެރިކުރުމަށެވެ.

"ކުދިންނާ ގާތުން"ގެ ނަމުގައި ޚާއްސަ ފޯރަމް ފެށުމަށް ބޭއްވި ރަސްމިއްޔާތުގައި ލޯކަލް ގަވަރުމަންޓް އޮތޯރިޓީ، އެލްޖީއޭގެ ސީއީއޯ ޑރ.މަރްޔަމް ޒުލްފާ ވިދާޅުވީ މި ޕްރޮގްރާމްގެ ބޭނުމަކަށްވަނީ ޔުނިސެފްގެދެމެހެއްޓެނިވި ތަރައްްޤީގެ ފްރޭމްވަރކްގެދަށުން، ކުޑަކުދިންގެ ޙަޤުތައް ކަށަވަރުކޮށްދީ އެ ކުދިންނަކީ ހަރުދަނާ ބަޔަކަށް ހެދުމަށް އެހީވުންކަމަށެވެ. ސިޔާސަތުތައް ހިއްސާކުރުމަށް ބާއްވާ ދެ ދުވަހުގެ ފޯރަމްގައި 35 ބައިވެރިން ބައިވެރިވެއެވެ. އޭގެތެރޭގައި ރަށު ކައުންސިލް، އަތޮޅު ކައުންސިލް، ޖަމުޢިއްޔާތައް އަދި އެލްޖީއޭގެ މުވައްޒަފުން ހިމެނެއެވެ.

"މި ޕްރޮގްރާމް ހިންގުމަށް ކަނޑައަޅާފައިވާ ރަށްރަށަކީ ކުޅުދުއްފުށި ސިޓީ، ށ.ފުނަދޫ، ރ.މީދޫ، ބ.އޭދަފުށި، އއ.އުކުޅަސް، ވ.ފެލިދޫ، ދ.ކުޑަހުވަދޫ، ލ.ގަން، ފުވައްމުލައް ސިޓީގެ އިތުރުން އައްޑޫ ސިޓީ ހިތަދޫ. މިއީ އެއް އަހަރުގެ ޕްރޮގްރާމެއް." ޑރ.ޒުލްފާ ވިދާޅުވިއެވެ.

މި ފޯރަމް ފަށްޓަވާދެއްވާ ވާހަކަފުޅުދައްކަވަމުން ސިޓީތަކާ އިދާރީ ދާއިރާތައް ހިންގުމާ އާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު ވަނީ ރާއްޖޭގެ ތަޢުލީމީ ނިޒާމާށާއި ކުޑަކުދިންނާއި ޒުވާނުންގެ ހުނަރުތައް ތަރައްޤީކުރުމަށް ޔުނިސެފުން ދެމުންދާ އެހީތަކަކީ ވަރަށް ބޮޑު އެހީއެއްކަން ފާހަގަކުރައްވާފައެވެ. ޚާއްސަކޮށް އަތޮޅުތަކުގައި ޓީޗަރސް ލަރނިން ސެންޓަރުތައް ޤާއިމުކޮށް، އެކަމުގައި ކުރި މަސައްކަތަކީ އޭގެ ހެޔޮ ނަތީޖާ ތަޢުލީމީ ނިޒާމުގެތެރެއިން ފެންނަމުންދާ ކަމެއްކަމަށް ވަޒީރު ވިދާޅުވިއެވެ،

ކުޑަކުދިންނަށް ޚާއްސަކޮށް ފެށި މި ޕްރޮގްރާމްގެ ސަބަބުން، ހެޔޮލަފާ މުޖުތަމަޢުއެއް ބިނާކުރުމަށް ކަނޑައަޅާފައިވާ ސިޔާސަތުތަކަށް ބޮޑު އެހީއެއް ލިބޭކަން ވަޒީރު ފާހަގަކުރެއްވިއެވެ.

"އަހަރެން ބޭނުންވާ ރަށް" ޕޮލިސީ ފްރޭމްވަރގެދަށުން ވަރަށް ގިނަ ކަންކަން އެބަ ހާސިލްވޭ. އެއްވެސް ކުއްޖަކު ބާކީ ނުކުރުމަށް ސަރުކާރުން ކަނޑައަޅާފައިވާ ސިޔާސަތު ޙާސިލްކުރުމަށް ބޮޑު އެހީއަކަށްވޭ. ކުދިންގެ ތަޢުލީމާއި ހުނަރު އަށަގެންނެވުމާ އަދި ކުދިންނަށް ރައްކާތެރިކަން ދިނުމާއި ދުޅަހެޔޮކަން އިތުރުކުރުމަށް މަސައްކަތްކުރެވޭ." އާދަމް ޝާރީފު ޢުމަރު ވިދާޅުވިއެވެ.

ޔުނިސެފުން ރާއްޖެއަށް ކަނޑައަޅުއްވާފައި ހުންނަ ރެޕްރެސެންޓެޓިވް ޑރ.އެޑްވަޑް އަޑައި ވިދާޅުވީ، މި ފޯރަމްގެ އެންމެ ބޮޑު ބޭނުމަކީ މި ޕްރޮގްރާމުގެ މަޤުޞަދުތައް ހާސިލުކުރުމަށް ބޭނުވާ ސިޔާސަތުތައް އެކުލަވާލުމަށް ރާއްޖެއަށް އެހީތެރިކަން ދިނުންކަމަށެވެ. މީގެސަބަބުން ލާމަރުކަޒީ އުސޫލުން ރާއްޖެ ހިންގުން ތަންފީޒުކުރުމަށް ޤައުމީ ފެންވަރުގައި ބޭނުންވާ އެހީތެރިކަން ލިބޭނެކަމަށް އޭނާ ވިދާޅުވިއެވެ.

"ކުދިންނާ ގާތުން" ޕްރޮގްރާމްގައި މައިގަނޑު 8 ދާއިރާއަކުން ޕްރޮގްރާމްތައް ހިންގާނެއެވެ. އޭގެތެރޭގައި ތަޢުލީމީ ނިޒާމަށް ބޭނުންވާ އެހީތެރިކަމާއި، ހުނަރު ތަރައްޤީކުރުމާއި، ކުދިންގެ ހަރަކާތްތެރިކަން އިތުރުކޮށް ދުޅަހެޔޮކަން އިތުރުކުރުމާއި ނަފްސާނީ ދުޅަހެޔޮކަން ތަރައްޤީކުރުމާއި، ބެލެނިވެރިންނާ ޢާއިލާ އަދި މުޖުތަމަޢުގެ ދަޢުރު ބުނެދިނުން ހިމެނެއެވެ. އަދި މޫސުމީ ބަދަލުތަކަށް ވިލުންތެރިކަން އިތުރު ޖީލެއް ބިނާކުރުންވެސް މި ޕްރޮގްރާމުން ހާސިލުކުރާ މަޤްޞަދުގައި ހިމެނެއެވެ.